Welcome to Urdubiography
Home >> Showbiz >>Jerry Lewis  

 

 

 

 

 

Jerry Lewis

Jerry Lewis Photo

Jerry Lewis is a great funny man. He is a great and very famous comedian. Jerry Lewis was born on 16th March 1926 in New York America. He is also an actor, singer, producer, screen writer and director. Jerry Lewis received his education till 10th class. His Father hosted the stage programs and his Mother played piano in radio station. Jerry Lewis started his work on the stage with his parents at the age of five. He started his career with the actor, singer named Dean Martin. In 20th June 1948 Jerry Lewis and Dean Martin performed first live performance in Toast of the Town. In 1950 they hosted a show first time. They both worked in fourteen films of paramount pictures in 1956. After the death of Dean Martin, Jerry Lewis wrote a book named Dean and Me. He started his debut in the film named Delicate Delinquent as a comedian hero. Jerry Lewis got his first marriage in 1944 with a singer Patty Palmer and got 2nd marriage in 1983 with a dancer Sandy Pat nick. He has six son and one adopted daughter. In this page you can see the information and biography about Jerry Lewis in Urdu.

Jerry Lewis Biography

Comedy films ke shauqeen afraad mein se shayad he koi aisa ho ga, jis ne shehra e aafaaq comedian Jerry Lewis ka naam na suna ho. Actor, singer, producer, screen writer aur director Jerry Lewis 16th March 1926 ko America ke City New York mein paida hue. Maa Baap ne in ka naam Joseph rakha tha. In ke walid stage programs ki hosting kiya karte the,jab ke waldah radio station mein piano bajaya karti thin. 10th standard tak taleem hasil karne ke bad Jerry Lewis ko school chorna parha. Inho ne 5 baras ki umer se he apne waldain ke sath stage par apne fun ka muzahira shuru kar diya tha. Wo pehle pehal stage programs mein Joe Lewis ke naam se perform karte the, lekin bad mein inho ne apna professional naam Jerry Lewis rakh liya. Dosri jang e azeem ke dauran inho ne fauj mein bharti hone ki koshish ki, lekin kamiyab na ho sake.

Jerry Lewis ne apne career ka baqaida aaghaz singer, actor Den Martin ke sath kiya. Martin aur Lewis ki jorhi 1940 mein stage par maqbool hone lagi. In ki khas baat yeh thi ke wo pehle se tayyar kiye hue khakey pesh nahi karte the,bal ke stage par aik dosre ke sath hasb mauqa mazaq kiya karte the, usi dauran inho ne radio program bhi shuru kar diye. Martin aur Lewis ne Television par pehli live performance 20 June 1948 ko Toast of the Town mein di. Usi baras TV par in ki pehli series Welcome Aboard nashar ki gai. 1950 mein in ki jorhi ne pehli baar aik TV show ki hosting ke faraiz anjaam diye. Lewis aur Martin ki jorhi ne 1949 mein My Friend Irma ke zariye silver screen ka rukh kiya. 1956 tak inho ne paramount pictures ki 14 films mein kaam kiya. Is jorhi ki maqboliyat ka andaza is baat se bhi lagaya ja sakta hai ke aik Comic book Adventures of Den Martin and Jerry Lewis shaey ki gai. Jo is saal ki sab se ziyada farokht hone wali comic book thi, lekin films mein aane ke bad Jerry Lewis, Den Martin par haawi hone lage the aur yeh baat producer idaron ne bhi note kar li thi. Bil aakhir 24 July 1975 ko yeh jorhi toot gai. Jis ke bad dono fankaron ne apne apne anfaradi career ka aaghaz kar diya. In dono ko aakhri baar 1989 mein Den Martin ki 72 Birthday ke mauqa par aik sath dekha gaya. Den ki maut ke bad Jerry Lewis ne un ki yaad mein 1995 mein Den and Me ke naam se aik kitaab bhi likhi thi.

Den Martin ke sath kaam karne ke dauran Jerry Lewis ne singing ki taraf bhi tawajja di aur 1950 mein in ka gaya hua song Rock A Bye Your baby bohat famous hua. 1958 mein in ka album Jerry Lewis Just Sing release hua. Bataur comedian hero Jerry Lewis ki pehli film Delicate Delinquent thi. Paramount pictures ke sath lagataar 3 films karne ke bad jerry ka is producer idarey se 1960 mein baqaida muaaheda ho gaya. Usi baras Jerry Lewis ne apni zaati production Cinderella ki tayyari bhi shuru kar di. Jis ki release ke liye usi baras Christmas ka din muntakhib kiya gaya tha. Tahum paramount ne bhi film The Bell Boy banane ki peshkash ki, jise jerry ne qabool kar liya aur is film ki production, direction aur story writer ka kaam anjaam diya aur apni zaati production ke sath sath yeh film bhi mukammal kar li. Is ke bad Jerry Lewis ne kae dosri films ki direction di aur in ki stories bhi likhin. Jin mein sab se ziyada kamiyab The Nutty Professor aur Who’s Minding the Store ko hasil hui. 1963 mein Jerry Lewis ne films ke sath dobara TV shows bhi karne ka faisla kiya aur yun 1963 mein ABC channel se 2 ghante dauraniye ke The Jerry Lewis show ka aaghaz hua. Tahum hairat angez taur par yeh show nazreen mein wo pazeerai hasil na kar saka. Jis ki umeed ki ja rahi thi aur mehaz 13 weeks bad he use band kar diya gaya. Ab Jerry Lewis ne NBC ka rukh kiya aur 1 ghante ke variety show ka aaghaz kiya, jise khatir khuwa kamiyabi hasil hui aur yeh show 2 baras tak telecast hota raha.

1966 mein jab Jerry Lewis 40 years ke ho gae to inhe jismani aazaa ki madad se comedy karne mein mushkil pesh aane lagi aur wo ziyada tar makalmon ka sahara lene lage. Shayad isi wajah se box office par in ki maqboliyat kam hone lagi thi. Chunache paramount pictures ne in ke sath muaahedey ki tausee nahi ki. Ab Jerry Lewis ne Columbia pictures ke banner taley producing shuru ki aur kae maqbool comedy films banai. Usi dauran inho ne University of Southern California mein film direction ka mazmoon parhana shuru kar diya. In ke students mein Steven Spielberg ki pehli mukhtasir dauraniye ki film Amblin dekhi to kaha,is ko kehte hain filmsazi. Jerry Lewis ne 1968 mein Steven Spielberg ki film The Day The Clown Cried mein kaam bhi kiya, lekin yeh film maali mushkilaat ke baiys silver screen ki zeenat na ban saki.

Jerry Lewis TV aur films ke ilawa waqtan fawaqtan stage par bhi singing aur acting ke johar dikhate rahe. 1981 mein inho ne Hardly Working ke zariye dobara filmy duniya ka rukh kiya, jis ke bad 2013 tak 15 mazeed films mein kaam kiya. In ki nae film Big Fish abhi takmeel ke marahil mein hai. Tawaqqa hai ke yeh 2015 mein release ki jaegi.

Jerry Lewis ne 2 shadiyan ki. Pehli 1944 mein singer Patty Palmer se aur dosri 1983 mein 32 sala dancer Sandy Pat nick ke sath ki, jab wo 65 baras ke the. In ke 6 bete aur aik le palak beti hai, tahum aik beta manshiyat ki latt mein mubtila ho kar is duniya se rukhsat ho chukka hai. Jerry Lewis bhi mukhtalif bemariyon aur hadsaat ka shikaar hote rahe hain. 1965 mein aik stage performance ke dauran pesh aane wale hadsey mein in ki back bone mutassir hui aur khatra tha ke shayad wo zindagi bhar ke liye maflooj ho jaenge. Tahum Doctors ki mehnat aur Jerry Lewis ki himmat ne Khuda ki mansha ke sath mil kar aisa hone na diya. Lekin is ke bad se inhe dard door karne wali adwiya mustaqlan istemal karni parhti hain. Duniya bhar mein maujood apne lakhon maddahon ke dilon ko khushiyon se aashna karne wale Jerry Lewis ko ab tak 2 bar heart attack ho chukka hai. Aarzae qalb ke sath sath inhe cancer, diabetes aur lungs ke amraaz bhi lahaq hain.
Hollywood ke baaz deegar superstars ki tarah Jerry Lewis bhi rafahi kamon mein barh charh kar hissa lete hain. Wo 1950 se 2011 tak Muscular Dystrophy Association MDA ke chairman ke taur par faraiz anjaam dete rahe. Inho ne 1952 mein usi idarey ke liye attiyat jama karne ki khatir Telethon ka aaghaz kiya tha. Wo 1966 se 2010 tak baqaidgi ke sath har saal Jerry Lewis MDA telethon ki hosting ke faraiz anjaam dete rahe. Tahum 3 August 2011 ko aelaan kar diya gaya ke wo ab is show ki hosting jari nahi rakh sakengi.

Yun to Jerry Lewis ne apne taweel career ke dauran kar awards hasil kiye, lekin yeh baat hairan kun hai ke aalamgir shohrat o maqboliyat ke bawajood wo Oscar award hasil karne mein nakaam rahe. Is hawale se in ka kehna tha ke in ke nazdeek sab se barha aezaaz koi award nahi, bal ke maddahon ki taraf se milne wali pazeerai hai. Kaha jata hai ke logon ko hansana duniya ke chand mushkil tareen kamon mein se aik hai, tahum Hollywood ke yeh Legendary comedian actor 64 baras se bhi zaiyd arsey se logon ke faces par muskurahat bikherne ka fariza bahusun o khobi anjaam de rahe hain.

Mathira Salman Khan Sonal Chauhan
Educated Bollywood Stars Shakira Emma Watson

 

 

 

 

@Copy right 2012-2014 www.urdubiography.com