Welcome to Urdubiography
Home >> Pak History >> Roll of All India Muslim Leauge In The Creation of Pakistan  

 

 

The Role of All India Muslim League In The Creation of Pakistan

Early years of 20th century, the political situation and behavior of congress affected the Muslim Leaders in Hindustan. Then Muslim Leaders felt the separation of political organization of Muslim rights. Quaid e Azam Muhammad Ali Jinnah attempted a big role in the creation of Pakistan. He was such a Great leader, who supported Pakistani for the separation of Pakistan. After the huge endeavor, Muslim achieved the Pakistan in 14 August 1947 with great support and Travail of Quaid e Azam Muhammad Ali Jinnah. In this page, we are telling you about the role of all India Muslim Leagues in the Creation of Pakistan.

Qiyam e Pakistan Mein All India Muslim League Ka Kirdar

Barre Sagheer ke siyasi halaat aur congress ke rawaiye ne Musalman rehnumao ke andaz o fikar ko be had mutassir kiya aur in ke zehno mein Muslim huqooq ki hifazat ke liye aik alehda siyasi tanzeem ki zarorat ka aehsaas shiddat se ubharne laga. Alehda tanzeem ke qayam ke liye musalmano ko kae marahil se guzarna parha. Taqseem Bengal ke khilaf hindoun ki hangama aaarai ke raddeamal ke taur par sar karda musalman rehnumao par mushtamil aik wafd ne Sir Agha Khan soyam ki qiyadat mein 1 October 1906 ko Shimla mein Waesarae Hind Lord Manto se mulaqat ki aur un se musalmano ke huqooq o mafadaat ki nigehdasht ke liye darkhuwat ki. Shimla wafd, Hindustan mein muslim siyasat ki tareekh mein sang meyl ki hesiyat rakhta hai aur us wafd ki kamiyabi se he musalmano ko apni alehda siyasi tanzeem qaiym krne ki khuwahish ko barhi taqwiyat pohanchi.

Book “ Foundation of Pakistan ” ( part 1 ) mein all india muslim league ke iftetahi ijlaas ki tafseel beyan karte hue raqamtaraz hain ke 30 December 1906 ko Dhaka ke sabiq mashraqi Pakistan ke area Shah bagh mein all india muslim educational conference ko 4th day ke ijlaas mein jo khusosi taur par siyasi muaamlaat par behas se mutalliq tha aur jis ki sadarat Calcutta high court ke justice Shareef Uddin bahar kar rahe the, all india muslim league ki base rakhi gait hi. Is mauqe par Dhaka ke nawab Sir Saleem Ullah Khan ne apne mukhtasir khitab mein yeh tajveez pesh ki ke musalmano ki nae siyasi tanzeem ke liye aik chairman muntakhib kiya jaey aur is ke liye unho ne Nawab Waqar ul Malik Maulvi Mushtaq Hussain ka naam tajveez kiya.

Barrister Mazhar ul Haq bahar ne Nawab Sir Saleem Ullah Khan ki is tajveez aur chairman ke liye Nawab Waqar ul Malik ke naam ki taiyd ki. Phir yeh tajveez ijlaas ke shurka ke darmiyan voting ke liye pesh hui aur shurka ne bila muqabla Nawab Waqar ul Malik ko all Indai muslim league ke chairman ki hesiyat se muntakhib kar liya. Nawab Waqar ul Malik ke chairman muntakhib hone ke bad justice Sharf Uddin ne ijlaas ki sadarat Waqar ul malik ke hawale kar di.

All India Muslim League ke aghrz o maqasid mein se aik maqsad yeh beyan kiya gaya tha ke musalmanan e hind ke siyasi huqooq o mafadaat ki hifazat karna unhe aage barhana aur un ki zarorat aur tamannao ki hukomat ke samne adab se tarjumani aur niyabat karna. Muslim league ke dastoor ko wazaa karne ke liye 60 arkaan par mushtamil aik committee taseesi ijlaas mein muqarrar ki gai, jis ko 4 months ke andar andar dastoor banana tha. All india muslim league ka pehle dastoor Muhammed Ali Johar ne likha. Tanzeem ka markazi office Aligarh mein qaiym kiya gaya. All india muslim league ka pehla bazabta ijlaas 29, 30 December 1907 ko Karachi mein Sir Adamjee Pir Bhai ki sadarat mein munaqid hua. Isi ijlaas mein muslim league ka dastoor manzoor kiya gaya aur is ke aghraz o maqasid ka azsar nau taiyun kiya gaya. 18 March 1908 ko Aligarh mein Muslim league ka ijlaas munaqid kiya gaya. Jis ki sadarat Lahore ke justice Shah Din ne ki. Is ijlaas mein muslim league ke auhdedaron ka intekhab amal mein aya, jis ke tyehat sir agha khan soyam ko muslim league ka sadder aur Syed Hassan Bilgarami ko aezazi secretary muntakhib kiya gaya. Is tarha Hindustan ki siyasi zindagi mein muslim league ki sargarmiyon ka aaghaz hua.

Dastoor ki manzori aur intekhabi amal ki takmeel ke bad all india muslim league ka dosra salana ijlaab 30 December 1908 ko Amritsar mein Sir Syed Ali Imam Bahar ki zeyr e sadarat munaqid hua. Aur Sir Ali Imam ne apne khutba sadarat mein musalmano ke liye judagana intekhab ki aehmiyat par zor diya, jise 1909 mein Lord Manto ne Hidnustan mein aaiyni islahaat pesh karte hue tasleem kar liya. Isi judagana intekhab ke usool ki bunyad par Pakistan ka qayam amal mein aya. Karam Haideri apni tasneef Millat Pasbaan page no.59 mein likhte hain. 1909 ki islahat ne musalmano ke dilon mein musarrat ki lehar daura di thi. Kyun ke un ki rau se un ke judagana intekhabat ke rules ko tasleem kiya gaya. Phir bhi bohat se log aise the jo use sahi nahi samajhte the. Aise logon mein sab se numayan Muhammad Ali Jinnah the. Judagana intekhab ke mutalliq in ka rawaiyya muslim league ke rehnumao se bilkul mukhtalif tha. Chunache 1910 mein Muhammad Ali Jinnah ne congress ke salana ijlaas mein aik qarardaad pesh ki. Jis mein judagana tareeq intekhab ki sakht mukhalfat ki gai. Isi zaman mein mister Jinnah apni raey par itni shiddat aur mazboti se qaiym the, ke congress ne waesarae ke samne apne jamati nuqta nazar ko pesh karne ke liye jo wafd murattab kiya, us mein shamoliyat ke liye un ko bhi muntakhib kar liya gaya.

1913 mein all india muslim league ka salana ijlaas lukhnow mwin munaqid hua. To muslim league ne apne dastoor mein tarmeem ki aur taaj British ke zeyr e saya Hind ke liye mauzoo hukomat khud ikhteyari ke nizaam ko apna nasb ul aeyn qarar diya. Quaid e Azam ki anthak koshishon ki buniyad par muslim league aur congress ke darmiyan 1916 mein Mesaaq lukhnow tey paya. Jis mein congress ne pehli bar musalmano ka judagana haq niyabat tasleem kiya. Yeh pehla aur aakhri mauqa tha, jab dono jamaton ne aik he aaiyni masooda par ittefaq kiya aur dono ne jang e azeem awwal ke forum bad hukomat khud ikhteyari ka mushtarka mutalba kiya.

Congress ne Hindustan ke liye aaiyn murattab karne ke gharz se aik kul jamati conference talb ki, jis ke natijey ke taur par moti laal nehro ki sarbarahi mein aik committee qaiym ki gai. Jab us committee ki report nehro report ke naam se manzar e aam par aai to musalmano ko aehsaas hua ke in ke tamam mutalbaat nazar andaz kar diye gaey hain. Yahan tak ke is report mein judagana tareeq intekhab ki jagah makhlot tareeq intekhab ki sifarish ki gai thi. Chunache is ke jawab mein March 1929 mein Quaid e Azam Muhammad Ali Jinnah ne apne famous 14 nukaat pesh kiye. December 1930 mein all india muslim league ka salana ijlaas Illahbad mein munaqid hua. Jis mein Doctor Allama Muhammad Iqbal ne apne tareekhi khutba sadarat mein musalmano ke nasb ul aeyn ki aaiynda jhalak dikhai. 1935 ke india aket ki aamad se musalmano ke apni safoo ko azsar nau aarasta karne ki zarorat mehsoos ki. Allama Iqbal aur muslim league ke rehnumao ne Muhammad Ali Jinnah se darkhuwast ki ke wo Englistan se wapis aakar musalmano kirehnumai karen. Chunache 1934 mein Hindustan wapis aa gaey aur muslim league ko munazzam karne mein masroof ho gaey. Isi dauran Muhammad Ali Jinnah ko all india muslim league, congress ke muqabley mein siyasi taur par bohat piche thi. Muslim league na sirf mali taur par kamzor thi bal ke is ke pas koi propaganda machinery bhi nahi thi. Is liye nehro kaha karta tha ke muslim league amraa ki jamat hai.

1937 ke soobai assemblies ke intekhabat mein muslim league ne koi qabil e zikar karnama sir anjaam nahi diya tha, lekin in intekhabt ke natijey mein jab congress ne 7 provinces mein wazartein hasil ki to apne dhai saala daur e hukomat mein musalmano ko is qadar pareshan kiya ke congress se wabasta tamam tawaqquat aur khushfehmiyan khaak mein mil gai. All india muslim league ke 25 salana ijlaas October 1937 mein lukhnow mein munaqid hua. Is ijlaas mein muslim league ne pehli bar Hindustan mein azaad jamhori riyasaton par mushtamil aik wafaqi hukomat ko apna maqsood nazar qarar diya. Isi ijlaas ki buniyad par muslim league ki nashat ul sania hui aur pore mulk mein musalman apne aap ko bahesiyat qaum munazzam karne lage. Door daraz shehron aur qasbon mein bhi muslim league ki branches qaiym ho gai aur muslim league ki maqboliyat mein bepanah izafa hua.

December 1938 mein all india muslim league ka 26 salana ijlaas Patna mein munaqid hua aur yeh muslim league ka pehla awami ijtemaa tha. Soobai muslim league bahar ke sadder Barrister Syed Abdul Azeez istaqbaliya committee ke chairman the aur unho ne apni iftetahi taqreer mein Muhammad Ali Jinnah ko Quaid e Azam ke khitab se nawaza aur Punjab ke aik muslim league razakar Mian Feroz Uddin ne jalsagaah mein Quaid e Azam Zindabad ka naraa buland kiya jo bad mein sare Hindustan mein famous ho gaya. Patna ke ijlaas mein all india women muslim league ki buniyad rakhi gai. All india muslim league ke ijlaas ke bad barrister Syed Abdul Azeez ne Patna mein aik jalsa aam talb kiya, jis ki sadarat Sardar Aurangzeb Khan ( Sabiq wazeer e aala Soba e sarhad ) ne ki. Nawab Bahadur Yar Jang all india riyasati muslim league ke pehle sadder muntakhib hue.

Dosri jang e azeem ke aaghaz par muslim league ne Quaid e Azam Muhammad Ali Jinnah koyeh ikhteyar de diya ke wo musalmano ki taraf se british ko jang mein himayat o taiyd ka yaqeen dilaey, bashart yeh ke unhe bhi apne mutalbaat ke barey mein yaqeen dilaya jaey. Dosri taraf congress working committee ne british government ke behavior ke khilaf bataur aehtejaaj 7 provinces mein qaiym apni Dhai saala congress ki wazarton ko mustafi hone ka hukum de diya. Is mauqe par Quaid e Azam ne musalmanan e Hind se appeal ki ke wo Yom e Nijaat manaey, chunache muslim league ne jalsey munaqid kiye aur juloos nikale. 1939 ke khatmey ke sath he Hindo muslim ittehad ki tamam koshishen nakaam ho chuki thin aur yeh bat wazeh ho chuki thi ke Hindu aur musalmano ke liye mushtarka taur par hukomat Hind ki zimmedari sambhalna na mumkin hai. Halaat ne musalmano ko bhi yeh sochne par majboor kar diya tha. Ke wo apne liye aik alehda aur azaad watan ka mutalba karen. Jahan wo apne tarz e hayat ke mutabiq zindagi basar kar sakenge, kyun ke musalman har lihaz se aik alehda qaum hain.

Musalmano ke isi andaz o fikar ki bunyad par March 1940 mein all india muslim league ka 27 salana ijlaas Quaid e Azam ki zeyr e sadarata Lahore mein munaqid hua, jis mein qarardaad Lahore manzoor ki gai, jise bad mein qarardaad e Paksitan ke naam se mausoom kiya gaya. Britidh hukomat ne Hindustani leaders se baat cheet karne ke liye aik wafd 1942 mein Sir Shepherd Cripps ki zeyr e qiyadat Hindustan bheja jis ne aik aisa manzoba pesh kiya, jis mein musalmano ke liye aik alehda watan ka mubham sa khaka maujood tha, magar muslim league ne ise na manzoor kar diya aur congress ne bhi is manzobeu ko manzoor nahi kiya. 1943 mein muslim league ne Sarhad, Bengal, Sindh aur Aasaam mein hulomat bana li thin. Muslim league ki quwwat mein itna izafa ho chukka tha ke musalmanan e hind ki wahid numaiyda jamat hone ka dawaa kar sakti thi.

September 1945 ko waesarare hind ne aelaan kiya ke Hindustan mein aam intekhabat jald munaqid honge aur hukomat british Hindustan ko jald azaadi den eke liye yahan ke rehnumao se baat cheet karegi. Yeh aam intekhabat muslim league ke liye zindagi aur maut ki aehmiyat rakhte the. Is liye ke ise ab yeh sabit karna tha ke sirf wahi musalmano ke jazbat o aehsasaat ki akasi karti hai. Muslim league ne un intekhabat mein Pakistan ke Nasb ul aeyn ki buniyab par hissa liya. 1945-46 ke un intekhabat mein use azeem ul shaan fatah hasil hui aur muslim league ne musalmano ke taqriban 88 % vote hasil kiye. Muslim league ne is shandar kamiyabi par 11 January 1946 ko yom e fatah manaya. Wazaraten banane ka marhaloa abhi bamushkil tey hua tha ke british hukomat ne cabinet mission bheja jis ka maqsad congress aur muslim league ke mashware se Hindustan ke mustaqbil ka faisla karna tha. 16 may 1946 ko cabinet mission ne apne faisle ka aelaan kiya, jise baadal nakhuwasta muslim league ne manzoor kiya aur congress ne bhi ise manzoor kar liya, lekin congress bad mein apne mauqiff se hat gai. Is soortehaal se muslim league ke leaders ko sakht mayosi hui aur phir muslim league ne bhi himayat se dast bardari ka aelaan kar diya.

September 1946 mein congress ne abori hukomat mein shamoliyat ikhteyar kar li aur phir congress aur muslim league mein aik muaaehda ki bunyad par muslim league bhi aboori hukomat mein shamil ho gai. April se May 1947 ke darmiyani arsey mein waesarae Hind lord Mountbatten, congress aur muslim league ke darmiyan taweel muzakrat ka silsila jari raha. Agarcha Mountbatten yeh maqsad le kar aya tha ke muttehda Hindustan ko azaadi muntaqil kijae.lekin muzakraatne yeh sabit kar diya ke taqseem hind ke siwa muslim league ke liye koi bhi dosra marahil qabil e qabool nahi, chunache british ke wazeer e azam lord atley ne Hindustan mein inteqal iqtedar ke tariqaekaar ka aelaan kar diya. Is aelaan ke mutabiq Hindustan ko do hisson mein taqseem kiya jana tha. 3 June 1947 ki sham ko all india muslim radio dehli se waesarae hind lord mount batten ne taqseem hind ka aelaan kiya. Is mauqey par pandit nehro aur Quaid e Azam Muhammad Ali Jinnah ne bhi all India radio dehli se taqreer ki. Pandit nehro ne apni taqreer ke aakhir mein hasb e adat jiye hind ke naara lagaya. Chunache Quaid e Azam ne bhi apni taqreer ke aakhir mein Pakistan Zindabad ka naara lagaya aur Quaid e Azam ke naarey ke sath he mulk ke tool o arz mein Paksitan zindabad ke naarey buland hue aur tamam barre sagheer ke musalmano ke dilon mein khushi ki aik lehar daur gai. Taqseem hind ke aelaan ke mutabiq Hindustan ko do hisson mein taqseem kiya jana tha. Muslim aksaryati areas par mushtamil hisse ko Paksitan ka naam diya gaya aur all india muslim league ko is nae watan ki hukmarani ka haq hasil hua. Muslim league ki taweel tareen jaddojehad ke bad musalmanan e hind ko aik alehda muslim riyasat Pakistan 14 August 1947 ko hasil hui.

Quaid-e-Azam Liaquat Ali Khan Fatima Jinnah
Zulfiqar Ali Bhutto Major Aziz Bhatti Shaheed Abdul Sattar Edhi

 

 

 

 

@Copy right 2012-2014 www.urdubiography.com