Welcome to Urdubiography

 

 

Chaudhry Khaliquzzaman

Chaudhry Khaliquzzaman was born on 25 December 1889 in Mazarpur Lukhnow. He belonged to very venerable family. Chaudhry Khaliquzzaman was a Pakistani political leader. He was one of the best leaders of all India Muslim leagues. Chaudhry Sahib was the first president of Pakistan Muslim League, then for the short time period he worked as a Governor of eastern Pakistan. After that he served as a delegator of Pakistan in Indonesia and Philippine. Chaudhry Khaliquzzaman started his early education in Lukhnow, then he admitted in Aligarh College in 1907 and completed his education in 1916. He received the degree of LLB in Aligarh University and then started the deputation. Chaudhry Khaliquzzaman published a book of Path Way 2 Pakistan. Famous scientist Doctor Saleemuzzaman Siddiqui Late was a Brother of Chaudhry Khaliquzzaman. Chaudhry Khaliquzzaman died on 18 May 1973 in Karachi.

Chaudhry Khaliquzzaman Biography

Barre Sagher Pak o Hind ki siyasi tareekh mein Chaudhry Khaliquzzaman ka naam belos aur sargaram karkun ki hesiyat se maroof hai. Tehreek e Pakistan mein aap ne nihayat numayan role adaa kiya. Chaudhry Khaliquzzaman 25 December 1889 ko Mazarpur Lukhnow ke aik muazziz gharane mein peyda hue. Ibtedai taleem lukhnow mein he hasil ki. Is ke bad mazeed taleem ke liye 1907 mein Aligarh College mein dakhil hue aur 1916 mein aala taleem mukammal ki. LLB ki degree Aligarh University se hasil karne ke bad wakalat shuru kiya. Chaudhry Khaliquzzaman ne talib e ilmi he ke zamane se kae tehreekon mein hissa lena shuru kar diya tha. Jang balqan ke waqt barresagher pak o hind ke musalmano ki tamam tar hamdardiyan Turkey ke musalamno ke sath thin. 1911 mein Italy ne saltanat usmaniya Turkey ki baaz riyasaton par hamla kiya. Turkish peoples ki himayat mein Hindustan bhar mein chanda jamaa karne ki mohim ka aaghaz hua aur aik tibbi wafd 1912 mein Turkey bheja gaya. Jis ki qiyadat Doctor Mukhtar Ahmed Ansari kar rahe the. Is tibbi wafd mein Aligarh ke 4 students Chaudhry Khaliquzzaman, Abdur Rehman Siddiqui, Shoaib Qureshi aur Abdur Rehman Pishawari shamil the. Yeh tibbi wafd Hindustan ke musalmano ki janib se jazba hamdardi, ukhuwwat aur musalmano ke jazbat o ehsasaat ki tarjumani aur numaiyndegi ke sath sath zakhmiyon ki amli madad aur tawwun ke liye Turkey gaya tha. Chaudhry Khaliquzzaman is tibbi wafd mein taqriban 2 saal tak aik member ke taur par shamil rahe.

1916 mein Aligarh University se farigh ul tehseel hone ke bad Chaudhry Khaliquzzaman ne aal india congress mein shamoliyat ikhteyar ki. Is ke sath he all india home role league se bhi wabasta rahe. Aap ibteda mein hindu muslim ittehad ke daai the. Lekin taweel tajurbon ke bad jab unhe yeh ehsaas hua ke congress sirf hindoun ki jamaat hai to unho ne congress se istefaa de kar all india muslim league mein shamoliyat ikhteyar ki. Chaudhry Khaliquzzaman sahib ne July 1917 mein Bombay mein munaqid hone wale home role league ke aik ijlaas ki sadarat bhi ki aur is mein aik hukomat khud ikhteyari ke mutalbey par zor diya. Aap ko lukhnow congress committee ka sadar bhi banaya gaya tha. December 1916 mein all india congress aur all india muslim league ke darmiyan tey pane wale muaaeyhde “ Meesaq Lukhnow ” ki tayyari aur manzori ki khatir Chaudhry Khaliquzzaman ne all india congress ki janib se musalmano ke liye aeham kirdar adaa kiya. Muaaeheda lukhnow ke bad wo lukhnow municipal board ke chairman bhi muqarrar ho gaey the.

1919 mein jab barresagher mein tehreek khilafat ka aaghaz hua to us waqt Chaudhry Khaliquzzaman bahesiyat Lawyer, sarkari adalat se wabasta the. Unho ne tehreek khilafat mein nihayat sargarmi se hissa liya aur sarkari wakalat se bhi dastbardari ikhteyar kar li. Is ke sath he wo tehreek khilafat ke lukhnow ke aik be had mustad karkun ban gaey the. Wo 1919 se 1926 tak muslim league ke joint secretary rahe. Bad azaa muslim league parliament board UP ke karkun ho gaey. All india muslim league ke 15th annual ijlaas munaqada 1924 Lahore mein hukomat hind ke liye naya aaeyni formula banane ke liye aik committee banai gai jis ke membrane mein Quaid e Azam Mohammed Ali Jinnah, Maulvi Fazal ul Haq, Sir Raza Ali ke ilawa Chaudhry Khaliquzzaman bhi shamil the. December 1928 mein congress se muzakrat ke liye jo wafd tashkeel diya gaya, wo us ke rukun the.

June 1938 mein all india muslim league working committee ka qiyam amal mein aaya tha aur wo un 22 afraad mein shamil the. Jo is committee ke rukun namzad hue the. All india muslim league ki beshtar qarardadon aur tajveezon ki tayyari mein Chaudhry Khaliquzzaman ne aeham khidmaat anjaam den. All india muslim league ke salana ijlaas munaqada Lahore 23rd March 1940 mein Maulvi Fazal ul Haq ne qarardad Lahore pesh ki ( jo bad mein qarardad Pakistan ke naam se mausoom hui ) to aap ne sooba e UP ki numaiydegi karte hue sab se pehle is qarardad ki taiyd ki. April 1924 mein Quaid e Azam ne aik committee ke qiyam ka aelaan kiya tha, jo musalmano ke nasb ul aeyn aur un ki manzil e maqsood ke hawale se har haftey report dene ki pabandi thi. Is committee ke Nawab Mohammed Ismail Khan president the. Khuwaja Nazim Uddin, Qazi Mohammed Essa, Chaudhry Khaliquzzaman ko bahesiyat arkaan shamil kiya gaya tha. Is committee mein shamoliyat aur muslim league working committee mein rehte hue inho ne husool e Pakistan ke liye agar anqadar khidmaat anjaam den aur us dauran mein Quaid e Azam ke aik matamad sathi ke taur par kaam kiya.

Qiyam e Pakistan ke chand maah bad Chaudhry Khaliquzzaman hijrat kar ke Pakistan aa gaey. Quaid e Azam ki wafaat ke bad all Pakistan muslim league ke nazim muqarrar kiye gaye aur phir 1949 mein us ke sadder bane, lekin 1 year bad he is auhdey se mustafee ho gaey. Wo mukhtasir muddat ke liye sabiq mashraqi Pakistan ke Governor bhi rahe. Is ke bad Indonesia aur Philippine mein Pakistan ke safer muqarrar hue. Wo sabiq president Pakistan Mohammed Ayub Khan ke haami the. Apni yad’dashton ki bunyad par azaadi ki jaddojehad aur tehreek e Pakistan par English mein aik kitab ba unwaan “ Path Way 2 Pakistan ” murattab ki jis ka tarjuma “ Shahrahe Pakistan ” ke naam se shaey hua. Famous scientist Doctor Saleemuzzaman Siddiqui marhoom aap ke Bhai the. Chaudhry Khaliquzzaman ne 18 May 1973 ko Karachi mein wafaat paai.

More Links

 

 

 

 

Copy right 2012-2014 www.urdubiography.com