Welcome to Urdubiography

 

 

Sir Abdullah Haroon

Haji Sir Abdullah Haroon was born on 1 January 1872 in Karachi, Pakistan. Sir Abdullah Haroon was a Pakistani politician. He belonged to the memon family. When he was 6 years old, his father died. Abdullah Haroon started the business of trading with Seth Saleh Mohammed. Then he worked hard and achieved successfully and after that, he had a big business man. Haji Sir Abdullah Haroon was a very simple and frugal man. He interested in politician in 1901. He contributed in Indian national congress in 1917. He selected as a president of Sindh opposition committee from 1919 to 1924. Abdullah Haroon established an orphanage in 1923. From 1921 to 1934, he worked as a member of Karachi Municipal Corporation. Sir Haji Abdullah separated the Sindh province from Bombay in 1936. He selected as a Prime minister of Sindh Muslim League in 1939 and then he selected as a member of working committee of All India Muslim league in 1940. Haji Sir Abdullah Haroon died on 27 April 1942 in Karachi, Pakistan. In this page you will read Sir Abdullah Haroon History, Biography In Urdu.

Sir Abdullah Haroon History

Sir Abdullah Haroon Photo

Haji Sir Abdullah Harron ka naam tehreek e azaadi ke un mumtaz rehnumao mein shamil hai jinho ne belos khidmat aur khuloos ke sabab tareekh mein apna naam mehfooz kar liya hai. Ghulam Muhammed Bhurgri ke baad Sindh ke siyasi ufaq par jo sitara tuloo hua wo Haji Sir Abdullah Haroon hain. Inho ne Sindh ke musalmano ki taleemi aur iqtesadi taraqqi aur siyasi beydari mein numayan hissa liya. Sir Abdullah Haroon 1872 mein aik memon gharane mein paida hue, abhi 6 saal ke the ke in ke walid ka inteqal ho gaya. Tajir baradri se talluq rakhne ke sabab pehle apne aik azeez ke han mulazmat ki phir apne aik aur azeez seth saleh mohammed ke sath mil kar business shuru kiya. Inho ne tijarat mein anthak mehnat ki wajah se bohat taraqqi ki aur bil aakhir aik barhe business man ban gaey. Saadgi aur kifayat shoaari sari umar in ka shuaar raha, lekin siyasi aur qaumi kamon mein apna paisa be-dareegh kharsh kiya. Rafaa aama, muslim league aur barresagher ki taqriban tamam tehreekon mein inho ne bharpor hissa liya aur aakhir muslim league ke he rahe aur nazariya e Pakistan ke liye apni tama tar tawanaiyan waqf kar deen.

Sir Abdullah Haroon ne 1901 mein siyasat mein dilchaspi lena shuru ki. All India Muslim League ke qiyam 1906 se le kar 1925 tak inho ne mulki siyasat ka barhi gehri nazar se jaiyza liya tha. Is dauran wo baaz auqat baraherast aur baaz auqat bilwasta siyasi sargarmiyon mein hissa lete rahe. 1911 mein jang tarablis ke mauqey par turkon ki imdaad ke liye barresagher mein anjuman hilal ahmer ke zer e aehtemam chanda jama karne ki mohim shuru hui aur Sindh mein mir ayub ali khan ki sadarat mein anjuman hilal ahmer ki branch qaiym hui to us ke secretary aur khazanchi sir Abdullah Haroon the. October 1913 tak wo chanda jama kar ke turkey bhejte rahe. 1913 mein sir Abdullah Haroon Karachi Municipality ke member hue. Jo us zamane ke lihaz se barhi baat thi. In ka karobari daftar siyasi sargarmiyon ka markaz banta chala gaya. Wo 1917 tak Karachi municipality ke member rahe. 1917 se Abdullah Haroon ne siyasat mein bharpor hissa lena shuru kar diya aur Indian National Congress mein shamil ho gaye.

1918 mein tehreek e khilafat shuru hui to aap jaan o maal se us mein shamil ho gaey. 1919 mein inhe Sindh khilafat committee ka president muntakhib kiya gaya aur 1924 tak wo is auhdey par faiyz rahe. Khilafat tehreek se in ki wabastegi zarb ul missal ban gai thi. Angrez khilafat tehreek ke bad tareen mukhalif the. Khilafat tehreek mein musalman tajiron mein Bombay ke seth umer chotani aur sir Abdullah Haroon ne sab se ziyada hissa liya. Seth chotani ko angrezon ne apni resha dawaniyon aur sarkari aehkamat ke zariye dewaliya kar diya aur wo is sadmey se is daarfani se kooch kar gaey. Lekin sir Abdullah Haroon par hath dalne ki jurrat angrezon ko nahi ho saki. In ka ghar khilafat tehreek mein hissa lene walon ka apna ghar tha. Ali brothers aur Bi Amma in ke mehman hote the. Karachi mein nazaebandi ke zamane mein ali brothers ko jab tak ijazat rahi, un ke liye sir Abdullah Haroon ke ghar se he khana jata tha. Khilafat tehreek ke ilawa in ki sarparasti aur amli tawwun ka daiyra Aligarh Muslim University tak phela hua tha. Inho ne university ko hazaron rupey ke attiyat diye the.

1920 mein sir Abdullah Haroon ne Sindh ka pehla roznama nikala. Isi saal inho ne sukkur mein Sindh soobai siyasi conference ki 17 majlis ki sadarat ki aur apna khutba e sadarat parha. 1923 mein aik yatemm khana qaiym kiya. Jis mein yateemon ki parwarish ke ilawa un ki taleem o tarbiyat ka mukammal intezam tha aur unhe mukhtalif hunar sikhaey jate the. Sir Abdullah Haroon 1921 se 1934 tak Karachi Municipal Corporation ke rukun rahe. Us auhdey par reh kar inho ne Karachi ki taraqqi aur behtari ke liye kafi kaam kiye. Inho ne liyari ke logon ko basane ke liye 12 villages basane ka mansooba pesh kiya aur 1 village namone ke taur par tameer karne ke liye apni janib se 1 lakh 75 hazar rupey ki raqam pesh ki, lekin baldiya is se istefada na kar saki. 1923 mein sir Abdullah Haroon ne Bombay majlis qanoonsaz ki nishast ke liye intekhab larha aur kamiyabi hasil ki. 1926 mein wo markazi majilis qanoonsaz ke rukun bane aur aakhir dam tak majlis mein Sindh ki numaiydegi karte rahe.

Sooba e Sindh ko Bombay se alehda karne ki tehreek mein wo bhi pesh pesh rahe. Angrezon ne apni makhsoos hikmat e amli ke tehat Sindh ko Bombay ke sath mila diya tha. Chon ke is tarha baaz ilaqon mein hindoun ki aksariyat ho gait hi aur phir Bombay ke Hindustan ke musalmano ke mafadat ko sakht nuqsanaat pohchaya karte the. Is liye musalman chahte the ke Sindh Bombay se alehda ho jaey ta ke musalmano ke huqooq mehfooz ho saken. Is maqsad ke husool ke liye sir Abdullah Haroon ne deegar sindhi rehnumao maslan sir ghulam hussain hidayatullah, sir shanawaz Bhutto, sheikh abdul majeed sindhi, mohammed ayub khoro, syed meera’n mohammed shah. Pir ali mohammed rashdi, syed ali murtaza shah aur raees ghulam mohammed bharghari ke sath mil kar bharpor tehreek chalai. Quaid e Azam Mohammed Ali Jinnah, sir sultan mohammed agha khan, mian mohammed shafi, shafa’at ahmed khan air sir sahabzada abdul qayyum bhi is tehreek mein pesh pesh the. Bil aakhir 1936 mein Sindh ko sooba Bombay se alehda kar ke aik nae sooba ka darja de diya gaya. Sindh united party ke founders mein sir Abdullah haroon ka naam bhi shamil hai jo 1935 mein qaiym hui thi. In ke sath sir shanawaz Bhutto bhi khasey fa’aal the. Jab 1935 ke india aket ke tehat intekhabat hue to Sindh united party ne soobey mein 60 mein se 40 nishasten jeet li thin. Magar herat ki baat yeh hai ke us party ke dono air karda rehnuma yani sir Abdullah haroon aur sir shanawaz Bhutto apni apni nishast par shikast se do chaar ho gaey the.

1937 mein Quaid e Azam Mohammed Ali Jinnah ki qiyadat mein all india muslim league ki nashat ul sania hui to sir Abdullah haroon ne 1938 mein united party ko chor kar all india muslim league mein shamoliyat ikhteyar kar li aur muslim league ki awazz ghar ghar tak pohnchai. Sir Abdullah haroon ki koshishon aur muslim league ki markazi majlis e aamla ke tawwun se 7 se 10 October 1938 ko aik azeem ul shaan conference Karachi ke eid gaah meydan mein munaqid hui. Is conference ki sadarat Quaid e Azam Mohammed Ali Jinnah ne ki. Ijlaas mein Sindh ke ilawa jin deegar ilaqon ke muslim league ke rehnumao ne shirkat ki, un mein sir sikander hayat ( Punjab ), Maulvi abu al qasim fazal ul haq ( Bengal ), sardar Aurangzeb kha’n ( sarhad ), sir saadullah kha’n ( aasam ), Khan bahadur nawab syed mohammed ismail ( bahar ), chaudhru khaliquzzaman, Maulana jamal mian firangi mehal, Maulana shaukat ali, begum Maulana mohammed ali johar, raja sahib mehmodabad, syed sajjad haider yaldaram ( UP ), syed ghulam bhek neerang ( ambala ), aashiq ali wakeel ( bahar ), syed abdul rauf shah ( CP ), khan bahadur pir mureed hussain sajjada nashin dargah ghaus baha ul haq zikriya multani, nawab ahmedyar khan doltana, malik barkat ali ( Punjab ) aur nawabzada Liauqat Ali Khan shamil the. Chon ke is ijlaas mein Hindustan bhar ke aeham muslim league ke rehnumao ne shirkat kit hi. Is aitebar se use kul hind ijtemaa ka naam bhi diya gaya. Conference mein sir Abdullah haroon ne urdu mein khutba e istaqbaliya pesh kiya. Is mauqey par Sindh se qanoonsaz assembly ke rukun aur mumtaz danishwar sheikh abdul majeed sindhi ne 10 October 1938 ko muslim wafaq ke qiyam ke mutalbey par mabni aik qarardad pesh ki. Jise ijlaas ke shurkaa ne kasrat raaey se manzoor kiya tha. Pakistan ki tareekh mein Sindh muslim league ki is conference aur is mein pesh ki gai, Qarardadon ko behad aehmiyat hasil ki. Is conference ke ineqad, is ke liye khat o kitaba, qarardadon ki tayyari aur conference ke bad aeham taqareer ki naqool tayyar kar ke Hindustan bhar ke deegar aeham sir karda musalman rehnumao ko bhijwane tak har marhaley par sir Abdullah haroon pesh pesh rahe.

1939 mein Sir Abdullah Haroon Sindh Muslim League ke sadder muntakhib hue aur 1940 mein wo apni mukhlisana khidmaat ki wajah se all india muslim league ki working committee ke member chune gaey. Yeh wo waqt tha ke jab barresagher ke Musalmano mein azaadi ke tasawurrat aam ho rahe the aur khud muslim league bhi azaadi ke is tasawwur ko “ qarardad e Pakistan ” ki soorat mein dene wali thi, chunache 23 March 1940 ko all india muslim league ke tareekhi ijlaas munaqada Lahore mein sir Abdullah haroon ne sooba e Sindh ki numaiydegi karte hue maulvi fazal ul haq ki pesh karda qarardad ki bharpor taiyd ki. Sir Abdullah haroon ne qarardad e Pakistan ki manzori ke bad Sindh mein tehreek e Pakistan mein bharpor hissa liya, magar bad qismati se Qiyam e Pakistan se qabal he 27 April 1942 ko Sir Abdullah Haroon wafaat paa gaey.

Sir Abdullah Haroon jaise mukhlis aur musalmano ke mohsin ke karnamey tareekh mein mehfooz to hain lekin bad qismati se mutalla ke shauq mein kami ke sabab nae nasal in se mukammal taur par aagah nahi, chunache zarorat is amar ki hai ke tehreek e azaadi ke mujahideen ke karnamon se nae nasal ko electronic media ke zariye aagah kiya jaey, ta ke in ki afkaar ki roshni mein naujawano ko apna raasta muntakhib karne mein dushwari na ho aur un mein mulk se mohabbat ka jazba bhi beydar hua.

More Links

 

 

 

 

Copy right 2012-2014 www.urdubiography.com