Welcome to Urdubiography

 

 

Ibrahim Ismail Chundrigar

Ibrahim Ismail Chundrigar was born on 15 April 1898 in Ahmedabad (India). That time Ahmedabad involved in Bombay residency. I.I.Chundrigar received his early education in the School of Ahmedabad and after the college education, he came in Bombay University. He was a very intelligent student of Bombay University. Ibrahim Ismail Chundrigar received his B.A. and LLB degree from Bombay University. After his education, he returned Ahmedabad and practiced his LLB education. He did the occupation of lawyer till 1920 to 1937 in Ahmedabad and till 1937 to 1946 in Bombay high court. Ibrahim Ismail Chundrigar died on 26 September 1960. In this page, you can see the information about Ibrahim Ismail Chundrigar.

Ibrahim Ismail Chundrigar

Ibrahim Ismail Chandrigar Photo

Ibrahim Ismail Chundrigar 15 April 1898 ko Ahmadabad, India mein peyda hue. Us daur mein Ahmadabad Bombay residency mein shamil tha aur use soobey mein aik khas maqam aur aehmiyat hasil thi. Ibrahim Ismail ne apni ibtedai taleem Ahmadabad ke school mein hasil ki aur college ki taleem ke baad Bombay University mein aa gaey. Ibrahim Ismail Chundrigar Bombay University ke nihayat zaheen talba shumar kiye jate the. Ibrahim Ismail Chundrigar ne isi University se BA, LLB tak taleem hasil ki. Bombay se law ki degree hasil karne ke bad I.I.Chundrigar, Ahmadabad wapis aa gaey the aur isi shehar mein unho ne practice shuru ki thi. 1920 se 1937 tak Ahmedabad mein aur 1937 se 1946 tak Bombay high court mein lawyer ka pesha kiya. Wakalat ke is zamane mein I.I.Chundrigar barhi zihanat ke sath mukhtalif muqaddamaat ki pervi karte rahe the. Us dauran unhe kae kohna mushq aur tajurbakaar qanoondaano se milne ka ittefaq hua. Ahmadabad ke musalman barhe pur josh aur mili jazbey se sarshar the. Ibrahim Ismail ka dil bhi isi jazbey se mamoor the. Ibrahim Ismail Chundrigar ne samaji kaamon mein hamesha numayan hissa liya. Aap ko 1924 se 1937 tak Ahmadabad municipal corporation ke member ki hesiyat se shehri masaiyl hal karne aur awaam ki khidmat karne ka mauqa mila. Musalman talba o taalbat ke liye taleemi sahulton mein izafey ka Ibrahim Ismail Chundrigar ko be had khayal tha. Chunache Anjuman High School Ahmedabad education society ke secretary rahe aur dosri falahi anjumano mein bhi dilchaspi lete the.

Muslim league ke salana ijlaas 1916, 1924 aur 1936 mein Bombay mein munaqid ho chuke the aur in ijlaason ke hawale se aal india Muslim league ki karkardegi, is ke maqasid aur is se wabasta rehnumao ke khayalat musalmanan e hind ke samne khul kar aa chuke the. Chunache I.I.Chundrigar ne 1936 mein baqaiyda taur par aal india Muslim league mein shamoliyat ikhteyar kar li. February 1937 mein unhe all india Muslim league ke ticket par sooba e Bombay ki qanoonsaaz assembly ke intekhabat mein zilaa Ahmadabad ke dehi ilaqa ki nashist se rukun muntakhib kiya gaya aur aap Ahmadabad se Bombay muntaqil ho gaey. Ibrahim Ismail Chundrigar isi halqey se dobara 1946 mein bhi muntakhib hue. I.I.Chundrigar 1938 se 1945 tak Bombay assembly mein Muslim league assembly party ke deputy leader rahe, is ke ilawa aap 1938 mein Bombay Muslim league ke president bhi muntakhib hue the aur is mansab par 1945 tak faiyz rahe. Yeh aohda aap ke liye barha aezaaz tha, kyun ke Quaid e Azam Mohammed Ali Jinnah bhi Bombay Muslim league ki aik branch ke aeham rukun the. I.I.Chuindrigar 1943 se 1947 tak all india Muslim league ki majlis aamla ke rukun bhi rahe the.

Ibrahim Ismail Chundrigar ke zaati hesiyat mein Muslim zamaa hind ke sath talluqat bhi khushgawar the. Aap ne barresagher pak o hind ke barhe barhe matmool musalmano se bhi behtar rawabit qaiym kar rakhe the. Unhi rawabit ke hawale se April 1944 mein Quaid e Azam ne I.I.Chundrigar ko aik maktoob mein likha tha, ke wo Muslim league ke baaz logon ka tawwun aur in ki sarparasti hasil karen. Quaid e Azam ne apne khat mein is Amar ka bhi izhaar kiya tha ke wo Habib Bank ke Mohammed Habib ya Hashim Prem Ji se yeh daryaft kar len ke aaya wo Muslim league ki planning committee ke liye apni khidmaat dene ke liye tayyar ho sakte hain ??? bad aza is program ke tehat I.I.Chundrigar ne aeham khidmaat anjaam den.

March 1940 mein aal india Muslim league ka 27th annual congress Lahore mein munaqid hua. Is ijlaas mein I.I.Chundrigar ne Bombay ke musalmano ki numaiydegi aur tamam amoor mein nihayat pur josh hissa liya. Qarar daad Pakistan ki taiyd karte hue I.I.Chundrigar ne kaha ke “ Qarardaad mein jo scheme pesh ki gai hai, wo har zawiye se munsifana, munasib aur mauzoo hai. Musalman kisi bhi halat mein aik aesi majlis dastoorsaazki tajveez ki himayat par tayyar nahi, jis ki roa se musalman aik aur teen ki nisbat se aik aqliyat ban jaey. ” isi qaradad ke hawale se all india Muslim league ki majlis aamla ko aisa aaiyni mansoba murattab karne ki zimmedari saunpi gai ke jis ki roa se mazkora ilaqon ko bil aakhir kuli ikhteyaraat hasil ho jaeyn. Maslan difaa, amoor e kharja, mawaslaat, mehsolaat aur deegar aise amoor jo zarori samjhe jaey, chunache is maqsad ke liye jo committee bani, us mein bhi I.I.chundrigar shamil the.

1945-46 ke intekhabaat ke bad jab aal india Muslim league ne aboori hukomat mein shamoliyat ki dawat ko qabool kar liya to I.I.Chundrigar bhi Quaid e Azam ke namzad wuzraa mein se aik the. 14 October 1946 ko all india Muslim league ki working committee ne Liauqat Ali Khan, Ibrahim Ismail Chundrigar, Raja Ghazanfar Ali Khan, Sardar Abdur Rab Nashtar aur Jogandarnath Mandal ke naam bhijwaey, jise waesarae hind ne qabool karte hue un ke supurd wazartein aur mehakmey kar diye. I.I. Chundrigar October 1946 se 1947 tak abbori hukomat ke wazeer e tijarat rahe aur aap ne wazarat ke faraiyz ko ahsan tariqey se anjaam diya.

I.I.Chundrigar ne Muslim league ke leader ki hesiyat se tehreek e Pakistan mein nihayat fa’aal kirdar adaa kiya. 14 August 1947 ko jab Pakistan mariz wajood mein aya to I.I.Chundrigar ko wazeer tijarat o sanat muqarrar kiya gaya, wo is auhdey par 1948 tak faiyz rahe. 1948 – 49 mein Afghanistan mein Pakistan ke safer rahe. 1950 se 1951 tak aap soobey sarhad ke Governor rahe aur phir 1951 se 1953 tak Punjab ke Governor rahe. Ibrahim Ismail Chundrigar 1955 - 56 mein wazeer e azam Chaudhry Muhammed Ali ki markazi kabeena mein wazeer e qanoon rahe aur 1956 ke aaiyn ka masooda tayyar kiya. 17 October 1957 ko Ibrahim Ismail makhloot hukomat mein Pakistan ke 6th wazeer e azam ban gaey. Magar rules ki bunyad 16 December 1957 ko wazarat uzmaa se istefaa di diya. Aap ne Quaid e Azam se tarbiyat hasil ki thi aur Quaid e Azam ki usool pasandi Muslim thi. Yehi nuqta Ibrahim Ismail Chundrigar ne Quaid e Azam se seekha aur isi par karband rahe. Quaid e Azam ko bhi Chundrigar ki shakhsiyat par mukammal aitemad Ibrahim Ismail Chundrigar ne 26 September 1960 ko Karachi mein wafaat paai.

More Links

 

 

 

 

Copy right 2012-2014 www.urdubiography.com