Welcome to Urdubiography
Home >> Showbiz >>Jaya Prada

 

 

Jaya Prada

Jaya Prada Photo

Jaya Prada is a very famous Hindi Bollywood actress. She is wonderful dancer also. Jaya Prada is a very beautiful and versatile actress. She was born on 3rd April 1962 in Andhra Pradesh, India. Her Father was Krishna Rao, who was the financer of Tamil movies. She is very fond of dance since childhood. In 1976 Jaya Prada had been a very big actress of South film industry with hit movies. Jaya Prada completed in 300 films and worked in 8 languages in her 30 years career. She received best film fare Telugu actress award in 1983 and film fare life time achievement award in 2007. In 1994 Jaya Prada contributed in politics at the age of 32. In these days she is a member of Lok Sabah as an independent candidate. Jaya Prada married with a film producer named Srikant Nihata in 1986. In this page you can see the biography about Jaya Prada.

Jaya Prada Biography In Urdu , Roman Hindi

Jaya Prada Indian cinema ki un chand actresses mein se aik hain, jinhe in ke khudadad husun ki bina par be had pazeerai mili. Inhe agar husun ka majmooa kaha jae to be jana ho ga, kyun ke aisa lagta hai ke qudrat ne tamam tar khobiyan in ke paikar mein yakja kardi hain. Teekhe naqosh, lambe baal, sabk chehra aur is par aankhen aesi goya 2 jhilmilate roshan diye hon. Tahum in ki shohrat mein in ki fankarana salahiyaton ka bhi barha dakhal hai. Kyun ke wo acting ke sath fun e raqs mein bhi apna jawab nahi rakhti. Yehi wajah hai ke in ke paristaron mein mehaz aam film bean he nahi bal ke india ke khas khas afraad bhi shamil hain. Indian mutawazi cinema ke maroof director, Satyajeet ne Jaya Prada ko duniya ki haseen tareen aurton mein se aik kaha tha. Wo Jaya Prada ke sath aik film banane ke khuwahishmand the, lekin shayad zindagi ne inhe is ki mohlat nahi di.

South India se talluq rakhne wali Jaya Prada 3 April 1962 ko riyasat Andhra Pradesh mein Krishna Rao ke ghar paida hue, jo Tamil films ke financer the. In ka naam Lalita Rani rakha gaya aur chunke raqs o mauseeqi ko India mein ibadat ka sa darja hasil hai. Is liye bohat choti umer mein Jaya Prada ko raqs o mauseeqi ki tarbiyat hasil karne bhej diya gaya. Jab wo 14 saal ki thin to raqs mein is qadar maharat hasil kar chuki thin ke school ke salana functions mein dance karte dekh kar aik film director ne inhe apni Telugu film Bhomi Kasam mein 3 minute ke dance number ki peshkash ki. Jaya Prada ne yeh peshkash qabool kar li. Jis ka muaawza inhe mehaz 10 rupey mila. Behar e taur isi 3 minute ke dance ki badaulat wo 1976 mein kae hit movies ke sath South film industry ki barhi star ban chuki thin. Qismat shayad isi ko kehte hain ke Jaya Prada jo bachpan mein Doctor banne ke khuwab dekha karti thin. Fun e adakari ki nabz shanaas ban gai. Jaya ko bohat se aise kirdar mile jin mein inhe acting ke johar dikhane ka mauqa mila. Kashapnaat ki aik Telugu film mein Jaya Prada ne aik aesi goongi larki ka role play kiya. Jis mein raqs ki khudadad salahiyatein thin. Yehi film 1979 mein Sargam ke naam se bollywood mein banai gai jis mein Jaya Prada ke hero Rishi Kapoor the. Yeh khasi glamorous film thi, jis ke raqs o naghmaat ne charon taraf aik dhoom macha di thi. Khas taur par Rishi Kapoor ke sath filmaya gaya. Jaya ka song Dafli Wale bohat famous hua. Is song par Jaya Prada ne bohat kamal ka raqs kiya. Yun South Indian cinema mein dhoom machane ke bad Jaya film Sargam se bollywood mein mutarrif hui. Film Sargam ke kirdar par film fare award ke liye bhi in ki nomination hui, lekin chunke wo Hindi zaban se nawaqif thin aur is film ke liye in ke dialogues kisi aur ki awaaz mein dub kiye gae the, lehaza isi bina par inhe award nahi mil saka. Tab Jaya ne Hindi seekhna shuru ki aur bollywood film Kaam Chor mein rawani ke sath Hindi bolti hui jalwagar hui. Is ke bad Amitabh Bachan ki humrahi mein film Sharabi ne inhe mazeed kamiyabiyon se humkinaar kiya aur wo aik baar phir film fare award ke liye nominate hui.

Sharabi bhi super hit film thi. Jis ka aik song is qadar maqbool hua tha ke is ke bolon ki bazagisht aaj bhi suni ja sakti hai. Amitabh Bachan aur Jaya Prada par filmae gae, is gane ke bol kuch yun the ke Inteha Ho Gai Intezar Ki, Aai Na Kuch Khabar Mere Yaar Ki… Film Sharabi mein acting ke sath Jaya Prada ki raqs ki salahiyatein urooj par nazar aati hain. Amitabh Bachan jaise qad aawar actor ke maqabil apne aap ko sabit karna kisi aesi actress ke liye jo pehli baar in ke sath kaam kar rahi ho, aasaan nahi tha. Lekin Jaya Prada ka fun Amitabh Bachan ke chaa jane wali shakhsiyat ke saamne jaise kuch aur nikhar kar samne aaya. Khas taur se film Sharabi ke aik intehai maqbool gane Mujhe Nau Lakha Manga De Rey O Sayyan Dewane… par raqs karte hue wo bilashuba apne fun ke joban par nazar aati hain.

Bollywood mein Amitabh Bachan aur Jitendra ke sath in ki jorhi maqbool hui. Us waqt Sridevi, Jaya Prada ki sab se barhi hareef thin. Jaya Prada ki kamiyab bollywood film Tohfa Telugu zaban mein banai gai. In ki film Devta ka remake thi. Is qisam ki films ki badaulat mardon ke sath sath Jaya Prada ki khuwateen maddahon ki tadad bhi kam nahi thi. In ka yehi image us waqt bohat kaam aya, jab inho ne siyasat ka rukh kiya. Mutazakra bala films ke ilawa Insaniyat, aaj ka arjun, Maa, ganga jamuna, saraswati, mawali, in ki kamiyab films mein se hain. Jaya Prada ka shumar aesi khush qismat khuwateen mein hota hai. Jinhe 9 umri se he apne husun ka ehsaas ho jata hai. Is baat ka izhaar inho ne apne aik interview ke dauran kiya tha ke wo larhakpan he se apni janib uthne wali sataishi nazron ki aadi hain. Shayad yeh in ka roab husun he tha ke jis ne in ki adaaon mein bhi aik tamaknat si paida kar di thi. Inho ne 30 sala filmy career ke dauran 300 films mukammal ki aur 8 zabanon mein kaam kiya, jin mein Telugu, Tamil, Marathi aur India ki riyasat Karnatak mein boli jane wali zaban top of the list hain. 1983 mein inhe film fare best Telugu actress ka award aur 2007 mein film fare life time achievement award se nawaza gaya. Tahum 1994 mein jab 32 saal ki umer mein Jaya Prada ne siyasat mein qadam rakha to in ki filmy masrofiyat kam ho gai aur wo pukhta qisam ke role muntakhib karne lagi. 1986 mein inho ne film producer, Srikant Nihata se shadi ki jo pehle se shadi shuda aur 3 bachon ka baap tha. Yeh shadi bohat se ikhtelafaat aur uljhano ka baiys sabit hui, yahan tak ke alehdgi par is ka ikhtetam hua aur Jaya ka Maa banne ka armaan bhi pora na ho paya, jaisa ke shadi ke bad wo aksar apni us khuwahish ka izhaar kiya karti thin. Jaya ne siyasat ki ibtedah TDP yani Telugu party mein shamoliyat se ki. Bad men kuch ikhtelafat ki bina par wo TDP chor kar samaaj waadi party mein shamil ho gai. 2004 mein Jaya ne Rampur ke set se aam intekhabat mein hissa liya aur 85000 votes ki bartari se kamiyabi hasil ki. Dosri bar wo election mein 30000 votes se apne hareef par sabqat le gae. Lekin siyasat aur badnami ka choli daman ka sath hai, is liye Jaya Prada bhi badnami se nahi bach saken aur baaz ilzamaat ki bina par samaaj wadi party inhe chorni parhi. Magar phir india ke maroof siyasatdaan Amar Singh ne Jaya ko apni saraparasti mein le liya aur ab wo Amar Singh ke zair e saya siyasat mein apna muqaam banane ki jaddojehad mein hain. In dino Jaya Prada azaad candidate ki hesiyat se lok sabha ki rukun hain aur siyasat ke maidan mein tahaal sargaram hain. Lekin siyasat mein wo kitna he ooncha maqam kyun na hasil kar len, in ke maddah in ki payal ki jhankar aur dilnasheen adaaon ko kabhi nahi bhula sakte.

Mathira Salman Khan Sonal Chauhan
Educated Bollywood Stars Farooq Sheikh Anwar Maqsood

 

 

@Copy right 2012-2014 www.urdubiography.com