Welcome to Urdubiography

 

 

 

Iftikhar Muhammad Chaudhry

Chief Justice of Pakistan Iftikhar Muhammad Chaudhry was born on 12 December 1948 in Quetta. His father Jan Muhammad was a police officer. Justice Iftikhar Muhammad Chaudhry has completed his LLB from Jamshoro University Sindh. In 1974 Justice Iftikhar Muhammad Chaudhry became the member of bar and in 1976 he was appointed as the lawyer in Lahore high Court, on 6th November 1990 Justice Iftikhar Muhammad Chaudhry became the Chief justice of Baouchistan. On 30 June 2005, General Pervez Musharaf nominated Justice Iftikhar Muhammad Chaudhry as the Chief Justice of Pakistan. In 2007, the American national law journal awarded him the award of “lawyer of the year.”

Iftikhar Muhammad Chaudhry Biography

Iftikhar Muhammad Caudhary

Justice Iftikhar Muhammad Chaudhry pedaishi tor par “baloch” lekin nasli tor par rajput hain. In ke walid Jan Muhammad aik police officer the. Abao ajdad ne mashiqi Punjab ke marof shehar Jalandhar ko maskan banaya aur un ki rajputi shan Jalandhar ki Punjabi methas mein ghul mil gai. Qayam e Pakistan ke bad Jan Muhammad sahib ne yahan se hijrat ki to quetta mein ja muqim howae. Yahen un ke han 12 December 1948 ko dosra bacha peda howa jis ka naam Iftikhar Muhammad rakha gaya lekin waliden ko kia khabar thi ke aik din ye bacha na sirf un ke leye balke pore mulk ke leye sarmaya e iftikhar ban jaye ga aur aala adliya ka rukh hi nahi, Pakistan ki tarikh badal kar rakh de ga, kon janta tha ke duniya bhar mein Iftikhar Muhammad Caudhary ka naam ehteram se liya jaye ga, America ka national law journal unhen (2007 mein) “lawyer of the year” qarar de ga, Newyork shehar ke wokla ki anjuman unhen ezazi rukniyat pesh karye gi aur Howard law school ki taraf se unhen “tamgha e azadi” (medal of freedom) pesh karte howae yun khiraje tehseen pesh kiya jaye ga “mumtaz qanondan aur musanif (Iftikhar Muhammad Chaudhry) jurat, yaqen e muhqam aur adliya ki azadi ke sath pukhta wabastagi ki badolat ap Pakistan aur duniya bhar mein qanon ki hakmiyat ko barqarar rakhne mein masrof e jehad logon ke leye missal (role model) ban gaye hain.” America ki Nowa South Eastern University ki tarfa se unhen doctorate ki ezazi degree in alfaz ke sath ata hoi “Iftikhar Muhammad Chaudhry! Ap ne duniya bhar mein qanondanon aur aam logon ko walwal e tazah bakhsha.”

Iftikhar Muhammad Chaudhry ki raj poti shan mein balochi abo hawa ka tarka laga to uthan hi kuch aur ho gai. B.A karne ke baad Sindh University se qanon ka imtehan pass kiya aur 1974 mein practice ka aghaz kiya. Sakoot e Dhaka ke bad Pakistan in dinon apni ijtemai zindagi ki tarteb e no mein masrof tha. 1973 ka mutafiqa aain manzor ho chukka tha lekin Balochistan ke halat mein therao nahi tha. Zulfikar Ali Bhutto ki mun zor siyasat Balochistan mein apna rasta kushada karne oar bazid thi. Aindah chand barson ke doran barpa hone wali shorish ke asar numaya ho rahe the. Nojawan Iftikhar Muhammad Chaudhry muztarib to rahe lekin apna safar jari rakha. Do saal bad wo high court ke wakeel ban gaye.mehnat aur zahanat ne un ka rasta aasan kar deyatha. Advocate general muqarar howae. Judge banne, Balochistan high court ke Chief Justice banaye gaye. February 2000 mein Suprem court mein pohanch gaye. 5 baras bad Chief Justice ka mansab sanbhala. Is doran kai hukumaton ko bante aur bigarte dekh chuke the. Nazm o zabt ke paband aur barob judge ke tor par un ki dhak beth chuki thi. Wokla taiyari aur ehteyat ke sath un ki adalat mein aate jate. Un ki tez nigah bohat jald mamle ki the tak pohanch jati aur wo fasla sunane mein takhir na karte the.

General Pervez Musharaf ne aain ki bisat palat kar iqtedar sanbhala to janab JusticeIftikhar Muhammad Chaudhry ne shayad ese Pakistani siyasat ka mamol samajh kar is ke muqabil kare hone ki zarorat mehsos na ki. Us waqat Chief Justice of Pakistan janab Justice Saeed uz Zaman Sidiqi aur kai dosre baradar Judge “PCO” ke tehat half uthane par taiyar na howae to unhen retired kar deya gaya. Janab Justice Iftikhar Muhammad Chaudhry, naye Chief Justice Irshad Hassan Khan ke sath is bench mein bethe, jis ke hathon General Pervaz MUsharaf ke iqtedar ko sanad e jawaz bakhshi gai.

Din guzarte rahe, aamirana iqtedar ki tahein kulti gayein, Iftikhar Muhammad Chaudhry ke andaz ka aik naya shakhs apne wajood ka ehsas delane laga. Bemuhar aamiriyat ko lagam dene ki ehmiyat barhne lagi. Is se phele ke qanoon harkat mein aata, laqanooniyat ne khud hi use lalkar diya. Pervez Musharraf ne Chief Justice ko bola kar un se istefa talb kar liya. Bas ye aik lamha tha ke sab kuch badal gaya. Judge ne Pervez Musharraf ke samne sar jhukane se inkar kar diya. Chief Justice of Pakistan Janab Iftikhar Muhammad Chaudhry ke horf e inkar ne unhen ray aama ke mehbob banna deya. Media, wokla, civil society, siyasi karkunan, un ke sath the. Supreme Court mein bhi aik nayi tawanai peda ho gai aur janab Justice Iftikhar Muhammad Chaudhry ko un ke mansab se hatane ki koshishs un ke sathi Judges ne hi nakaam bana di. Aik nai shan ke sath wo phir Supreme Court mein tashrif farma the. Insaf ki lathi, bandoq ko zer kar chuki thi.

Pervez Musharaf ne aik bar phir Judges ko naya half uthane ke liye kaha. Janab Justice Iftikhar Muhammad Chaudhry ki qayadat mein dajanon judge dat gaye. Taqat ko qanoon manne se inkar kar deya. Tareekh mein pheli bar “PCO” ka hokum nama ghair aaini qarar de diya gaya ke Chief Justice aur un ke rufaqa ne khamoshi se retire hone ke bajaye medan e jung mein dad e shujaat dene ka fasala kar leya tha. Judge “bartaraf” howae, gharon mein nazar band howae, lekin awam ki taqat ne khud ko manwa leya. Azadana aur munsifana intekhabat karwane pare, awami numainde iqtedar ke ewanon mein pohanche aur Pervez Musharaf ka Chiragh gul ho gaya.

Chief Justice Iftikhar Muhammad Chaudhry aur un ke rofaqa ko awam ne dobara koye insaf ki pasbani bakhsh de. Janab Justice Iftikhar Muhammad Chaudhry aur aala adliya awami etemad ki dolat se malamal hain. Corruption aur badunwani ka taqub jari hai. Pakistan ki tareekh mein pheli bar Chief Justice ka shumar maqbol tareen shakhsiyat mein hone laga ahi. Ye nare abhi tak faza mein zindah hain “Iftikhar tere jan nisar beshumar beshumar” Zulm, ziyadati aur nainsafi ki mari hoi quom muntazir nigahon se Supreme Court ki taraf dekh rahi hai. Umeed ka deya abhi tak jal raha hai.

 

More Link


 

 

 

Copy right 2012-2014 www.urdubiography.com