Welcome to Urdubiography
Home >> Showbiz >>Agha Talish

 

 

 

 

Agha Talish

Agha Talish Photo

Agha Talish was a multitalented actor. He was born on 10th November 1927 in the City of Indian Punjab, Ludhiana. Agha Talish received his matric degree in Mathura. His father was belonged the department of police. The real name of Agha Talish was Agha Ali Abbas Qazalbash. Krishen Chandar was a film maker, he introduced his filmy named Agha Talish. After separation of Pakistan and Hindustan, he migrated in Pakistan. Then he worked in the film Nuth in 1952. Agha Talish worked in more than 90 films. He has four daughters and one son, named Ahsan Talish. Agha Talish died on 19th February 1998 in Lahore. In this page you can see the biography of Agha Talish In Urdu.

Agha Talish Biography In Urdu

Agha Talish 1965 mein hawaon ke dosh par gonjne wale maqbool geet “ Yaaro mujhe maaf karo, main nashe mein hoon ” se shohrat ki bulandiyon par pohanchne wale fankar Agha Talish filmy duniya mein aane se qabal Agha Ali Abbas Qazalbash kehlate the. Agha Talish 10 November 1927 ko Indian Punjab ke shehar Ludhiana mein paida hue. Talish ke walid mehakma e police se wabista the. Agha Talish ki paidaish ke bad wo Ludhiana se Hindustan ke famous shehar Mathura chale gae, wahin Agha ji en matric tak taleem hasil ki. Hindustan ke famous poet Sahir Ludhiyanwi se Agha ji ke walid ke derena talluqat the. Inhi marasim ki wajah se Agha ji filmy duniya tak pohanche. Hua kuch yun tha ke Sahir Ludhiyanwi ne Agha Talish ki mulaqaat Krishen Chandar se karai. Wo us waqt aik film “ Sara eke Bahar ” ke naam se bana rahe the. Inho ne is film mein Agha ji ko kaam karne ka mauqa diya. Yeh Krishen Chandar he the, jinho ne Agha Ali Abbas Qazalbash ko Agha Talish ka filmy naam diya aur yeh naam kuch yun un ki pehchan bana ke aaj log inhe Agha Talish he ke naam se jante hain aur bohat kam log honge, jo un ke asal naam se waqif hain. Film “ Sara eke Bahar ” mein Agha ji ka role itna jaandar na tha ke wo logon ki nazron mein aa jate. Is film mein actress Nautan ki waldah aur bollywood actress Kajol ki nani Shobhna Samrath ne heroin ka, jab ke Prem Adeeb ne hero ka role ada kiya tha. Sarae ke bahar ke bad Agha Talish ne aik aur film Samrat Ashok mein kaam kiya, lekin yeh film inhe wo shohrat na de saki, jis ke wo haqdaar the, chunache taqseem Hind ke bad Agha Talish ne Pakistan aane ka faisla kiya.

1952 mein Pakistani filmsaaz TH Riyaz ne film Nuth shuru ki. Is film ke markazi role ke liye actor Yousuf Khan ko sign kiyagay, lekin baaz wajohaat ki bina par Yousuf Khan ke bajae yeh role Agha Talish ko mil gaya. Film ke director Shafi Aijaz jab ke film mein heroin ka kirdar Begum Khurshid Mirza ki bhanji Hafeez Jahan ne adaa kiya. Yeh 50 ki dehaai thi aur Pakistani film industry us waqt naumolood thi aur yahan Indian films aur actor he pasand kiye jate the. Lehaza chand aik Pakistani films jaise Phere, 2 aanso, dupatta aur Chanwe ke ilawa job hi films release ki gai. Wo kuch kahs pazeerai hasil na kar sakin. Inhe mein se aik Nuth bhi thi.

Yeh soorat e haal sirf Agha Talish ke sath he pesh nahi aai, bal ke jitney bhi fankaar India se yahan aae the, wo sab he mushkilaat ka shikar the. Us waqt character actor ke taur par M Ismail aur Alaouddin ziyada famous the. Aise mein Agha Talish ke liye apni jagah banana intehai mushkil kaam tha, lekin inho ne jadoojehad jari rakhi. In ka mushkil daur us waqt khatam hua, jab 1957 mein producer Saif Uddin Saif ne film Saat Lakh banai, jis ke director Sagheer Malik the. Is film mein Agha Talish side role mein pardah screen par nazar aae. Jab ke Santosh Kumar aur Sabiha Khanum ne markazi kirdar nibhae. Film ke aik manzar mein chand doston ko dikhaya gaya tha aur wahan Agha Talish par Song “ Yaaron mujhe muaaf karo, main nashe mein hon ” filmaya gaya. Agha Talish ne khud raqim ul huroof ko bataya ke jab yeh song picturies ho raha tha. To inho ne socha key eh acha mauqa hai agar inho ne is song ko acha picturise karwa liya to in ki qismat sanwar jaegi aur phir aisa he hua. Film release hui to yeh song bohat famous aur yun filmy duniya mein Agha Talish ki maqboliyat ka daur shuru hua.

Film saat lakh ke zariye aik new actress bhi famous hui, jise is se qabal koi nahi janta tha aur wo actress thin Neelo. Neelo ka asal naam Santhiya Alexander Fernandez tha. Bad azaa inho ne Islam qabool karne ke bad film writer Riyaz se shadi kar li aur in ka naam Aabida rakha gaya. Aaj kal in ke sahibzade Shaan Pakistan film industry ke super star hain. Beharhaal yeh baat to barre sabeel tazkara aa gai. Zikar ho raha tha Agha Talish ka. Inho ne 1956 mein film baaghi mein kaam kiya aur police inspector ka role nibhaya. Film mein in ke sath Sultan Rahi naami shakhs ne pehredaar ka kirdar adaa kiya tha, bad mein yehi Sultan Rahi Punjabi films ke sultan kehlae. Agha Talish apne filmy career ke urooj par us waqt pohanche, jab in ki film release hui. Is film mein in ke sath Alaouddin bhi the. In dono mayanaaz character actors ki jaandar acting ke danke sarhad paar bhi sunai diye. Is film mein Agha ji ne aik angrez ka kirdar adaa kiya aur ise itni khobsurti se nibhaya ke shayad he aane wale barson mein bhi koi actor aesi shandaar performance de sake. Is film ke bad Agha Talish Pakistani film industry ki zarorat ban gae. Agha Talish ne 90 se zaiyd films mein kaam kiya. In ki famous films mein Firangi, Zarqa ( is film ko Pakistan ki pehli diamond jubilee film hone ka aezaaz hasil hua ), Shaheed e Watan, Lakhon mein Aik, Kaneez, Riwaaj, Bharosa, Ghonghat, Umrao Jaan, Adaa, Baji, Dooriyan, Saiqa, General Bakht Khan, Devdas, Naag Mani, Aanchal, Akhri Mujra aur Sakhi Badshah shamil hain.

Agha Talish ka kehna tha ke inhe apni sari films pasand hain, lekin khas taur par yeh aman, Shaheed, Firangi, Zeenat, Zarqa aur General Bakht Khan mein ada kiye gae role inhe bohat pasand the. Film Zarqa ke hawale se Agha Talish ne Raqim ul Huroof ko bataya “ film ke aik manzar mein actress Neelo zanjeeron se bandhi hui dance kar rahi thin aur main angrez ka kirdar adaa karte hue apne Cigar se un ke jism ke daaghdar kar raha tha, us song ke dauran Neelo ne aesi be misaal acting ki, jise aaj tak mujh samait koi bhi film ben na bhula saka ”.

80 ki dehaai mein Pakistani film industry zabon haali ka shikar thi, chunache Agha ji ne khud ko filmy duniya se door kar liya aur Shahnoor Studio mein rehaish ikhteyar kar lit hi. Eyh aik choti si kuttiya thi, jis ke bahar Shanti Nagar ka board laga hua tha. Wahan wo apne purane doston ke sath bethte aur film industry ke halaat ka rona rote the. Agha Talish ki 4 sahabzadiyan aur 1 sahabzade Ahsan talish hain, jo Geo TV ke maqbool program “ Hum Sab Umeed Se hain ” ke producer bhi rahe hain. Dilchasp baat yeh hai ke 1986 mein jab Ahsan Talish ne showbiz ki duniya mein qadam rakha to in ke ibtedai drama mein baap ka role Agha ji ne he ada kiya tha. Yaad rahe ke is drama ka naam “ Kurb ” tha, jis mein Samina Pirzada ne bhi kaam kiya. Bad azaa Agha ji ne chand aur dramas mein bhi kaam kiya, lekin wo zaati taur par films ko he tarjeeh dete the. Agha Talish ki zindagi ki aakhri Urdu film Sangam 1997 aur aakhri Punjabi film Sakhi Badshah 1996 thi. Sakhi Badshah Malika Tarranum Noor Jahan ki fanni zindagi ki bhi aakhri film thi, jis ke liye inho ne Geet “ Ki damm da Bharosa yaar, Dumm aawe ke na aawe ” gaya tha.

Agha Talish mukhtasir alalat ke bad 19 February 1998 ko Lahore mein is duniya e faani se kooch kar gae. Yun Pakistan film industry mein character acting ka yeh be taaj badshah to duniya se rukhsat ho gaya, lekin us ki lajawab acting ke anmat naqoosh aaj tak logon ke zehno par naqsh hain.

Mehdi Hassan Bushra Ansari Nisar Bazmi
Nusrat Fateh Ali Khan Noor Jahan Waheed Murad

 

 

 

 

@Copy right 2012-2014 www.urdubiography.com