Welcome to Urdubiography
Home >> Showbiz >>Preity Zinta

 

 

 

 

Preity Zinta

Pretiy Zinta Photo

Preity Zinta is a dimpled beauty. She is an actress of Bollywood film industry. Preity Zinta was born on 31st January 1975 in Shimla district of Himachal Pradesh. Her Father Durganand Zinta was the officer in Indian Army. When she was 13th years old her father died a traffic accident. Preity Zinta received her early education in Boarding School of Shimla. She interested in the subject of English and likes the poems of Shakespeare. At that time of school, she liked basketball. She graduated in criminal psychology. After that Preity Zinta decided that she started her career in modeling. Preity Zinta is a very beautiful and gorgeous actress in the Bollywood film industry. She started from chocolate commercial. Preity Zinta started her film debut from the film Dil Se with Shahrukh Khan and Manisha Koirala. She has a cricket team named Kings Eleven Punjab in IPL. In this page you can see the information about Preity Zinta.

Preity Zinta Biography In Roman Hindi

Bohat kam artist aise hote hain, jinhe pehli he film se shohrat milna shuru ho jati hai. Aise he khushqismat artist mein se aik naam Bollywood ki shokh o chanchal star… Preity Zinta ka bhi hai. Wo 31st January 1975 ko Himachal Pradesh ke zila Shimla mein paida hui. In ke walid Durganand Zinta Indian Fauj mein officer the, lekin jab 13 baras ki hui to in ke walid aik traffic accident mein is duniya se kooch kar gae. Walid ki maut ke bad preity ne larkhkon wale taur tariqe apna liye, yun in ka bachpan Tom Boy ki tarah guzra. Inho ne Shimla ke Boarding School mein ibtedai taleem hasil ki. Wo is baat ka aiteraaf karti hain ke Boarding School mein rehne ki wajah se wo tanhai mehsoos karne lagi thin, jise door karne ke liye inho ne doston ke halqey mein panah dhondi. Zamana e talib e ilmi mein inhe English adab se lagao tha, wo khas taur par William Shakespeare ki poems pasand karti thin. Preity Zinta ka shumar apne school ke zaheen talba mein hota tha, us zamane mein in ka pasandeeda khel basket ball hua karta tha.

Preity Zinta ne criminal psychology mein post graduation ki sanad hasil ki, lekin expert psychology banne ke bajae modeling ki duniya mein apna career banane ka faisla kiya. Inho ne advertise se starting ki. In ka pehla TV commercial chocolate ka tha. 1997 mein Preity Zinta ki mulaqat filmsaaz Shaker Kapoor se hui, jin ka israar tha ke Preity Zinta mein actress banne ki tamam tar salahiyatein maujood hain. Shaker ne inhe Hrithik Roshan ke sath apni film Ta Ra Rampam ke liye muntakhib bhi kar liya tha, lekin is film ki aksbandi kuch wajood ki bina par shuru he na ho saki, tahum Shaker Kapoor ne Preity Zinta ki mulaqat director Mani Ratnum se zaroor kara di, jin ki film Dil Se ke liye Preity Zinta ko cast kar liya gaya. Is film ke deegar stars mein Shahrukh Khan aur Manisha Koirala shamil thin. Yeh film box office ar ziyada kamiyab nahi hui aur is mein Preity Zinta ka screen time sirf 20 minute ka tha. Is ke bawajood is film ne andaza laga liya ke Preity Zinta mein behtareen actress banne ki tamam salahiyatein hain. Isi dauran Preity Zinta ki dosri film Soldier release ho gai, jis mein inhe bataur heroin cast kiya gaya tha. In dono films mein shandar acting par inhe best new actress ka film fare award diya gaya, jab ke Dil Se mein jandar performance par inhe behtareen muaawin actress ke film fare ke liye namzad kiya gaya tha. Agarcha barhi kamiyabi thi lekin is ke bawajood Preity Zinta hindi films ke bajae Telugu films ki taraf mutawajja ho gai. 2 Telugu movies mein kaam karne ke baad Hollywood blockbuster Silence of The Lamb ki charba film Sangharsh ke sath Preity Zinta ki hindi films mein wapsi hui. Yeh film box office par kamiyabi to hasil na kar saki lekin is mein Preity Zinta ki film Kya Kehna ne box office par gher mutawaqqa kamiyabi hasil ki. Jis mein preity ne kam umer Single Mother ka kirdar nihayat khobi se ada kiya aur saal ki best actress ke film fare awards ki haqdar qarar paai. Usi baras film Mission Kashmir bhi release hui, jise box office par nakaami ka mou dekhna parha. 2001 mein Farhan Akhter ki film Dil Chahta Hai ne Preity Zinta ko Bollywood stars ki list mein shamil kara diya. Isi saal mutanazaq mauzoo par banai gai Abbas Mastan ki film Chori Chori Chupke Chupke release hui. Jis mein surrogate Mother ke taur par Preity Zinta ki performance ne sab he ke dil mouh liye.

2003 mein Koi Mil Gaya se Preity Zinta Bollywood ki saff e awwal ki actress mein shamil ho gai. Usi baras Karan Johar ki film Kal Ho Na Ho ki release ne to in ki maqboliyat mein char chand laga diye. Is se agle baras Preity Zinta ki 3 films release hui, lekin kamiyabi sirf Yash Chopra ki film Veer Zaara ko mil saki. 2006 tak inho ne 6 films mein kaam kiya, jis mein sab se ziyada kamiyabi Karan Johar ki aik aur film Kabhi Alvidah Na Kehna ne hasil ki aur shayad isi ko Preity Zinta ki tahaal aakhri kamiyab film qarar diya ja sakta hai. Is ke bad agarcha inho ne kae films mein kaam kiya, lekin koi bhi box office par ziyada kamiyabi hasil na kar paai. 2007 mein pey dar pey nakamiyabiyon ke bad Preity Zinta ne art films ka rukh kiya aur aik English film The Last Layer mein bhi kaam kiya. Yeh film Toronto film festival mein pesh ki gai, jahan ise bohat saraha gaya. Isi baras Jhoom Barabar Jhoom aur Janeman bhi release hui, tahum in ke bad Preity Zinta ne ziyada films mein kaam nahi kiya. In ki aakhri film Ishq In Paris 2013 mein release hui thi, jis ki director aur producer bhi khud Preity Zinta he thin.

Preity Zinta ne acting ke ilawa kae deegar shobon mein bhi apni salahiyaton ka muzahira kiya. 2004 mein inho ne BBC online ke liye mukhtalif mauzoaat par column likhne shuru kiye, jinhe duniya bhar mein pazeerai mili. Khas taur par is ke teesre column ko behad saraha gaya. Jo inho ne Bollywood se milne wali shohrat o maqboliyat ke baaz negative pehloun ke barey mein likha tha. Is ke sath he Preity Zinta ne Television aur stage programs mein hosting ke faraiz anjaam dene ke ilawa stage performance bhi jari rakhi.
Preity Zinta rafahi kamon mein bhi barh charh kar hissa leti rahi hain. Khas taur par Aids jaise mohlik marz se mutalliq shaoor baidaar karne ke liye inho ne kae programs mein shirkat ki. 2007 mein Preity Zinta ne aik samaji tanzeem Khushi mein shamoliyat ikhteyar kar li, jo Mumbai ki sarhkon par phirne wale Lawaris bachon ki falah o behbood ke liye kaam karti hai. 2009 mein apni 34th Birthday ke mauqey par Preity Zinta ne aik Yateem Khana ki 34 ladkiyon ki tamam maali zimmedariyan khud uthane ka aelaan kiya. 2010 mein inhe widows aur Yateem bachon ke liye kaam karne wali aik tanzeem ki taraf se apna brand ambassador muqarrar kiya gaya. Preity Zinta ka kehna hai ke zaroratmandon ki awaaz banna inhe bohat khushi dena hai.

School ke zamane mein Preity Zinta ka pasandeeda game basket ball tha, lekin filmy duniya mein qadam rakhne ke bad jis game mein in ki wazeh dilchaspi nazar aai, wo cricket hai. Is khel mein in ki dilchaspi itni barh gai ke 2008 mein jab Indian premier league IPL ka aaghaz hua to Preity Zinta ne Nays Wadena ke sath mil kar Kings Eleven Punjab naami cricket team ke malikana huqooq hasil kar liye, us waqt tak wo business mein akeli khatoon thin.

Beshtar super stars ki tarah Preity Zinta ka career bhi tanazaat aur scandals ki zadd mein raha hai. 2003 mein jab Chori Chori Chupke Chupke ka financer Bharat Shah, Mafia Don… Chota Shakeel se talluqaat ke ilzaam mein giraftar hua to Preity Zinta ko bhi gawahi ke liye court ke chakkar lagane parhe. Jis ke bad inho ne court ko bataya ke inhe under World ki taraf se dhamkiyan mil rahi hain. Court ki taraf se inhe security farahum karne ka hokum diya gaya. Aik zamane mein model Mark Robinson se Preity Zinta ki dosti ka charcha hua, yeh dosti taqriban 3 baras tak chali. Is ke bad Preity Zinta ki mulaqat business man Nays Wadena se hui, jo aage chal kar romance ki shakal ikhteyar kar gai. In dono ne mangni ka aelaan bhi kiya, lekin IPL ki karobari shirakatdari ke masaiyl ne in dono ke zaati talluqat mein bhi dararhen daal di. Yahan tak ke May 2009 mein dono ne apne talluqat khatam karne ka aelaan kar diya. 2012 mein diye gae aik interview mein Preity Zinta ne kaha hai ke wo aur Nays Wadena sirf dost hain, ache dost nahi. Tahum IPL ki team Kings Eleven Punjab ki malkiyat mein in dono ki partnership tahaal barqarar hai. Shayad isi liye baaz najomiyon ne peshgooi ki hai ke jald he in dono ke talluqat aik baar phir pehle jaise ho jaenge.
Aage Aage Dekhiye Hota Hai Kya.

Mathira Salman Khan Sonal Chauhan
Educated Bollywood Stars Farooq Sheikh Asif Ali Zardari

 

 

 

 

@Copy right 2012-2014 www.urdubiography.com