Welcome to Urdubiography
Home >> Showbiz >>

 

 

 

 

Richard Burton

Richard Burton Photo

Richard Burton was the Shakespearean actor in Hollywood film industry. He was born on 10th November 1925 in Welsh, Pontrhydyfen, United Kingdom. Richard Burton had 13th siblings. He started his career from stage in 1940 till 1950 as a distinguish actor. Richard Burton played a very beautiful role in 1964 as Oliver in Hamlet. His first movie was “ The Last Days of Dolwyn ”. Richard Burton entered in Hollywood film industry in 1952. Then he worked in first Hollywood movie named “ My Cousin Rachel ” as a prominent role and he received the golden globe award for best new actor. His famous film was “ Cleopatra ”, it was a very expensive movie at that time. Richard Burton died cause of damage of brain arteries on 5th August 1984 in Celigny,Switzerland at the age of 58. In this page you can see the biography of Richard Burton In Urdu and Roman hindi.

Richard Burton Biography

British and American film industry ki tareekh Richard Burton ke tazkarey ke bagher mukammal nahi ho sakti. Filmy duniya mein sirf acting ki salahiyaton ki badaulat he nahi bal ke wo apni munfarid awaaz aur mardana wajahat ki wajah se bhi 40 saal tak aik mumtaz hesiyat ke malik rahe. Richard Burtonki pori zindagi nashaib o faraz se ibarat rahi. Wo khasi daulat ke sath bepanah shohrat kama kar is duniya se rukhsat ho gae. Apne daur ki haseen filmy Sahira Elizabeth Taylor se 2 martaba shadi aur dono he martaba divorce ki badaulat bhi in ki shohrat mein izafa hua aur aik arsey tak khuwas o awaam mein in ke charchey rahe. Richard Burton 10 November 1925 ko Wales ke aik village Pont Ryfen mein paida hue. 13 behan bhaiyon mein in ka 12 number tha. Paidaiysh ke bad in ka naam Richard Walter Jenkins rakha gaya tha, tahum in ke naam ke sath Junior ka lahqa lagaya gaya kyun ke in ke walid ka naam bhi yehi tha. Richard abhi 2 saal ke he the ke in ki Mother apne 13 bache ko janam dete hue inteqal kar gai. Richard Burton ki parwarish ki zimmedari in ki sab se barhi behan Sessile aur in ke husband ne sambhali. Richard Burton baad mein kaha karte the ke meri behan mere liye Maa se barh kar thin, wo aik bohat he eisaar pasand khatoon thin, jinhe apne nahi dosron ke dukhon ki fikar rehti thi. School ke zamane mein he angrezi aur welsh adab se Richard Burton ki gehri dilchaspi ka izhaar hone laga tha, tahum inhe cricket, table tennis aur rugby se dilchaspi thi. Aik sawanah nigaar ne in ke barey mein likha hai ke agar wo actor na hote to yaqinan player hote.


Apne aik school master Flip H Burton se mutassir ho kar wo acting mein bhi dilchaspi lene lage aur inho ne school ke dramas mein hissa lena shuru kar dia. Flip Burton bhi in se itna pyaar karte the ke bad mein inho ne qanooni taur oar Richard ko apna ley palak beta ban alia aur Richard ne inhe ka naam zindagi bhar ke liye apne naam ke sath lagaya. Wo 3 saal air force mein bhi rahe, lekin is dauran parhte bhi rahe. Nazar ki kamzori ki wajah se inhe air force se subukdosh kar dia gaya. School ke zamane se he in ki wajahat ki wajah se kafi ladkiyan in mein dilchaspi leti thin. Richard Burton ne bohat he kam umri mein cigarette aur drink bhi shuru kar di thi. Yeh kharab aadatein shayad inhe apne asal walid ki taraf se virsey mein mili thin ya in mein drink karne lage the. Inho ne jab acting ki duniya mein qadam rakha to pehle 1940 se le kar 1950 ki dehaai ke awaiyl tak British mein he aik shandar aur mumtaz stage actor ke taur par apna naam mustehkim kia. Wo bad mein jab Hollywood mein aik super star ban gaye, tab bhi stage in ka aik mazboot hawala raha, bal ke in ke he daur ki aik nihayat famous saathi actress Sophia Lauren ne to inke barey mein khayal zahir kiya hai ke shayad Richard Burton zindagi bhar faisla nahi kar sake ke wo stage ke actor hain ya film ke ???
In ki aik khoobi yeh bhi ke wo zabaan o beyaan, lehjey aur tallafuz par bohat zoor dete the. Aik baar to inho ne yahan tak keh dia ke zaban o beyan ke ilawa duniya mein rakha he gaya tha. Isi liye inhe Shakespearean actor bhi kaha jata hai. 1964 mein inho ne Hamlet mein Oliver ka role itni khobsurti se adaa kia ke naqadeen ke khayal mein agar Oliver ka haqiqatan duniya mein koi wajood hota to wo hu ba hu waisa he hota. Is stage drama aur film mein in ki acting aur makalmon ki adaiygi kabhi faramosh nahi ki ja sakti. Stage par yeh Broadway mein sab se ziyada taweel arsey tak chalne wala drma tha. In ki pehli film The Last days of Dolwyn England mein bani thi. Is film ke set par in ki pehli mulaqat naujawan actress Cybil Williams se hui thi jo is film ki heroin thin. 2 saal bad Richard Burton ne in he se shadi kar li lekin 1963 mein Elizabeth taylor se Richard ke zordaar ishq ke charchey aam hone ke bad Cybil se in ki divorce ho gai. Cybil Williams se in ki 2 betiyan hain.


1952 mein Richard Burton ne Hollywood mein qadam rakha. Yahan in ki pehli film My Cousin Rachel thi, jis mein inhe markazi kirdar mila. Apni pehli he film par wo Oscarke liye nominate hue, jab ke best new actor ka golden globe award inho ne hasil kar lia. Isi zamane mein in ki pehli mulaqat Elizabeth Taylor se aik party mein hui lekin in ke darmiyan Pehli Nazar Mein Ishq wala muaamla nahi hua. Elizabeth us waqt Michael Wielding ki wife thin aur pregnant thin. Agley saal Richard aik aur film The Robe mein kaam kar ke aik baar phir Oscar ke liye nominate hue. Dilchasp baat yeh hai ke wo 7 martaba Oscar ke liye nominate hue, lekin yeh award inhe kabhi mila nahi. Tahum inho ne golden globe ke ilawa Bafta aur Tony award zaroor hasil kiye. The Rains Of Ranchipur mein inho ne aik Hindu ka role kiya. Us dauran wo stage par Shakespeare ke dramas mein bhi kaam karte rahe. Duniya bhar mein in ki sab se ziyada hulchul machane wali fil Cleopatra thi, jo us waqt tak ki, sab se expensive movie thi. 1963 mein is film par 40 million, yani 4 crore dollar lagat aai thi. Is film ne duniya mein to jitni dhoom machai so machai, lekin is ki tayyari ke dauran khud Richard Burton ki private zindagi mein barhi hulchul barpa hui.


Elizabeth Taylor ne is film mein Cleopatra ka role is tarah ada kia ke aaj tak koi aur actress in ke taari kiye hue sehar ko nahi torh sakti. Elizabeth Taylor ke husun aur khadokhal ki khobsurti ko is role mein jaan daalne ke liye bharpor tariqey se istemal kia gaya. Khaas taur par in ki aankhon ke make up par bohat mehnat ki gait hi aur shayad Richard Burton inhe aankhon mein doob kar reh gaey. Dono he aik dosre ke ishq mein giraftar ho chuke the, lekin shadi nahi kar sakte the, kyun ke dono he shadi shuda the. Elizabeth Taylor in dono Eddy Fisher ki wife thin. Tahum in dono ke darmiyan divorce ke liye adaalti karwai shuru ho chuki thi. Richard Burton aur Cybil ke darmiyan bhi divorce ke liye karwaai shuru ho gai, lekin dono divorce ki karwaai mukammal hone mein aik saal lagna tha. Yahni 1964 tak Richard Burton aur Elizabeth Taylor baqaida taur par aik dosre ke nahi ho sakte the. In ke ishq ki garma garam news ne bhi deegar awamil ke sath sath film ki shohrat mein khatir khuwa izafa kia aur duniya bhar mein is ki release ka bechaini se intezar kia jane laga. Is ki tawalat 6 hours tak pohanch gai. Ise kaat peet kar 4 hours ki film banaya gaya aur is ne aalmi satah par zabardast kamiyabi hasil ki.


15 march 1964 ko Montreal mein Richard aur Elizabeth ne aik dosre se pehli shadi ki, jis par Richard Burton he nahi, Elizabeth beinteha khush thin aur inho ne kaha tha, yeh Shadi humesha chalegi. Lekin in ka yeh khayal ghalat sabit hua. Ishq ka bhoot pehle Elizabeth he ke sir se utra. Divorce ka mutalba inho ne he kia aur shadi ke taqriban 10 saal bad dono ke darmiyan divorce ho gai. Us dauranRichard Burton ne Elizabeth Taylor ko jawahraat se muzayyan kae besh qeemat zevraat tohfey mein diye. Divorce ke aik saal bad in ki mohabbat phir ooad kar aai aur inho ne dobara aik dosre se shadi kar ke filmy duniya mein aik new record qaiym kia, lekin is baar in ki shadi sirf aik saal he chal saki aur is ka ikhtetaam bhi divorce par he hua. Is divorce ke aik month baad heRichard Burton ne model Suzy Miller se shadi kar li. Is shadi ka ikhtetam bhi 1982 men divorce par hua. Zindagi ke aakhri saal mein, yani 1983 se 1984 ke dauran make up artist Sally Richard Burton ki wife thin. Richard Burton ki kuch fims ka tazkara ho chuka hai. Mazeed chand qabil e zikar films ke naam yeh hain :


Alexander the great, Who is afraid of Virginia Wolf, Look back in Anger, The Spy who came in from cold, The Taming of the Shrew, Anne of the Thousand Days aur Equus.


Richard Burton ne 4 aurton se shadiyan ki, tahum Elizabeth se dobara shadi ki wajah se in ki shadiyon ki tadad 5 hai. In ke 4 bache hain. In ki zindagi humesha jazbati inteshar aur nashaib o faraz ka shikaar rahi. Naqadeen is baat par mutaffiq hain ke wo apni shakhsiyat aur salahiyaton ka sahi taur par istemal nahi kar sake aur inho ne apne aap ko taqriban waste he kar lia. Hadd se ziyada drinking in ka mustaqil masla rahi. Jis ki wajah se wo sehat ke masaiyl ka bhi shikar rahe. 58 saal ki umar mein brain ki arteries phat jane ke baiys in ka inteqal hua. Us waqt wo Switzerland ke City Celigny mein rehaiysh pazeer the. Wahin in ki tadfeen hui…

Mathira Salman Khan Sonal Chauhan
Educated Bollywood Stars Farooq Sheikh Emma Watson

 

 

 

 

@Copy right 2012-2015 www.urdubiography.com