Welcome to Urdubiography

 

 

Khawaja Nazimuddin

Khawaja Nazimuddin was born on 19 July 1894 in Dhaka, (former eastern Pakistan). He received education in Muslim University in Aligarh, that time who called as Mohammedan Anglo Oriental College. Then Khawaja Nazimuddin had gone to England and studied at Cambridge University. He returned his homeland with Barrett law and then he involved in Politics of Bengal. Khuwaja Sahib worked as a chairman of Dhaka municipality from 1922 till 1927 and also the syllable of assembly administration of Dhaka University. Khuwaja Nazim was initially the education Minister of Bengal. He selected the first prime minister of Bangladesh after the separation of Pakistan. After the death of Quaid e Azam Mohammed Ali Jinnah selected as a second governor general of Pakistan in September 1948 and after assassination, Liaquat Ali Khan 16, October 1951 he was selected second prime minister of Pakistan 17 October 1951. In 1964, 22 October he died in Dhaka, Bangladesh at the age of 70.

Khawaja Nazimuddin Biography

Khawaja Nazimuddin Photo

Khawaja Nazimuddin ka shumar Pakistan ke un rehnumao mein hota hai. Jinho ne qiyam e Pakistan ki tehreek mein nihayat sargarmi se hissa liya aur apne qaul o feyl se diyanatdari, neyk niyati aur mustaqil mizaji ka sabot diya. Aap ka talluq Dhaka ke us nawab khandan se tha. Jis ne angrezi ahead mein musalmano ki taleem aur falah o behbood ke kamon mein hamesha behad dilchaspi li. Bengal ke mumtaz musalman rehnuma Nawab Sir Saleemullah Kha’n jin ki koshishon se December 1906 mein All India Muslim League ka qiyam amal mein aaya tha. Khawaja Nazimuddin ke mamo the.

Khawaja Nazimuddin 19 July 1894 ko Dhaka ( Sabiq Mashraqi Pakistan ) mein peyda hue. Aap ne aala taleem, muslim university Aligarh mein hasil ki jo us zamane mein Mohammedan Anglo oriental college kehlata tha. Yahan Sir Sikander Hayat Kha’n ( Punjab ), Sir Saadullah Kha’n ( Aasam ), Nawab Sir Hameedullah Kha’n ( Bhopal ) aur Nawab Chatari ( Governor UP ) aap ke hum maktab the. Is ke bad wo englistan chale gaye. Jahan inho ne Cambridge university mein taleem hasil ki. Barrett law hone ke bad watan wapis aa gaey. Khawaja Nazimuddin ko siyasat aur musalmano ke taleemi masaiyl se shuru se dilchaspi rahi, chunache 1922 se 1927 tak wo Dhaka municipality ke chairman rahe. Us dauran mein Dhaka university ki majlis intezamiya ke rukun bhi rahe. Apni belos aur anthak koshishon ki wajah se wo awaam mein aur bilkhasoos musalmano mein be had maqbool ho gaey. Bahesiyat chairman Dhaka municipality, inho ne Dhaka shehar ki taraqqi mein aeham khidmat anjaam di.

Khawaja Nazimuddin Bengal ki majlis qanoonsaaz ke rukun muntakhib hue aur 1929 mein apni qabliyat ki bina par muttehda Bengal ke wazeer e taleem muqarrar hue aur is auhdey par 1934 tak faiyz rahe. 1935 ke india aket ke tehat 1937 mein hone wale intekhabat mein Quaid e Azam Mohammed Ali Jinnah ki awaaz par aap ne Labbek kaha aur All India Muslim League mein shamil ho gaey. 1937 ke intekhabat mein All India Muslim League ke ticket par Bengal assembly ke rukun muntakhib hue aur wazeer e dakhla ke mansab par faiyz hue. Khawaja Nazimuddin 1941 mein muslim league ke ticket par aik dafa phir Bengal assembly ke rukun muntakhib hue. March 1940 se 1943 tak Bengal assembly mein Quaid e Hazb e ikhtelaf rahe aur phir 1943 mein Maulvi Fazal ul Haq ki wazarat ke khatmey ke bad aap ne Bengal mein wazarat banai. April 1943 se March 1945 tak All India Muslim League ki wazarat mein aap Bengal ke wazeer e aala rahe the.

Khawaja Nazimuddin ko All India Muslim League ke maqasid aur is ke nasb ul aeyn se hamesha mukammal ittefaq raha, is liye wo is ki sargarmiyon aur is ke tamam tehreekon mein khuloos aur sargarmi se hissa lene lage the. Muslim league se apne is talluq ki wajah se aap ko bohat jald mumtaz quaideen mein shumar kiya jane laga. Aap 1938 se 1947 tak All India Muslim League ki working committee ke rukun bhi rahe. Aap Quaid e Azam Mohammed Ali Jinnah ke qabil e aitemad aur saiyb ul raey rufqaa mein the. Khawaja Nazimuddin ne 1946 mein aqwam e muttehda ke ijlaas munaqada janeva mein Hindustan ki numaiyndegi ki. Muslim league aur nazariya e Pakistan ki tableegh ke liye aap ne Calcutta se news paper “ star of india ” jari kiya. Is se pehle angrezi zuban mein musalamno ka koi news paper Calcutta se nahi nikalta tha. Is ke ilawa Calcutta mein “ muslim chamber of commerce ” ki bunyad bhi in he ki koshishon se parhi. Tijarti aur muaasharti satah par is qiyam se musalmano ko kafi fawaiyd hasil hue.

Khawaja Nazimuddin qiyam e Pakistan ke bad mashraqi Pakistan ( maujoda Bangladesh ) ke pehle wazeer e aala muntakhib hue aur Quaid e Azam ki wafaat tak is auhdey par khidmaat anjaam dete rahe. September 1948 mein Quaid e Azam ke inteqal ke bad aap Pakistan ke dosre governor general bane aur phir 1951 mein jab wazeer e aazam Pakistan Liauqat Ali Khan ko shaheed kar diya gaya to aap ne Pakistan ke dosre wazeer e aazam ki hesiyat se apne auhdey ka hulf uthaya. Jab ke Ghulam Mohammed ko Pakistan ka teesra governor general muqarrar kiya gaya tha. Isi saal Khawaja Nazimuddin Pakistan muslim league ke president bhi muntakhib hue, lekin bad qismati se Pakistan ki wazarat e uzmaa in ko raas na aai. Khawaja Nazimuddin aik seedhe sade aur diyanatdaar insaan the. Wo sazishon aur jorh torh se kaam nahi lete the. Chunache in ki saadgi aur naram mizaji se Pakistan ke nae governor general Ghulam Mohammed ne faiyda uthaya aur 17 April 1953 ko unhe gher aaiyni taur par wazarat e uzma ke auhdey se bartaraf kar diya aur is tarah Pakistan mein gher jamhori daur ka aaghaz hua.

Pakistan ke aaiyn banane ka jo kaam 1947 se shuru hua tha. Wo Khawaja Nazimuddin ki wazarat ke zamane mein bhi jari raha, lekin governor general Ghulam Mohammed aur Khawaja Nazimuddin ki kabina mein shamil kuch log is koshishs mein the ke Pakistan kisi bhi taur par islami mumlikat na qarar di jaey, jab ke is ke bar aks Khawaja Nazimuddin Pakistan ko islami mumlikat banana chahte the, kyun ke All India Muslim League ne Pakistan ke hussool ki tehreek islami nazariya ki bunyad par he chalai thi. In ke zamane mein dastorsaz aseembly ki aik committee ne in ki sadarat mein November 1952 mein aik report tayyar ki jo “ Nazimuddin report ” kehlati hai. Hukomkat me yeh report 22 December 1952 ko shaey ki. Agarcha islami nuqta e nazar se yeh report pori tarha itmenan bakhsh na thi. Tahum is report mein islami usoolon ka khas khayal rakha gaya tha. Is report par ghaur khaus ke liye ulmaa karam ka aik convention 11 January 1953 ko munaqid hua. Is ijlaas mein sirf wo ulmaa karam madoo the, jinho ne January 1951 mein 22 nukati formulas murattab karne mein hissa liya tha. Convention mein yeh faisla kiya gaya ke Nazimuddin report ko yaksar mustarid na kiya jaey. Bal ke zarori tarmemat ke bad is ko qabool kar liya jaye. Mulk mein maujood islam dushman anasir ko yeh report behad khatak rahi thi. Chunache is report ko abhi dastorsaz assembly ne manzoor bhi nahi kiya tha, ke governor general ghulam mohammed ne Khawaja Nazimuddin ki wazarat e uzma ko bartaraf kar diya. Khawaja Nazimuddin ne governor general ke is gher aaiyni iqdam se dil bardashta ho kar amli siyasat se barhi had tak alehdgi ikhteyar kar li aur in ki yeh khamoshi 1962 tak qaiym rahi. 1962 mein sabiq sadar Mohammed ayub khan ne jab apni aamriyat ko mazeed mustehkim banana shuru kiya to kar siyasi rehnumao ki khuwahish par aap dobara siyasat mein sargarmi se hissa lene lage aur ayub khan ki qaiym karda convention muslim league ke bar khilaf council muslim league ke sadder muntakhib hue.

1964 mein jab mohammed ayub khan ne mulk mein sadarti intekhbat karwane ka aelaan kiya to us waqt ki hazb e ikhtelafat ne Khawaja Nazimuddin ko apna sadarti umeedwar banane par israar kiya. Magar unho ne tajveez pesh ki ke madar e millat mohtarma Fatima Jinnah ziyada mauzoo umeedwar rahengi. Chunache in ki tehreek par siyasi rehnumao ka aik wafd mohtarma Fatima Jinnah ki khidmat mein hazir hua aur unho ne intekhab larhne ki zimmedari qabool kar li. Is intekhabi mohim ke dauran 22 October 1964 ko Dhaka mein 70 baras ki umer mein Khawaja Nazimuddin Khaliq e Haqeeqi se jaa mile. Khawaja Nazimuddin ne apni sari zindagi Pakistan ke liye waqf kar di. Wo is masley par kisi mafahemat ke liye bhi tayyar na hue aur in ki pur khuloos jaddojehad, qiyam Pakistan ki raah mein mamdo muawin sabit hui. Khawaja Nazimuddin ki aik barhi khusosiyat yeh thi ke in ki zindagi barhi simple thi. Inho ne kabhi apni zindagi mein shaaqn o shaukat aur numaiysh ka izhaar nahi kiya. Aap mumlikat ke tamam barhe auhdon par faiyz rahe, lekin inho ne islamiat aur mashriqiyat ko kabhi hath se jane nahi diya.qaumi libaas se Khawaja Nazimuddin ko hamesha dilchaspi rahi aur wo aakhir waqt tak sherwani aur topi ko maghrabi libaas par tarjeeh dete rahe.

 

More Link


 

 

 

 

 

Copy right 2012-2014 www.urdubiography.com