Welcome to Urdubiography
Home >> Showbiz >>Jackie Chan  

 

 

 

 

 

Jackie Chan

Jackie Chan  Photo

Jackie Chan is a multi talented super star. He was born on 7th April 1954 in Hong Kong during British hold. Jackie Chan is 61 years old. His parents belonged to the China. He is an action hero of Hollywood film industry. Jackie Chan is famous for his high and real stunts. More than 25 years he worked in the Asian films, after that he entered in Hollywood film industry and his first film was Police story in 1987. Jackie Chan is an expert in marshal art. At the age of six he admitted in Peking Opera School and started the training of acting. As an extra performer Jackie Chan worked with Bruce Lee in the film Fist of Fury in 1972 and Enter the Dragon in 1973. His first successful movie as a hero, it was Snake in the Eagles shadow in 1978. After this movie Jackie Chan worked in Drunken Master, Spiritual Kung Fu, Fairless Hyena, Dragon Fist, Dragon Lord and Project A. in 2005 the Bollywood actress Malika Sharawat also worked with Jackie Chan in the film The Myth. Jackie Chan married with the actress Ling Feng in 1982. She belongs to Taiwan. Jackie Chan is a actor, director, script writer, producer, action choreographer, singer, stunt director and martial artist. He is a very attractive and talented celebrity. Jackie Chan reciened many more awards on his successful career. His successful movies are Dragon Forever, Police Story 2, Miracles, A Kid from Tibet, Armour of God, Police Story 3, Twin Dragon, Rush Hour, Crime Story and City Hunter. In this page you can see the biography of the stunt hero Jackie Chan In Roman Hindi and Urdu.

Jackie Chan Biography In Urdu, Hindi


Action movies ke dildada afraad mein se shayad he koi aisa ho ga jis ne Jackie Chan ka naam na suna ho ga. Jackie Chan ne apni munfarid acting aur gher mamoli actions se bharpor manazir ke zariye film dekhne walon ke dilon mein wo jagah b na li hai jis ki khuwahish har fankaar karta hai. Inho ne film ki duniya mein qadam rakha aur bohat jald he ben ul aqwami shohrat hasil karne mein kamiyab ho gae. Khaas taur par inho ne Asia ke film dekhne walon mein maqboliyat ke kae records torhe. China se talluq rakhne wale Hong Kong ke super star Jackie Chan ki maqboliyat ki sab se barhi wajah in ke stunts hain, jinhe wo khud perform karte hain. Sath he in ki mazah se bharpor acting aur actions inhe deegar hum asar fankaron se munfarid bana deti hain. Jackie Chan ne aik taveel arsey tak China aur Hong Kong ki films ke zariye he apni shanakht banae rakhi, lekin inhe maloom nahi tha ke wo aik na aik din Hollywood ke super stars ki list mein bhi apne aap ko shamil kar lenge. Taqriban 25 baras se zaiyd arsa Asian films mein kaam karne ke bad, marshal art ke mahir is crorepati actor ne Hollywood ka rukh kiya. 1987 mein inhe Hollywood mein kaam karne ki peshkash hui. Jahan in ki pehli film police story thi. Jis ne tawaqqa se kae ziyada kamiyabi hasil ki. Jackie ka khayal tha ke isi tarah ki chand mazeed films ke bad American viewers bhi inhe janne lagenge aur phir har taraf Jackie Jackie ka charcha shuru ho jaega.


Agarcha Hollywood ke is nae actor Jackie Chan ka andaza ghalat na tha. Magar Hong Kong ke stunt man ke liye ben ul aqwami stardom ka yeh raasta in ki tawaqqa se bohat taveel sabit hua. Afsanvi kahaniyon ki tarah Jackie ke ibtedai halaat e zindagi bhi intehai kharab the. Jackie Chan 7 April 1954 ko British raaj ke dauran Hong Kong mein paida hue. In ke parents ka talluq China se tha. Jo civil war ke bad Hong Kong mein aabaad ho gae the. Jackie ki paidaish ke waqt in ke waldain nihayat he kasampursi ki zindagi guzaar rahe the. Inhe zaroriyat e zindagi aur ashiya khurd o nosh ke husool ke liye bohat jaddojehad karni parhti thi. Zindagi ki garhi khinchne ke liye Jackie Chan ke waldain sakht mehnat kar rahe the. Wo mukhtalif hotels mein saaf suthrai ka kaam anjaam dete ya bataur waiter kaam karte. In tamam mushkilaat mein bhi unho ne apne iklote bete Jackie Chan ki sehat ka bohat khayal rakha. Is baat ka aiteraaf khud Jackie Chan bhi karte hain. In ka kehna hai ke wo apni behtareen jasamat aur sehatmand jism ke liye apne walid ke shukar guzaar hain, jinho ne apne iklote bache ke liye behtareen sarbarah ki hesiyat se na sirf behtareen sehatmand khuraak ka intezaam rakha, bal ke inhe har tarah ki sahulat muhayya karne ki bharpor koshish bhi ki.


Jab Jackie Chan ke waldain Hong Kong ke Frances sifarat khana mein kaam karne lage to inho ne Jackie ko Hong Kong ke aik primary school mein dakhil karwa diya. Lekin 1960 mein inhe school ki taleem chorni parhi. Jab in ki umar baras hui to in ka khandan America ke sifarat khana mein kaam karne ke iradey se Australia ke dar ul hukomat muntaqil ho gaya, magar jald he Jackie Chan ko wapis Hong Kong bhej diya gaya. Jis ke bad inho ne taleem ke husool ke liye China ka rukh kia, Jahan inho ne Peking Opera School mein admission le liya aur acting ki training lena shuru kar di. Us dauran Jackie ko sakht mushkilaat ka saamna karna parha. Jackie Chan ki training shaam 5 baje shuru hoti aur raat ko dair se khatam hoti. Usi dauran inho ne singing ke sath sath marshal art ka funn bhi seekhna shuru kar diya. Jackie Chan ne 5 baras ki umar se he films mein kaam karne mein dilchaspi lena shuru kar di thi. 8 baras ki umar mein inhe films mein mukhtasir kirdar milna shuru ho gae the. 1962 mein inho ne film Big and Little Wang aur 1963 mein film The Love Eterne mein mukhtaisr role adaa kiye aur yun filmy safar mein in ka aaghaz ho gaya. Inho ne 1972 mein Bruce Lee ki film Fist of Fury aur 1973 mein Enter the Dragon mein bhi bataur extra perform kiya.


1973 mein Bruce Lee ki achanak maut ke bad taqdeer Jackie Chan par meharban ho gai. Action films ke aik director ne Jackie ko lagatar 2, 3 films mein cast kar lia aur yun action aur marshal art ki films mein aik nae super star ke ubharne ka amal shuru hua. Lekin Jackie Chan khud ko marshal art tak mehdood nahi rakhna chahte the. Jackie ka kehna hai ke wo Charlie Chaplin ki tarah banna chahte the, lekin marshal art ke director in mein dosra Bruce Lee dhoond rahe the. Isi liye in ke career ke ibtedaai saal marshal art par mabni films mein he kaam kar ke guzre aur inhi films ke badaulat inhe Asia, khaas tuar par Hong Kong aur China mein super star ki hesiyat hasil ho gai. Tahum jab Jackie Chan ne yeh mehsoos kiya ke inhe pasand kiya jane laga hai yo inho ne apne roles mein bohat si changing laani shuru kar di. Inhe is baat ka andaza tha ke Bruce Lee ke sath maar dhaar se bharpor roles ke dauran chot lagne se face ke tassurat ajeeb ho jate the. Inho ne inhi expressions se apne roles mein mazah ka rang bharna shuru kiya. 1976 mein Jackie Chan ko aik telegram mila, jis mein Wily Chan naami director ne inhe apni film mein kaam karne ki peshkash ki thi. Wily Chan, Jackie Chan ki karkardegi John ki film Hand of Death mein dekh chuke the. Is liye inho ne Bruce Lee ki maut ke bad Jackie Chan ko New Fist of Fury ke liye cast kiya. Jackie Chan ki pehli kamiyab film bataur hero 1978 mein release hone wali Snake in the Eagles Shadow thi. Is film ke bad Jackie Chan ka shumar Hong Kong ke super stars mein hone laga tha. Is ke bad inho ne Drunken Master, Spiritual Kung Fu, Fairless Hyena, Dragon Fist, Dragon Lord, Project A, jaisi kae films mein kaam kiya aur khoob shohrat sameti.


Agarcha inho ne Hollywood ka rukh 1980 se pehle he kar liya tha, lekin wahan inhe khatir khuwa kamiyabi milti nazar nahi aa rahi thi, phir bhi Jackie Chan ne himmat nahi haari aur bil aakhir 1985 mein in ki film bataur markazi actor Police Story release hui. Jis ke sath he duniya bhar mein Jackie Chan ki maqboliyat mein tezi se izafa hone laga aur inhe Hollywood mein aik ke bad aik films ki offers hone lagi. Hollywood mein Jackie Chan ki maqbool films mein Dragon Forever, Police Story 2, Miracles, Police Story 3, Armour of God, Twin Dragon, A Kid from Tibet, City Hunter, Rush Hour aur Crime Story jaisi films shamil hain. Jab ke 2005 mein film The Myth mein in ke sath Bollywood ki actress Malika Sharawat bhi jalwagar ho chuki hain.


Jackie Chan ne 1982 mein Taiwan se talluq rakhne wali actress Lin Feng se shadi kar lit hi. In dono ka beta aaj kal singing ke maidan mein qadam jamane ki koshish kar rahe hain. Is ke ilawa show business se talluq rakhne wale deegar artists ki tarah Jackie ke barey mein bhi mukhtalif afwahein janam leti rehti hain. Jackie Chan na sirf ache actor hain, bal ke acting ke sath wo director, script writer, producer, action choreographer, singer aur stunt director bhi hain.


Jackie Chan ki jo khasiyat inhe dosre artists se munfarid banati hai, wo in ke stunts hain. Jackie Chan apni films ke 90 % stunts khud he karte hain, kisi extra ki madad nahi lete. Yehi wajah hai ke taqriban har film ki making ke dauran wo zakhmi zaroor hote hain. Kaha to yeh bhi jata hai ke Jackie Chan ke jism ki shayad he koi haddi aesi ho jo in ke stunts ka shikar na hui ho. Yahan tak ke aik film ki making ke dauran in ki khopri ki haddi bhi bohat mutassir hui thi aur is jagah par steel ki plate lagani parhi thi. Isi wajah se in ki sunne ki salahiyat bhi mutassir hui hai. Apne kaam se isi lagan ki wajah se Jackie Chan film dekhne walon ke dilon par raaj karte hain. Apne fankarana career ke dauran inho ne kae awards apne naam kiye hain. Jackie Chan ki action se bharpor films ka silsila jaari hai aur wo screen par aaj bhi itne he chaaq o chauband nazar aate hain, jitney ibtedai dino mein the. Tahum pas pardah wo is baat ka aiteraaf karte hain ke umar guzarne ke sath in mein pehle jaisi phurti nahi rahi hai, lekin is ka matlab hargiz yeh nahi hai ke wo silver screen se kinara kasha ka iradah kar rahe hon. In ke nazdeek in ki zindagi ka maqsad he film industry hai. Is se alag hone ka wo soch bhi nahi sakte.

Tom Cruise Salman Khan Sonal Chauhan
Educated Bollywood Stars Shakira Emma Watson

 

 

 

 

@Copy right 2012-2015 www.urdubiography.com