Welcome to Urdubiography

 

 

Abdul Qayyum Khan

Khan Abdul Qayyum Khan Photo

Abdul Qayyum Khan was a charismatic leader. He was born on 16th July 1901 in Chitral. Khan Abdul Qayyum Khan received his early education from Peshawar and Aligarh, then he gone to London school and received the degree of economics. In 1926 he passed barrister and started advocacy in Peshawar. Abdul Qayyum Khan started politics from the platform of all India National Congress, but after that he contributed in Muslim League. He was a great and bold politician. Khan Abdul Qayyum Khan died on 22nd October 1981 in Islamabad caused heart attack at the age of 80 years. In this page you can see the information about Khan Abdul Qayyum Khan.

Khan Abdul Qayyum Khan History In Urdu

Ba roob aur pur kashish Khan Abdul Qayyum Khan ko paidaishi leader kaha jae to mubalgha na hoga. Wo karishmati shakhsiyat ke malik the aur Pakistan mein choti ke aise gine chune politicians mein shumar hote the, jin ki taraf log khinche chale aate hain. Abdul Qayyum Khan ko in ke maddahon ki janib se “ Khan Aazam ” ka khitab bhi diya gaya tha. Jab 1958 ka marshal law nafiz hua to wo shohrat aur maqboliyat ki bulandiyon par the. Pakistan Muslim League ke president ke taur par inho ne aik hungama utha rakha tha.

Abdul Qayyum Khan 16 July 1901 ko chitral mein paida hue. Aala taleem Peshawar aur Aligarh mein hasil ki. Phir England ja kar London school of economics se degree li. 1926 mein barrister pass ki aur Peshawar mein wakalat shuru kar di. Inho ne politics ka aaghaz all india national congress ke platform se kiya tha. Lekin bad mein muslim league mein shamil ho gae.

Khan Abdul Qayyum Khan bala ke muntazim the. Qiyam e Pakistan ke bad inho ne sooba e sarhad ( maujoda Khyber Pakhtunkhuwa ) ki wazarat e aala sambhali aur kam o besh 6 saal tak is mansab par faiz rahe. Is dauran inho ne apni intezami salahiyaton ka loha manwaya. Peshawar university qaiym ki, schools ka jaal bichaya, urdu ko zariya taleem banaya, Warsak dam tameer kiya. Yahan tak ke tameer o tarraqi ke hawale se in ka naam mulk bhar mein gonjne laga. Wo intehai diyanatdar, lekin sakht mizaaj the. Siyasi mukhalfat ko bardasht kar lena…in ki lughat mein shamil nahi tha. Muslim league ke andar bhi inho ne apne mukhalfon ka nataqa band kiya aur bahar bhi in ke gird ghera tang kiye rakha. Khudai khidmatgaron ke jalse par firing kar ke darjano afraad ko bhoon dala gaya. Khan Abdul Qayyum Khan ke nazdeek dafa 144 ki khilafwarzi karta hua yeh ijtema gher qanooni tha. Khudai khidmatgaron par zameen tang karne wale Abdul Qayyum Khan taweel arsey tak in ke sathi rahe the. Wo congress ke ticket par markazi assembly ke rukun muntakhib hue aur wahan congress ke deputy parliament ke leader bhi muqarrar hue the. 1946 mein muslim league mein shamoliyat ikhteyar ki aur sooba e sarhad ke referendum mein barh charh kar hissa liya, yun muslim league mein apne apne jasse ke mutabiq jagah bana li, yani “ Hissa baqadar jassa…”

1959 ke awaiyl mein aam intekhabaat ka ineqaad hona tha. Muslim League ke “ neem murdah ghore ” mein jaan parh chuki thi aur wo farratey bhar raha tha aur khan sahib mausoof yun samjhiye ke hawa par sawar the. Republican party ke Feroz Khan Noon Prime minister the aur Iskandar Mirza sadar mumlikat ke mansab par mutmakin the. Kaha ja sakta hai ke yeh jamat is aehad ki muslim league Q thi. Us ne iqtedar ke aewano mein aankh kholi aur wahin parwarish paa rahi thi. Muslim league se toot kar iqtedar se jurhne walon ne is jamat mein panah le rakhi thi.

Pakistan Muslim League ne Sardar Abdur Rab Nashtar ki wafaat ke bad Khan Abdul Qayyum Khan ko apne sarbarah chun liya, aur yun khan sahib intekhabat jeetne ke liye maidan mein aa gae. Maghrabi Pakistan ( us waqt aaj ke charon soobey aik the ) mein to in ka danka baj he raha tha. Mashraqi Pakistan bhi in ki taraf mutawajja tha. Intekhabi jeet in ke darwaze par dastak de rahi thi, goya Pakistani siyasat nae karwat lene ka faisla kar chuki thi.

Khan Abdul Qayyum Khan 7 October 1958 ko juloos ki soorat mein Jhelum se Gujrat ja rahe the. 32 meel lamba yeh juloos junobi asia mein nae siyasi tareekh raqam kar gaya. Usi raat marshal law nafiz hua aur president Iskandar Mirza ne iqtedar fauj ke supurd kar diya, dastoor maflooj ho chukka tha aur siyasi jamaton par pabandi lag chuki thi. Us waqt ki siyasat ke Khan Aazam ke wings yani parr kaat diye gae the.

Ayubi marshal law ke dauran Khan Abdul Qayyum Khan ko giriftar kiya gaya aur in ki siyasat mein hissa lene par pabandi laga di gai. Inho ne maazrat talb kar ke rihaai to pali,lekin yeh muaafinama in ka musalsal peecha karta raha. In ki siyasat mehdood hui lekin bilkul khatam na ho saki. 1970 ke intekhabaat se pehle “ Quaid e Azam Muslim League ” ke naam se apni jamat bana li aur qaumi assembly ke intekhabaat mein sooba e sarhad se aksariyat hasil hui. Soobai assembly mein in ki riwayati hareef national awami party NAP in ke maqabil thi. Jamiyat e ulmae Islam ke vote faisla kun the, wo jis ki himayat ka faisla karti wazarat e aala isi ko mil jati. Jamiyat ke quaid Mufti Mehmood ne khud wazarat e aala ka mutalba kar diya. Khan Abdul Qayyum Khan in ki imamat ko qabool karne par aamada na ho paae, jab ke Khan Abdul Qayyum Khan ne forum is se ittefaq kar liya. Natijatan… Quaid e Azam Muslim League opposition mein bethne par majboor ho gai.

Zulfiqar Ali Bhutto se NAP ki larhai shuru hui to Khan Abdul Qayyum Khan ne in se muaanqa kar liya aur in ki kabina mein wazeer e dakhla ban gae. Khan sahib mausoof ko in ke haami, Bhutto sahib ke saaey mein aa jane mein he aafiyat jani. Wafaqi wazeer e dakhla ke taur par Khan Abdul Qayyum Khan ne passport ka husool awam ke liye aasaan banaya. In ke wazeer e dakhla banne se pehle aam aadmi ke liye passport milne ka matlab yeh samjha jata tha ke foreign Country ki ijazat mil gai. Passport ke husool ko aasaan banane ke is iqdaam ne Pakistanis par duniya ke darwaze khol diye.

1977 ke intekhabaat mein Khan Abdul Qayyum Khan ki jamat bhi peoples party ke khilaaf paida hone wale gham o gusse ki nazar ho gai. Marshal law nafiz hua to Khan Abdul Qayyum Khan apne burhape se lutf andoz hone lage. Siyasat ko kher bad kehne ka baqaida aelaan to nahi kiya, lekin ab yeh in ke bad ka khel bhi raha tha. 80 sala Khan Abdul Qayyum Khan Islamabad mein apni beti ke ham muqeem the ke 22 October 1981 ko in ko heart attack hua. Zaati motor car to thi nahi, taxi mangwai gai, jo basad in ki bhari bharkam shakhsiyat ko apne andar samait paai. Neem behosh mareez ko taxi mein dakhil karte karte chot bhi lag gai. Mathe se khoon nikal aaya, shayad hospital pohanchne se pehle he khaliq e haqeeqi ke pas pohanch chuke the.


 

More Links

 

 

 

 

Copy right 2012-2014 www.urdubiography.com