Welcome to Urdubiography
Home > Showbiz >Iqbal Bano  

 

 

 

Iqbal Bano

Iqbal Bano Photo

Iqbal Bano had the melodious warble voice. She was a great ghazal singer of Pakistan. Iqbal Bano was born on 4th November 1935 in Delhi, India. She was very fond of music since childhood. Multan was a congenital homeland of Iqbal Bano. She is very talented and contralto singer. Iqbal Bano was also known as a classical poetry ghazal and classical thumris. She was also sang songs in Persian language. Iqbal Bano received the pride of performance, star of excellence and PTV World millennium awards. She was sung songs for the radio and film also. Iqbal Bano died on 21st April 2009 in Lahore. In this page you can see the biography of Iqbal Bano.

Iqbal Bano Biography

Yeh qiyam e Pakistan se pehle ka zamana tha.jab 7, 8 saal ki Iqbal Bano apne parhose se sunai dene wali aik taan ki janib pehli baar mutawajja hui. Inhe bachpan se he singing ka shauq tha. Is awaaz ki kashish inhe kasha kasha sath wale ghar le gai, jahan 2 bachiyan apne ustaad se gana seekh rahi thin. Kamsin Iqbal Bano chup ke se jaa kar is class mein beth gai aur ustaad ki awaaz ke sath awaaz milana shuru kar di. Ustaad kehen lage “ Yeh ladki agar singing seekh le to bohat acha gaegi ”. tab Iqbal Bano ke shauq ko ustaad ki raae ne jilaa bakhshi aur inho ne apne aehal e khana se kaha, mujhe gana seekhna hai.

Aehal e khana ne jab yeh dekha ke Iqbal Bano ke is shauq ki wajah se in ki parhai mutassir ho rahi hai to inhe singing ki mashroot ijazat dete hue radio station par bachon ke program mein le jaya gaya. Yeh rasam o riwaaj ke zindaa’n mein muqayyad Iqbal Bano ki madhur awaaz ke liye aik chota sa daricha sabit hua. Is awaaz ke chahar sou phelne ke liye yeh raasta kafi tha aur yehi wo maqaam tha. Jab khandaan… Iqbal Bano ke shauq ki raah mein mazeed rukawat na bana aur inho ne ustaad Chand Khan se classical singing ki baqaida tarbiyat leni shuru ki. Ustaad ke inteqal ke bad aik aur ustaad Kareem Khan se bhi tarbiyat hasil ki. Jo Patiala gharane se talluq rakhte the. Dono ustadon se thumri aur daadra samait classical singing ki barikiyon se aagahi hasil ki. Yehi wajah hai ke Iqbal Bano ke gaae hue geeton aur ghazlon mein classical rang numayan nazar aata hai. Inqelabaat zamana ne Iqbal Bano ki awaaz ko kabhi mutassir nahi kiya, bal ke mazeed nikhaar diya tha. Wo apni zindagi ke aakhri saal tak gaati rahin aur daad samait’ti rahin.

Iqbal Bano ka aabai watan Multan tha. Wo khud 4 November 1935 ko Delhi mein paida hui aur sunn baloghat tak ka ziyada arsaa isi shehar mein guzara. Baqaida funni career ka aaghaz all India radio, Delhi se kiya. Taqseem hind ke kuch arsey bad wo shadi kar ke Pakistan aa gai aur phir yahan inho ne radio, film aur TV ke liye apni awaaz ka jadoo jagaya. Radio programs ke silsile mein wo Multan se Lahore aaya karti thin. Jab film walon ne Iqbal Bano ki classical awaaz suni to in se rujoo kiya aur film ke liye gaane ki baqaida dawat di. Tab aik sadabahar geet ne janam liya.

Tu laakh chale ri gori tham tham k…

Film Gumnaam ke is geet ke bad aik aur maqbool tareen geet Iqbal Bano ki awaaz se jawidaan hua. Film thi Qatil aur geet tha.

Ulfat kin ae manzil ko chala,,,

Tu bahein daal ke baahon mein…

Anwar Kamal Pasha ki in dono films ki kamiyabi mein Iqbal Bano ki awaaz ka bohat dakhal tha. Is ke bad Iqbal Bano ke pas films ki line lag gai, lekin inho ne sirf muntakhib geet gaane ko tarjeeh di. Isi liye inho ne films mein kam gaya lekin khob gaya.

Iqbal Bano ne film ke liye kae khobsurat aur yaadgar naghme gaae. Jin ka shumar sadabahar geeton mein hota hai. Film Ishq Laila ke geeton ne to har taraf dhoom macha di thi. Is film ke liye Iqbal Bano ne mausiqar Safdar Hussain ka compose kiya hua yaadgar geet gaya.

Sitaron tum to sou jao, paresha’an raat sari hai…

Sapaid rangat aur dilkash naqosh ki malik Iqbal Bano ka ghazal aur thumri gaane ka apna khas andaaz tha jo inhe deegar gaane walon se mumtaz karta tha. Rasio par Iqbal Bano ne usatza ki ghazlen gaane ko tarjeeh di. Yun to Iqbal Bano ne barhe barhe shoara ka kalaam gaya, magar mayanaz poet Faiz Ahmed Faiz ki nazmon aur ghazlon ko inho ne is kamaal maharat ke sath gaya ke sunne walon par sehar taari ho jata tha. Faiz ki is famous nazam ko Iqbal Bano ne khud he compose kiya aur itne khobsurat o dilkash andaaz mein gaya ke in ke naam ko zinda rakhne ke liye yehi kafi hai.

Dasht e Tanhai mein ae jaan e jahan larza’an hain,,,

Teri aaghosh ke saaey, tere honton ke saraab…

Phir Faiz Ahmed Faiz ki aik aur maqbool aam nazam.

Hum dekhenge, lazim hai ke hum bhi dekhenge,,,

Jab takht giraae jaenge,,,

Jab taaj uchale jaenge…

In nazmon ko apni khobsurat aur munfarid awaaz mein gaa kar Iqbal Bano ne Amar kar diya aur khud bhi Amar ho gai. Isi tarah Baqi Siddiqui ki ghazal.

Daagh dil hum ko yaad aane lage,,,

Log apne diye jalane lage…

Is ko Iqbal Bano ne itne dilkash andaaz mein gaya ke is mein chaar chand laga diye.

Iqbal Bano ka aik yaadgar musical concert Jaipur mein hua tha, jab wo Saarc ke tehat saqafti wafood ke tabadley ke hawale se pehli baar India gai thin. Is barey mein inho ne bataya. “ Jaipur mein bohat barha auditorium tha, October ka month tha, sardi thin a garmi, barha acha mausam tha. Chaaron janib search lights lagi hui thin, main ne aik thumri shuru ki ”.

Ab ke saawan ghar aa ja…

Mera gana jari tha ke achanak barish ki boondein parhna shuru ho gai. Mujhe aisa laga ke jaise moti tapak rahe hain. Isi asnaa mein announcer ki awaaz sunai di jo keh raha tha ke pehle suna he suna tha, lekin aaj hum dekh rahe hain ke Meghraj mein Iqbal Bano thumri gaa rahi thin ke barish ho gai.

Iqbal Bano ko classical aur neem classical bilkhusoos mere watan ke naujawan, watan ke geet gaae jaa, aur yeh apni zameen yeh apna watan, sooraj ki tarah roshan roshan apni misaal aap hain.

Iqbal Bano ko pride of performance, sitara e imtiaz aur PTV world millennium award se nawaza gaya. Bharat mein bhi inhe naushad award samait mutaddid aezazaat diye gae. 1979 tak Afghanistan mein jashan kabil ki yaadgar saqafti taqreeb har saal munaqid hoti thi. Jis mein Iqbal Bano Pakistan se bataur khas shirkat ke liye jati thin aur Persian kalaam pesh karti thin. Afghanistan ke sabiq badshah Zahir Shah bhi in ki singing ke maddah the. Qateel Shifai se in ke khusosi marasim ke bhi charche rahe. Qateel Sahib ki kitab “ Ghunghro toot gae ” ko dhake chupe alfaaz mein qateel aur Iqbal Bano ki daastan e ishq samjha jata hai. Qateel Sahib ka shair hai.

Saanwli si aik ladki jis ka mardon jaisa naam,,,

Bhej rahi hai mujh ko apni chahat ke paigham…

Beshtar waqifan e haal ka kehna hai ke yeh shair Iqbal Bano he ke barey mein tha.
Ghazal gaaeki ko aik naya andaaz bakhshne wali Iqbal Bano ki raseeli awaar 21 April 2009 ko Lahore mein khamosh ho gai, tahum in ki sadabahar ghazlein aur geet shaiyqeen ke dilon mein inhe zinda rakhengi.

Madam Noor Jehan Mehdi Hassan Waheed Murad
Muhammad Ali Nusrat Fateh Ali Khan  

 

 

 

 

@Copy right 2012-2014 www.urdubiography.com