Welcome to Urdubiography
Home >>Changez Khan

 

 

Changez Khan

Changez Khan Photo

Changez Khan was the founder of Mongol Empire. He was born on 1162 in Deluun Boldog, situated in the right bank of Onon River. His birth name was Temujin. Changez Khangot first married with Borta, she was a daughter of the lord of Konkirat. The lords of Mongolia accepted Temujin as a dominant of Khan in 1206 and gave the title name, Genghis Khan. Then he made a ruler of Mongolia. Changez Khan was a superlative administrator of his time. He created a flag for Mongolians. Flag had white in color and between the flag had black moon. Changez Khan was an advocate of Shamni Ism. He died on August 1227. In this page you can see the biography of Genghis Khan.

Changez Khan Biography In Urdu


Mongolia ke sehra e gobi mein aabaad wehshi qaum ke aik charwahe ne apni qaum ko munazzam kar ke aik azeem Mongol saltanat ki bunyad rakhi. Wo charwaha Yesugai ka beta Temujin tha, jo tareekh mein Changez Khan ke naam se famous hua. Temujin 1162 mein river Onon ke right bank par waqey Deluun Boldog ke maqam par paida hua. Changez Khan abi kamsin he the ke 1167 mein in ka baap Yesugai dushamno ki saazish ka shikaar ho gaya aur use zehar de kar halaak kar diya gaya.

Temujin ka bachpan intehai kasampursi mein guzra. Baap ke marne bad qabila ki aik shaakh Taiciut ke warghalane par aksariyat ne is khandan ke sath chor diya tha. Taijiyoot se talluq rakhne wale afraad qabile ki qiyadat apne hathon mein lena chahte the. Apni jaan bachane ke liye temujin aur in ka bhai dushmano se chup kar zindagi guzaarne lage, is dauran inho ne river Onan se shikaar kiye hue parinde, janwar aur fishes kha kar khud ko zinda rakha. Temujin jawan hua to taijiyoot walon ko us ke khaandan ke zinda bach jane ka pata chala. Dushmano ne is ki talaash jari rakhi. Aakhir pakra gya aur mustaqil taur par qaidi bana kar temujin ke galey mein lakdi ka aik tooq daal diya gaya. Yeh temujin yani Changez Khan ki zindagi ke sab se kamzor lamhaat the, jab maut us ke sir par mandla rahi thi aur wo bebasi ki tasweer bana… apni zindagi ki baqi maanda saansein gin raha tha. Us waqt koi soch bhi nahi sakta tha ke kaal kothri ka yehi qaidi aik din tareekh aalam ki sab se barhi saltanat ki daagh bail dalega aur duniya is ke naam se larzegi… aik shaam jab qabiley ke log river Onan ke kinare jashan mana rahe the. Changez Khan ko andhere mein bhaagne ka mauqa mil gaya.wo darya mein kood parha aur faraar hone mein kamiyab ho gaya. Changez Khan ki shadi Konkirat qabila ke sardar ki beti Borta se hui, jo apne sath jahaiz mein sirf aik siyah reech ki khaal laai thi.

Djamuka Changez Khan ka doodh shareek bhai aur gehra dost tha, phir dono ke talluqaat kashida ho gae. Djamuka se qataa talluq ke forum bad Temujin ko 1206 mein Mongolia ke sardaron ne apne khan hukmaran tasleem kar ke Changez Khan hukmaran aalam ka khitaab diya. Ab Changez Khan bila shirkat ghere Mongolia ka hakim ban gaya. Is ne apni askari taqat ki az sir nau tanzeem ki aur apne aap ko is qabil bana liya keg her mulki fatohaat ka silsila shuru kare. Changez Khan aur us ke lashkari haqiqi maeyno mein khunkhuwar the. Jab in ke sipahiyon ko pani ki qillat ka saamna hota to wo apni piyaas bujhane ke liye horse ki peeth par khanjar maar kar khoon choos lete aur is tarah apni piyas bujhate the. Changez Khan 1205 mein Tangut ki mumlikat par hamla aawar hua. Yeh area yellow river ke kinare waqey tha. 1211 se 1215 tak yellow river ke shumal ka sara area is ke qabze mein aa chukka tha. Changez Khan ne cheeni shehansha ke saamne apne challenges pesh kiye, jo us ne manzoor kar len, apni beti ki shadi Changez Khan se kar di aur khiraaj bhi adaa kiya.

Saltanat Khuwarizmi ke chand musalman tajir Tataar gae. Un ki wapsi ke mauqe par Changez Khan ne apne kae so aadmi un ke sath kar diye aur Alauddin Mohammad Khwarizmi Shah ko peghaam bheja key eh log aap ke mulk mein khareed o farokht karenge, taa ke dono mulkon ke mabain kher sagali ke talluqat ki bunyad parh sake. In tajiron par Khwarizmi Shah ke sarhadi Hakim Ghair Khan ne sakhti ki aur anjaam par ghaur kiye bagher maal o zabt kar ke un ka qatal karwa diya. Is par Changez Khan ne Khuwarizmi Shah ko kehalwa bheja ke wo Ghair Khan ko qasaas ke liye us ke hawale kar de. Khuwarizmi Shah is par aamadah na hua, bal ke Changez Khan ke qaasid ko qatal kara diya aur is ke baqi hamrahiyon ki moustaches, beard, hair aur eye brows mundwa kar aur un ka mou kala kar ke Changez Khan ke paas bhijwa diya. Changez Khan us waqt sooraj ki parastish kar raha tha. Us ne apne aadmiyon ki yeh kefiyat dekhi to taish mein aa kar kaha, “ Jab us falak laazawal par 2 aftaab nahi ho sakte to is zameen par bhi 2 khaqaan nahi honge… ab main rahonga ya phir Khuwarizmi Shah ”.

Alauddin Mohammad Khuwarizmi Shah, Changez Khan ka muqabla na kar saka. Wast Asia par Mongolon ka qabza hona chala gaya. Bulkh, Bukhara, Samarqand khaak ka dher ban gae aur Khuwarizmi Shah Bahria Khizar ke island mein gumnami ki maut mara. Alauddin Mohammad Khuwarizmi Shah ke bad is ka zeerak beta Sultan Jalaluddin Mohammad Khuwarizmi Shah Mongolon se nabard aazma raha. Changez Khan ne khud is ka taaqub kiya. 1221 mein sindh river ke kinare Changez Khan ne use 3 atraaf se ghere mein le liya. Ise tawaqqa thi kea b maut se bachne ke liye Jalaluddin Khuwarizmi Shah hathiyar daal de ga aur jaan bakhshi ki darkhuwast karega, lekin wo qabil fakhar sipa salaar apni zindagi ki parwah na karte hue ghore samait sindh river mein kood parha aur barhi tezi se tairta hua nikal gaya. Changez Khan yeh manzar dekh kar dam ba khud reh gaya aur apne beton se mukhatib ho kar kaha, “ Har Baap Ka Beta Aisa Hona Chahiye ”.
Changez Khan ne apne chote bete Tulai ko Khurasaan ki taskheer ke liye rawana kiya. Tulai ne Marv ke maqaam par 7 lac mard, aurtein aur bache maut ke ghaat utare. Baaz morikh qatal hone walon ki tadaad 13 lakh batate hain. Nishapur k taskheer ke waqt us ne yeh hokum diya, “ Shehar ko is tarah se barbaad kiya jae ke is ki zameen par hull chalaya ja sake aur inteqam is tarah liya jae ke billi aur kutte tak zinda na bache ”. Bad azaa Changez Khan ke potey Halako Khan ne 1258 mein Baghdad par hamla kar ke is markaz e ilm o funn ki eint se eint baja di aur whan tareekh ke sab se bhiyanak qatal aam ka bazaar garam kiya. Is ka yeh hamla saqoot Baghdad ke sath sath Abbasi Khilafat 753 taa 1258 ke zawaal ka baiys bhi bana.

Changez Khan apne daur ka aala administrator tha. Is ne mongolon ke liye aik qaumi jhande ki tashkeel ki, jis mein 9 bunyadi qabaiyl ko zahir kiya gaya. Jhande ka color white aur us ke darmiyan mein siyah chand tha. Changez Khan ke apne khaas muhafizeen ki tadaad 10,000 thi. In ka intekhab qabaiyli ashrafiya ki aulad mein se kiya jata hai. Lashkaron ki askari tarbiyat aur fauji chaalon ki mashq shikar ki soorat mein ki jati thi. Changez Khan ne aeham farameen aur waseeqon par mohrein lagane ka farmaan bhi jari kiya aur is silsile mein mohardar ka auhda qaiym kiya. Us ne baqaida dewaan ka aihtemaam kiya, jis mein Mongolon ke ilawa Iranian aur Chinese mulazim bhi the. Umoor mumlikat se mutalliq aeham dakhli aur kharji muaamlaat dewaan mein tey paate the. Changez Khan ne umoor e saltanat se mutalliq qawaid o zawabit bhi tarteeb diye. Wo kaha karta tha ke, “ Har wo shakhs jo aik gahr ki dekh bhaal kar sakta hai. Pori saltanat ke karobar ko bhi chala sakta hai ”.

Changez Khan Shamni Ism ka perokaar tha. Wo mukhtalif mazahib aur adiyaan ke ulmaa se guft o shunaid karta tha. Bukhara pohancha, wahan ke musalman ulmaa ko talb kar ke un se mazhabi masaiyl par guftugo ki, jo malomaat un logon ne beham pohanchae. Un se Changez Khan bohat khush hua. Musalman tajiron ko us ne maraat den, wo tijarti talluqat qaiym rakhne ko bohat aehmiyat deta tha. Changez Khan ne hokum diya ke shuaair islami par azaadi se amal kiya ja sakta hai. Jo us waqt tak mashraqi aur maghrabi Turkistan mein mamnoo the. Ab sab jagah azaan di jane lagi. Changez Khan kafir hote hue bhi rawadaar tha. Apne lutf o karam se khuwaas o awaam ki diljooi karta. Changez Khan janta tha ke bazam ka aaiyn kiya hota hai aur yeh bhi samjhta tha ke rizam mein kis cheez ki zaroorat hoti hai. August 1227 mein Changez Khan ne is daarfani se kooch kiya.

Ibne-Safi Benazir Bhutto Ahmed Nadeem Qasmi
Karachi Shahbaz Sharif Parveen Shakir

 

 

 

 

@Copy right 2012-2014 www.urdubiography.com