Welcome to Urdubiography

 

 

 

Muhammad Ibn Zakariya Al Razi

Muhammad Ibn Zakariya Al Razi was born on 26th August 865 AD in Rey,Iran. He was a chemist, polymath and physician. Al Razi served as a chief physician in Rey hospital. There are more than 100 books of Al Razi. Al Hawi is a very famous book of Al Razi, it is based on encyclopedia. Al Razi died in 925 in Rey at the age of 6o years. In this page you can see Biography about Muhammed Ibn Zakariya Al Razi In Urdu.

Muhammad Ibn Zakariya Al Razi Biography

Muhammad Ibn Zakariya Al Razi Photo

Iran ke shumali ilaqe mein maujoda dar ul hukomat Tehran se 5 meel ke fasle par Iran ka qadeem shehar Rey aabad hai. Tehran ki shaan o shaukat ke aage ab Rey ki aehmiyat nahi rahi, lekin pehle zamane mein yeh Iran ka aik famous shehar tha aur apne andar mutadid khusosiyat liye hue tha. Yahin se Sasani khandan ke aakhri badshah ne musalmano ki fatehana yalghar se maghlob ho kar Irani qaum ko alvidai paigham diya aur phir Khurasan ki taraf raah farar ikhteyar kit hi. Isi jagah banwamia ki khilafat ka takhta ulta gaya aur Banu Abbas ke hath khilafat ki bag door aai thi. Yehi shehar khandan aabsiya ke namwar halifa Haroon ul Rasheed ki jae wiladat hai aru isi shehar mein islami daur ke tabeeb aazam ne subha ki khushgawar roshni dekhne ki koshish ki. Abu Bakar Mohammed Zikriya Razi 865 mein paida hue. Rey ke naam ki nisbat se wo mashriq mein Raazi aur maghrib mein Rezo ke laqab se famous hain.

Aaghaz e shabab tak mohammed ibn zakariya al razi aik be fikar naujawan the aur gana bajana in ka mehboob mashgala tha, chunache oad jo us zamane ka aik maqbool saaz tha, bajane mein inhe bohat maharat hasil thi, lekin jab zindagi ki zimmedariyan barhi aur inhe pora karne ke liye inhe daulat ki zarorat mehsoos hui to koi mufeed pasha ikhteyar karne ke bajae inho ne Chemistry ki taraf rujo kiya, kyun ke kam qeemat dhaton ko sone mein tabdeel kar lene se in ki jawani ke sare khuwab pore ho sakte the. Chemistry ke jo tariqe us zamane mein famous the, un mein mukhtalif maadni chezon aur herbs ko baaz dhaton mein mila kar dino bal ke mahino aag deni parhti thi. Naujawan Al Razi ne bhi yehi tariqa ikhteyar kiya. Medicines aur herbs ke husool ke liye jin ki Chemistry mein zarorat hoti thi unhe dawa faroshon ki dukano par jana parhta tha. Is silsile mein aik dawa farosh ke sath in ke dostana talluqat qaiym ho gae. Wo fursat ke lamhat us dukaan par guzarte. Us se mukhtalif dawaon ki khasiyaton par baat cheat karte, jis ke baiys inhe medicines aur dawasazi se dilchaspi paida ho gai, jo tib ki taleem ki taraf in ka pehla qadam tha.

Unhi dino aik aisa waqeya pesh aaya. Jis ne in ki zindagi ka dhara morh diya. Chemistry ke dauran aag ko phonken marte marte inhe aashob e chasham ki shikayat ho gai. Wo ilaaj ke liye aik tabeeb ke paas gae, jis ne in se kafi raqam fees ke taur par wasool ki. Al Razi ne dil mein socha. Asal Chemistry to yeh hai, na ke wo jis mein, sir khapata hon. Is ke bad inho ne tib ki taleem hasil karne aur tabeeb banne ka faisla kar lia. Us zamane mein tib aur falsafa lazim o malzoom samjhe jate the, is liye Al Razi ne Rey ke maqami ustadon se falsafe aur tib ki taleem hasil ki aur phir taleem ki takmeel ke liye Baghdad rawana ho gae. Baghdad mein us waqt Firdous ul hikmat ke namwar musannif Ali Bin Raban Tibri baqeed hayat the. Al Razi ne in kea age zanooe tilimz kiya aur us buzurg ustaad se tib ke tamam ramoz seekhe, chunache apni shehra e aafaq tasaneef mein wo jahan kahin Ali Bin Raban ke aqwal ka hawala dete hain, in ke qalam se aqeedat o aehteram ke moti tapak parhte hain. Ali Bin Raban ne bhi bhanp lia ke Al Razi mein is ke aam shagirdon ke baraks aesi salahiyatein poshida hain, jin ke baiys wo aik roza aasman e hikmat ka darakhshanda sitara banega. Is liye inho ne is johar qabil ko chamkane mein koi daqeeqa fard gizasht na kiya. Ali Bin Raban aik taweel arsey tak shahi tabib ke mansab par faiyz reh chuke the aur hukomat mein in ka bohat asar o rasookh tha. Is wajah se in ka tilimz aur in ki di hui isnaad Al Razi ke kaam aai.

Al Razi ne saleha saal se apne mutalle aur zaati tajurbe ki bina par jo yadhshten tehreer ki thin, ab un ki madad se ilm tib par apni pehli azeem kitab murattab ki aur apne Marbi Mansoor Bin Ishaaq wali Rey ke naam par is ki kitab ka naam Mansoori rakha. Mansoori ki taleef se Al Razi ki shohrat tamam abbasi saltanat mein phel gai aur inhe apne ahead ka sab se barha tabeeb samjha jane laga. 908 mein Baghdad ke markazi shifa khane mein jo us zamane mein aalim e Islam ka sab se barha shifa khana tha, inhe officer ul atbaa ka auhda pesh kiya gaya. Usi saal Rey mein Al Razi ke marbi Mansoor Bin Ishaaq ka daur e hukomat khatam ho gaya. Is liye Razi ne is auhde ko khushi se qabool kar lia aur teesri bar aik jaleel ul qadar mansab par faiyz ho kar Baghdad aae. Wo is auhde par 14 saal tak mutamkin rahe aur yeh tamam muddat inho ne aam muaalijat ke ilawa tibbi research aur tasneef o taleef mein guzari. In ki sab se barhi kitab Havi usi zamane mein mukammal hui. Inho ne bohat si kitabein aur risale mukhtalif mauzoaat par likhe, jin mein se aik kitab Maloki ko Tabristan ke governor bin warsudan ke naam par aur aik kitab Baraalsa’ata ko khalifa muqtadir ke wazeer Abu Al Qasim Bin Abdullah ke naam manoon kiya.

Al Razi ko Chemistry yani dhaton ko gold mein tabdeel karne ki jaulat aaghaz jawani mein parhi thi. Tib ka pasha ikhteyar karne ke bad bhi na gai. Chunache wo pare aur tanbe ko gold mein tabdeel karne ki koshish karte the, lekin zahir hai ke yeh aik saai la hasil thi. Is liye jab bhi inho ne gold banane ka dawa kiya. Nakami ki khaft uthani parhi. Albatta aik aur nuqta nazar se dekha jae to yeh koshish asli maqsad mein nakaam hone ke bawajood deegar maqasid mein barhi natija khez nikli. Yani in se gold to na ban saka, magar Chemistry mein jo aik mustaqil science hai, inho ne aise inkeshafat kiye, jo gold se barh kar qeemti the. Chunache yeh baat wasooq se kahi ja sakti hai ke Jabir Bin Hayyan ke bad Al Razi islami daur ke dosre barhe Chemist amlon ko nihayat wazahat se beyan kiya hai aur in aalaat ki bhi tashreeh ki hai, jo Chemistry mein istemal hote hain.

Yeh sahi ha ke Al Razi ne chemistry par mutaddid kitabein tehreer ki . lekin in ki haqeqi azmat in tibbi kitabon aur risalon par mabni hai, jin mein inho ne umer bhar ki apni shandar tibbi researches ko supurd e qartaas kiya hai. Al Razi ki in tibbi tasnifaat ki tadad 100 se zaiyd hai aur in mein hawi pehle no.par aati hai. Hawi aik azeem tibbi encyclopedia hai.

Al Razi ki dosri azeem tibbi tasneef Al Mansoori hai. Is kitab ko Al Razi ne apne aik marbi Mansoor Bin Ishaaq Hakim Rey ke naam par manoon kiya tha. Zakhamat mein yeh haqi se bohat choti thi, magar chunk e ilm o tib ke tamam zarori ramoz us mein aa gae the. Is liye aam atbaa mein jo hamesha zakheem kitabon par mukhtasir magar jamaa tasnifaat ko tarjeeh dete hain, Mansoori bohat maqbool rahi hai.

Al Razi ne apni umer ke aakhri 10, 12 saal aabai watan Rey mein guzare, jahan wo Baghdad ki sarkari mulazmat se subukdosh ho kar aa gae the. Lekin yahan inhe aik ibtelaa se do chaar hona parha. In ki beenai roz bar oz kam hoti gai aur aakhirkar wo bilkul nabina ho gaey. Andhe pan par burhapa mustezad tha. Is liye in ke aakhri ayyam zabon hali mein guzre. Isi halat mein inho ne 92 saal ki umer mein 932 mein daai ajal ko labbaik kaha. Al Razi bohat fiyaz the aur gharebon, mohtajon par khule dil se rupia kharch karte the. Apni is aadat ke baiys wo kabhi daulatmand na ho sake.

More Link


 

 

 

Copy right 2012-2014 www.urdubiography.com