Welcome to Urdubiography
Home >> Showbiz >>Abid Ali  

 

 

 

 

Abid Ali

Abid Ali Photo

Abid Ali is one of the great actor of Pakistani TV and film industry. Abid Ali born on 17th March 1952 in Queeta. In his early age he was not interested in acting but he has interested in painting and writing. Abid Ali started his career from radio. In 1973 Abid Ali came to Lahore for better future. His popular dramas are "jhok siyal, waris, suraj le sath sath, ghulam gardish, morat, mehandi, saheli, samandar, dosra asman, buri aurat, masi aur malka, aan, jehaz, kala jado, rukhsati and dasht. He has his own prodution house too. Abid Ali has acted in many film like "mosa khan, laila, sahiba, betab, gharibon ka badshah, khak aur khoon etc. Abid Ali has 3 daughters Iman Ali, Rahima Ali and Mariyam Ali and all of them are in showbiz industry. For his outstanding work Government of Pakistan awarded him Pride of Performance in 1985. In this page, you will read Abid Ali Biography In Roman Urdu.

Abid Ali Biography

Abid Ali ko Pakistani tv screen ke golden dor ka numaindah adakar kaha jata hai. Unhon ne 1973 mein PTV Lahore serise " jhok siyal" se shurat ke safar ka aghaz kiya. Apni bhar pur awaz, mardana wajahat aur purtasur chehre ke bais wo pheli hi nazar mein nazreen ko bha gaye. Is ke bad unhon ne kamyab dramon ko aik qatar laga di balke ye kehna behtar ho ga ke aik zamane mein Abid Ali ki mojudgi kisi bhi drama ki kamyabi ki zamin samjhi jane lagi thi. 63 sala Abid Ali 17 March 1952 ko Baluchistan ke sadar muqam Queeta mein paida howe. Zaman e talib e ilmi mein unhen adakari ka koi shoq nahi tha, balke un ka ziyadah rujhan us dor mein musaviri aur tehrir ki taraf raha.1986 mein Queeta ki mashhor addbi aur samaji shakhsiyat aur maroof shair Atta Shad ki un se mulaqat hoi. Atta Shad ne Abid Ali mein chupe here ko bhanp liya aur un ki awaz ki tarifon ke pul bandhte howe unhen radio par kaam karne ki dawat di. Abid Ali audition ke leye gaye aur kamyan hone ke bad Queeta radio se dramon samet mukhtalif programon mein sada kari karne lage.1973 mein hosol e raozgar aur behtar mashi mustaqbil ka khawab ankhon mein sajaye ye gabro jawan Queeta se Lahore mumtaqil ho gaya. Lahore mein tv ki chamak aur glamour ki chakachond ne is nojawan ko apni bahon mein leya aur raaton raat shorat ki bulandiyan te karte howe Abid Ali tv ke mashhor fankaron ki fehrist mein shamil ho gaye. Lekin tv par dakhla unhen kisi chor darwaze ya achanak chance ke zariye nahi balke mutadid bar audition ke marahil se guzarne aur apne intekhab ki merit sabit karne ke bad hi mila.


Abid Ali ke mashhor dramon mein jhok siyal ke elawa " waris, suraj ke sath sath, ghulam gardish, mehandi, morat, sehali, samandar, dosra asman, buri aurat, masi aur malka, aan, jehaz, kala jadu, rukhsati aur dasht samet latadad drama serials, soaps aur infaradi drame shamil hain. In dramon mein adakari ke sath sath unhon ne " malka aur masi" samet " saheli" ki hidayaat bhi den aur in donon dramon ko produce bhi kiya. 2009 mein Abid Ali ne aik Bollywood film "Mr Bhatti on chuti" mein kaam kiya. Is ke elawa bhi unhon ne tv ke sath sath Pakistani filmon mein apni adakari ke johar dikhaye. In filmon mein "mosa khan, laila, sahibah, betab, fatah, nagina, Allah rakhi, gharibon ka badshah, sone ki talash, waris aur khak aur khoon" waghaira shamil hain.


Fan e adakari ke shobe mein Abid Ali ko aik legend ki hesiyat hasil hai. Wo guzarte waqat ke sath apni adakari mein tano paida karne ke mahir hain. Tv par hero ke markazi kirdaron se apne safar ka aghaz karne wale Abid Ali ne aik khas muqam par aakar samakh liya ke ab umar ka wo stage aagaya hai jahan hero ke kirdar mein aana, un ki fani zindagi ke leyr nuqsandah hai. Chunacha unhon ne Hollywood ke adakaron ki rah par chalte howe character acting par tawaja di aur chotte kirdaron ko bhi apni jandar performance se bara bana kar dikha diya.


Abid Ali Pakistan ke wo fankar hain jinhon ne pichle 40 salon mein betakan kaam kiya aur adakaron ki 3 naslon ke sath na sirf adakari ki balke nazreen ki 3 naslon ko apne fan se mehzoz bhi kiya. Wo aaj bhi kisi drame ke set par hon to nihayat inkasari aur piyar ke sath apne juniors ko apna fan aik ustad ki tarha muntaqil kar rahe hote hain. Wo dheme lehje mein goftogo karne wale aik khush shakal, khush libas aur khush goftar fankar hain. Sirf kaam se kaam rakhna un ka style aur sab se dosti rakhna un ka mizaj hai. Wo apne tabnak mazi se jure rehne ke bawajod jadid dor ke taqazon se bhi khud ko humahang rakhe howe hain. Amoman log samajhte hain ke jhok siyal hi Abid Ali ki pheli serial thi halan ke sach ye hai ke unhon ne sab se phele Saleem Chishtti le likhe howe kheel "zanjeer" mein adakari ki. Lekin ziyadah shorat unhen jhok siyal se mili.


Tv par unhen Yawar Hayat, M Nisar Hussain, Saleem Chichtti, Ashfaq Ahmed aur Bano Qudsiya jese asatzah mile. Unhon ne aik ese dor mein shohrat hasil ki jab tv par aana aur adakari karna nihayat mushkil kaam tasawor hota tha. Muqabla sakht tha aur bare bare adakaron ki aik lambi qatar phele hi apna naam bana chuki thi. Ye wo dor tha ke jab Firdos Jamal, Shujat Hashmi aur M Qawi ka tota bol raha tha. Rohi Bano, Khaldah Riyasat aur Uzma Gillani ke muqable markazi kirdar milna koi asan baat nahi thi magar Abid Ali ne jald hi sabit kar diya ke Abid Ali bhi aik naam hai jis ke sath kaam karna bhi kisi kam azaz ki baat nahi.1985 mein hukumat e Pakistan ne un ki ala fani khidmaat ke atiraf mein unhen Pride of Performance ke award se nawaza. Is ke elawa bhi wo mutadid award hasil karte rahe.


Jhoke Sial ko Abid Ali ke hawale se is leye bhi yadgar serial qarar diya jata hai ke awal to us ke zariye unhon ne apni shanakht banai, phir isi serial mein apne sath kaam karne wali Humeira Chudhry ko apna jewan sathi bhi bana liya jin se Abid Ali ki 3 betiyan hain aur teenon hi in dinon showbiz mein ala muqam par hain. Super model Iman Ali, Rahima Ali aur Mariyam Ali bhi apni shanakht kitni bhi mutabar ho magar in ki pehchan aik mazboot hawala ye bhi hai ke wo Abid Ali ki betiyan hain. Abid Ali aur Humeira mein elahdgi ke bad Abid Ali ne Rabia Noreen se 2006 mein shadi ki thi.


Kisi bhi drame ke kirdar ko haqiqat ke rangon se sajate Abid Ali ka orhna bichona sirf showbiz hai. Wo apna zati production house bhi chalate hain aur khob chan phatak ke bad apni taraf ane wali adakari ki offer bhi qabol kar lete hain. Wo aaj ke dor mein directors aur producers ki nai nasal ke sath zaror kaam kar rahe hain magar apne kuch purane usalon par wo aaj bhi samjhota nahi karte. Misal ke tor par wo aaj bhi set par pohanche se phele script ko achi tarah yad kar lete hain, aur jab tak apne sath sath apni pori team ko drame ki rerhersal nahi karwa dete us waqat tak "ok take" ka nara sunne ke sakhat khilaf hain. Purane usolon aur jadid riwayaton ke sahare Abid Ali ka fani safar jari hai aur Abid Ali ki zati shakhsiyat mein koi tabdili aaye ya na aaye lekin dekhne wale har naye drame aik bilkul naye Abid Ali se zaror mulaqat karte hain.

Benazir Bhutto Zulfiqar Ali Bhutto Nawaz Sharif
Altaf Hussain Pervez Musharraf Asif Ali Zardari

 

 

 

 

@Copy right 2012-2015 www.urdubiography.com