Welcome to Urdubiography

 

 

General Muhammad Zia-ul-Haq

General Muhammad Zia ul Haq Photo

General Muhammad Zia-Ul-Haq was the longest serving ruler. He was born on 12th August 1924 in Jalandhar, India. Muhammad Zia-Ul-Haq was a sixth president of Pakistan from 1978 till 1988. He entered in British army in 1943. Zia-Ul-Haq participated in the war and Pak Bharat war in 1965. In 1973 he made a major General and he made a Lieutenant General in 1975. He made the President of Pakistan in 16th September 1978. General Muhammad Zia-Ul-Haq was the son of a staff clerk of Indian army named Muhammad Akbar. Muhammad Zia-Ul-Haq died on 17th August 1988 in Bahawalpur. In this page you can see the biography of General Muhammad Zia-Ul-Haq In Urdu.

Zia Ul Haq Biography In Urdu

General Muhammad Zia-Ul-Haq ka zikar aae to bohat se zakham taza ho jate hain. Dheere dheere yaad aane lagta hai ke hamare mulk mein lakhon clash an cops kahan se aai, naujawan nasal heroin ke kaise aadi hue, dehshat gardi kaise aam hoti gai aur nafrat ki is siyasat ka kaise aaghaz hua. Jis ki bunya ilaqai, lisani aur firqawarana jamaton ke zariye rakhi gait hi. Koi nahi janta tha ke British ki Hindustani fauj ke aik staff clerk Muhammad Akbar ke ghar 12 August 1924 ko paida hone wala dosra beta Zia-Ul-Haq kaisi tez rafter taraqqi karega aur Pakistan ke president ban jaega. Zia-Ul-Haq ne 1943 mein british army mein shamoliyat ikhteyar ki. Inho ne dosri jang e azeem aur 1965 ki Pak Bharat war mein hissa liya. 1973 mein wo major General bane. 1975 mein lieutenant General aur inhe dino prime minister Zulfiqar Ali Bhutto ne inhe dekha aur pasand kiya.

1 March 1976 ko Prime Minister Zulfikar Ali Bhutto ne Zia-Ul-Haq ko kae senior army officers par taraqqi de kar fore star General aur chief of army staff bana diya. Bhutto sahib ko yeh munkasir ul mizaaj mazhabi rujhaan rakhne wala General acha laga tha, jo bazahir siyasat mein koi dilchaspi nahi rakhta tha. Awami satah par prime minister Bhutto ko barhti hui mukhalfat ka saamna tha aur siyasi mahaz par ko makhkhi jang larhne se qabal wo fauj ki mukammal wafadari ke silsile mein pora itmenaan hasil karna chahte the. Unhi bohrano ke dauran 1977 ke parliamentary intekhabat ka aelaan ho gaya. Hazb e ikhtelaf ki beshtar jamaton ne mil kar Pakistan national alliance PNA bana liya aur intekhabat ki maarka aaraai shuru ho gai. PNA intekhabaat na jeet saki, magar is ne dhaandli ka ilzaam laga kar intekhabi nataiyj ko manne se inkaar kar diya. Bhutto hukomat ke khatme ke liye mulk geer awami tehreek shuru ho gai jo dekhte he dekhte civil nafarmani ki hadon ko chone lagi. Prime minister Bhutto ne Karachi, Lahore aur Hyderabad samait kuch shehron mein marshal law nafiz kar diya. Phir halaat ko behtar banane ke liye hukomat aur PNA ke rehnumao ke darmiyan muzakraat shuru ho gae. Kehte hain ke kae hafton par muheet yeh muzakraat kamiyabi ki janib barh rahe the, jab chief of army staff General Muhammad Zia-Ul-Haq ne, jinhe prime minister Zulfiqar Ali Bhutto ne kar Generals par taraqqi de kar fauj ka sarbarah banaya tha. Apne kuch saathiyon ke sath mil kar hukomat ka takhta ulat diya. 5 July 1977 ki sham prime minister Bhutto aur in ki kabina ke saathiyon ko military police ne protective custody mein le liya.

Yun Pakistan ki tareekh mein aik nae fauji ahead ka aaghaz hua jo 11 saal tak jari raha aur jis ke asraat se Pakistan aaj tak nahi nikal paya. Jis waqt yeh waqeya runoma hua tha. Us waqt yehi kaha gaya tha ke mulk mein pheli hui bad amni aur civil nafarmani ke ilawa politicians ki bahmi kashmakash ke natije mein phelne wale inteshar ko rokne ke liye mulk mein Martial Law lagana parha hai. Magar bad mein sabit hua ke General Zia-Ul-Haq ne pori mansoba bandi ke sath yeh qadam uthaya tha. Is karwai ko operation fair play ka naam diya gaya tha.

Chief Martial Law Administrator ki hesiyat se iqtedar sambhalne ke bad General Zia-Ul-Haq ne PTV par qaum se apne pehle khitaab mein qadah kiya ke wo 90 din ke andar nae, gher janibdarana parliamentary intekhabaat karaenge aur civil candidates ko iqtedar saunp denge. Is wadah ke tehat October 1977 mein parliamentary intekhabat hone the, magar October mein he General Zia-Ul-Haq ne election multawi karne aur politicians ke aehtesaab ka aelaan kar diya. Yeh aik tareek daur ka aaghaz tha. Mulk ke politicians, courts, bureaucrats, wadere aur sardar, sab be nae hukmaran ka sath dene ka faisla kiya. Mazool prime minister Zulfiqar Ali Bhutto ki wife Begum Nusrat Bhutto ne fauji inqilab ki qanooni hesiyat ko court mein challenge kiya to mulk ke supreme sourt ne faisla diya jise nazariya zaroorat ke naam se yaad kiya jata hai. Is faisle mein kaha gaya tha keg her mustehkim siyasi soorat e haal ke pesh nazar General Zia-Ul-Haq ne Bhutto hukomat ka jo takhtas ulta tha, wo waqt ki zarorat ke pesh nazar jaiyz tha. Is faisle ne iqtedar par General Zia-Ul-Haq ki giraft aur mazboot kar di. 16 September 1978 ko General Zia-Ul-Haq ne mulk ke nae president ki hesiyat se hulf utha lia. Agle 6 barson mein inho ne aaeyn mein mutadid tarameem ki aur qaumi assembly ko apni marzi se barkhuwast karne ka ikhteyar bhi hasil kar liya.

Mazool prime minister Bhutto ki phansi General Zia-Ul-Haq ka sab se khaufnaak iqdaam tha. Mazooli ke bad se Bhutto sahib par Ahmad Raza Qasoori ke walid ko qatal karne ke aehkamaat dene ka muqadama chal raha tha. Lahore high court ne inhe saza e maut sunai. Is saza ke khilaaf supreme court mein qanooni appeal daiyr ki gai. Kae samaton ke bad supreme court ne saza e maut barqarar rakhne ka faisla sunaya. Yeh aik munqasim faisla tha. Jis mein 7 arkaan par mushtamil bench mein se 3 judges ne saza e maut ke khilaaf aur 4 judges ne saza e maut ke haq mein raae di thi. Sadar mumlikat ki hesiyat se General Zia-Ul-Haq ke paas is saza e maut ko qaid mein tabdeel karne ka ikhteyar tha. Magar General Zia-Ul-Haq koi khatra moal nahi lena chahte the. Kae aalmi rehnumao ki appeals ke bawajood inho ne saza e maut ko muaaf nahi kiya aur 4 April 1979 ko Zulfiqar Ali Bhutto ko phansi de di gai.

General Zia-Ul-Haq ne tamam siyasi jamaton par pabandi laga kar parliamentary jamhoriyat ko mulk se rukhsat kiya aur 1980 mein majlis shora ka mutabadil nizaam nafiz kiya. Is majlis shora mein danishwaron, ulma e deen, sahafiyon, mahireen muaashiyaat aur deegar shobon ke experts ko shamil kiya gaya. Majlis shora ke 284 arkaan the aur har aik ki namzadgi president General Zia-Ul-Haq ki marzi ki marhoon e mannat thi. Bureaucrats, technocrats aur experts ki is fauj mein Agha Shahi, Sharifuddin Pirzada, Mehboob ul haq, Roidaad Khan, Ghulam Ishaaq Khan aur deegar log shamil the. General Zia-Ul-Haq ki khush qismati thi ke jab wo Bhutto hukomat ka takhta ulat kar bar sir iqtedar aae, to is ke 2 saal bad he Soviet Union ne Afghanistan par qabza kar lia aur Pakistan achanak sari duniya ki nazron mein aa gaya. Aise mein General Zia-Ul-Haq ne apne qareebi dost General Akhter Abdur Rehman ke sath mil kar Russia ke khilaf America aur CIA ki jung larhne ka faisla kiya. Yeh jung Afghan mujahideen ke zariye larhi gai aur is ke liye America ne croron dollars farahum kiye, jis ke natije mein Soviet union ko bil aakhir Afghanistan se nikalna parha aur General Zia-Ul-Haq hero ban gae.

Magar Afghanistan ki is jung ne Pakistan ko wo zakham bakhshe jo aaj tak nahi bhar sake hain. is adventure ke natije mein Pakistan mein clash an cop culture aaya, Dehshat gardi aur heroin ke nashe ki waba aai. Inhi mujahideen groups mein se 2 jahadi group Taliban aur alqaida ban kar ubhre, jinho ne agle 20 saalon ke dauran qiyamat barpa kar di. Aaj Pakistan jin pareshaniyon se do chaar hai, in mein se beshtar General Zia-Ul-Haq ke daur ka tohfa hai.

Siyah o safaid ke malik ban jane wale Zia-Ul-Haq ki mohlat bil aakhir 17 August 1988 ko khatam hui. Wo American sakhta Abrams tanks ka muzahira dekhne Bahawalpur gae the. Wahan se wo apne C-130 Hercules jet par wapis Islamabad rawana hue. Parwaz shur hone ke thori dair bad he control tower ka raabta jet se munqata ho gaya. Baaz aeni shahideen ne jet ko dagmagate, qalabaziyan kahte aur phir aik dhamake se zameen se takrate dekha. Jet mein sawaar tamam 31 log halak ho gae, jin mein General Akhtar Abdur Rahman, American ambassador Arnold Raffle aur Brigadier Siddiq Salik bhi shamil the. Yun aik matlaq ul annan hukmaran bil aakhir razq e khak hua aur aamriyat ka aik tareek ahead apne ikhtetam ko pohancha. Hasb e riwayat, researches ke bawajood yeh pata na chal saka ke yeh accident kaise runoma hua. Shayad yeh janna bohat zaroori bhi nahi tha.

More Link


 

 

 

 

Copy right 2012-2014 www.urdubiography.com