Welcome to Urdubiography
Home >> Showbiz >> Salman Khan  

 

 

 

 

 

 

Salman Khan

Salman Khan Photo

If you like bollywood films then it is obvious for you to know Salman Khan. Salman Khan born in Indore on 27 December 1965. His father Salim Khan is also an actor and writer in bollywood film industry. Salman Khan started his film career in 1989 from the film “maine pyar kiya.” After that film Salman Khan’s film career went to the top and he acted in many super hit films like “baghi, pathar ke phool, sanam be wafa, qurban, sajan, andaz apna apna, hum aapke hain koun, karan arjun, hum dil de chuke sanam, wanted, dabang, body guard, ready.” Salman Khan is not only a good actor but he is also a social worker. He is running a NGO called Being Human. In this page, you will read bollywood actor Salman Khan Biography in Urdu.

Salman Khan Biography In Urdu

Bollywood par guzishta kai dehaiyon se Khanon ka raj hai. Unhein mein se aik Salman Khan bhi hain. Salman Khan ka janam 27 December 1965 ko Bharat ke shehar Indore mein mazi ke adakar aur screen writer Saleem Khan ke ghar mein howa. Saleem Khan ke bachon mein Salman ka phela number hai jab ke in ke chote bhai Arbaz aur Sohail Khan bhi filmi sanat se hi wabasta hain. Salman Khan ne Gawaliyar aur Mumbai mein apni taleem mukamal ki.

Salman Khan ne filmi safar ka aghaz 1988 mein “biwi ho to esi” mein bator mawin adakar kiya tha, jis mein un ke mukalmon ki adaigi theek na hone ke bais kisi aur ki awaz mein dabbing ki gai thi. Isi leye Salman ki pheli film 1989 mein release hone wali “main ne piyar kiya” kehlai. Ye film kuch itni kamyab hoi ye is ne Salman Khan ko raaton raat super star bana deya, isi film ke leye Salman Khan ko behtareen “naye adakar” ka film fare award diya gaya, jab ke isi ke sath un ko behtareen markazi kirdar ke leye bhi naamzad kiya gaya tha. Is film ki yadgar kamyabi ka andazah is baat se bhi lagaya ja sakta hai ke ese English aur hispanwi zabanon mein dab kar ke mukhtalif mumalik mein numaish ke leye pesh kiya gaya aur is ne har jagah record kamyabi hasil ki. 1990 mein Salman Khan ki film “Baghi” release hoi aur ye bhi box office par hit ha gai. Is ke bad Salman ki lagatar teen filmon “pathar ke phool” “sanam bewafa” aur “qurban” ko juzwi kamyabi hasil hoi, isi baras Salman Khan ne Madhori aur Sanjay Dat ke sath “sajan” mein kaam kiya. Ye film box office par super hit rahi, is ke sath naqadeen ne bhi bohat pasand kiya. Yun Salman Khan aik mustanid super star ban gaye lekin aane wale do baras Salman ke career ke leye ache sabit na howae. 1992 se 1993 ke doran Salman ki 6 filmein nakaam hoein, kuch logon ka khayal tha ke shayad un ka career zawal pazer ho gaya hai lekin esa nahi tha. 1994 ke awail mein “andaz apna apna” ne aik bar phir Salman Khan ko kamyabi ki shahrah par gamzan kar diya.

1994 mein hi release hone wali film “hum aapke hain koun” block buster sabit hoi, is film ke hisse mein kai awards bhi aaye. Alami satah par is film ne 1.35 arab Bharti rupe (taqreban 21 million American dollar) ka business kiya. Ye film us waqat tak ki sab se ziyadah business karne wali film qarar pai aur 7 baras tak cinema gharon ki zenat bani rahi. 1995 mein Salman aur Shahrukh Khan ki filn “karan arjun” release hoi jise osat satah ki pazirai mili. Tahum Salman ke career par is ke bais kisi kism ke manfi asrat nahi pare. Agle 4 baras tak Salman Khan ne “piyar kiya to darna kia” aur “jurwan” samet taqreban 10 filmon mein kaam kiya. Agar cha ye filmein box office par ziyadah acha tassur na chor sakein lekin Salman ka shumar batadrij saf e awal ke adakaron mein hone laga. 1998 mein Karan Johar ki film “kuch kuch hota hai” saal ki behtareen film qarar pai, is film mein Salman Khan ne bator mehman adakar ke tor par kaam kiya lekin unhon ne ye mukhtasir kirdar is khubi se ada kiya ke behtareen mawin adakar ke film fare award ke haqdar qarar paye. 2009 tak Salman ne kai filmon mein kaam kiya jin miens kuch kamyab hoein aur kuch ne nakami ka mun dekha, lekin aik tamil film ke remake “wanted” ne shayad Salman ke career ke zaren dor ka aghaz kar diya. 2013 tak in ki 5 filmon “dabang” “body guard” “ready” “aik tha tiger” aur “dabang 2”ne yak ke bad degare 100 karor rupe ka business karne wali filmon ke club mein apni jagah banai aur jab 200 karor rupe business karne wali filmon ka club qaim howa to is mein un ki 4 filmein bhi shamil ho gaein aur wo Salman Khan ke sath sath Dabang Khan ke naam se bhi mashhor ho gaye.

Salman Khan ka filmi career nihayat shandar tasawor kiya jata hai. Tahum filmi sanat ke har super star ki tarah un ke bhi scandals khabron ki zad mein rahe. Bollywood ki kai heroines ke sath un ke mashqe manzar e aam par aate rahe, jin mein sab se ziyadah qabil e zikar Sangeta Bajlani, Somi Ali, Ashwariya Ray, Katrina Kef ke sath un ki dostiyan sabit hoein. Khas tor par “hum dil de chuke sanam” ke bad Ashwariya Ray ke sath un ki dosti ka media ne khob charcha kiya lekin 2002 mein un ke taluqat talkhi par khatam howae aur Ashwariya Ray ne Salman khan par hirasan karne ka ilzam bhi lagaya. Yehi nahi Salman Khan ki zindagi kai tanazeaat se bhi ebarat rahi. 28 September 2002 ko un ki gari be qabo ho kar Mumbai ki aik bakery mein ghos gai jis ki wajah se bakery ke ahate mein soya howa aik shakhs halak ho gaya aur Salman Khan ko jail ki hawa khani pari, un par beparwahi se driving karne ka ilzam lagaya gaya. Tahum 11 baras bad bhi ab tak un par ilzam sabit nahi ho saka. 17 February 2006 ko Salman Khan ko nadir o nayab kale hiran (black deer) ke shikar ke jurm mein adalat ne aik saal qeed ki saza sunai, tahum is fasle par appeal ke doran un ki saza par amal dar aamad rok diya gaya, ye case ta hal Salman Khan ke leye dar e sar bana howa hai. September 2010 mein Salman Khan ko us waqat shaded tanqed ka samna karna para, jab unhon ne mumabi hamla case ke bare mein aik interview mein ye kaha ke is mamle par itna shor is leye machaya ja raha hai ke is bar hamla ashrafiya par howa aur five star hotels ko nishana banaya gaya. Is bayan par unhein BJP, Shiv sina aur degar siyasi jamaton ki tarah se sakht nukta chini ka samna karna para.

Salman Khan ne apne filmi career ke doran filmon mein adakari ke sath sath kai TV shows ki mazbani ke faraiz bhi anjam deye, jin mein “das ka dum” aur “big boss” qabil e zikar hain. Unhon ne “dabang” samet kuch filmon mein golokari ke shube mein bhi taba azmai ki. 1997 ki film “dil to pagal hai” ke leye malbosat design kiye, “pathar ke phool” aur “veer” ki kahani likhi, “wanted” aur “chilar party” jesi jesi bamaqsad filmein produce kiein. Is ke elawa bator model wo kai mashrobat aur degar masnoat ki tashhiri muhim ka bhi hissa rahe.

Salman Khan ka shumar bollywood ke insane dost fankaron mein hota hai. Filmi duniya mein aane ke bad wo kai falahi kaamon mein sharik rahe. Isi doran unhon ne aik rafahi tanzeem Being Human ki bunyad rakhi, jo online aur mukhtalif stores par T shirts farokht karti hai aur is ki amdani se mashi mehromiyon ka shikar afrad ki madad ki jati hai. 2011 mein in NGO ko aik trust ki shakal de di gai jo ghareb bachon ko taleem aur sehat ki saholatein farham karti hai. 2011 mein hi unhon ne “Salman Khan Being Human Productions” ke naam se apna production house qaim kiya. Is idare ke tehat banne wali filmon ki aamdani bhi falahi sargarmiyon mein istemal ki jati hai. Is silsile mein pheli film “chilar party” ne teen national awards hasil kiye. January 2012 mein Salman Khan ne 40 lakh rupe ada kar ke un qediyon ko rehai dilwai jo mehaz jurmana ada na kar pane ki wajah se Uthar Pardesh ki jailon mein qed the. Salman Khan ki zindagi par agar tairana nagah bhi dali jaye to ye andaza bakhobi ho jata haike bazahir chulbula sa nazar aane wala shakhs behtareen entertainer hone ke sath sath apne sene mein aik nihayat hasas aur dard mand dil bhi rakhta hai.

Mathira Anwar Maqsood Sonal Chauhan
Educated Bollywood Stars Farooq Sheikh Emma Watson

 

 

 

 

@Copy right 2012-2014 www.urdubiography.com