Welcome to Urdubiography
Home >> Showbiz >> Shakira

 

 

 

 

 

Shakira

Hollywood Pop Singer Shakira Photo

Shakira is a pop singer and dancer of Hollywood. She is also a record producer, writer, choreographer and model. Shakira was born on 2nd February 1977 in Columbia. She received her early education in Columbia and practiced of different languages. In school Shakira sang songs in Hispania and Arabic languages. Her style is rock and roll. She is also a belly dancer. Shakira’s Father belongs to the Lebanon and Mother belongs to the Spain and Italy. She has 8 step siblings. Shakira wrote her first poem at the age of four. She sang her debut song at the age of eight, the song is “ Your Dark Glasses ”. Shakira sang a song for the football World cup of 2010, the song is very famous “ Waka Waka, This Time For Africa ”. She judged and coach of the reality music show The Voice in 2013. Shakira awarded 5 MTV, 8 Latin, & Bill Board Music and 28 Latin Bill Board awards in her career. She nominated for the Golden Globe award. She sings songs in many different languages. Shakira married with a foot bowler of Hispania named Gerard Pique and they have a son. In this page you can see Biography about hollywood pop singer Shakira In Urdu and Roman Hindi.

Shakira Biography In Hindi

Aam taur se pop music mein American aur British singer ki ajaradari rahi hai. Tahum is maidan mein bohat se aise afraad bhi aae, jin ki maadri zaban angrezi hai. Na he in ka janam America ya England mein hua, phir bhi wo duniya bhar ke Pop Ideal kehlate hain. Inhe mein se aik naam gulokaar, raqasa, record producer, writer, choreographer aur model… Shakira ka bhi hai. Shakira 2 February 1977 ko Columbia mein paida hui. Isi shehar mein ibtedai taleem hasil ki, jis ke dauran inho ne mukhtalif languages bhi seekh len aur kam umri he se wo school ki taqribaat mein Hispania aur Arabic languages mein gane lagi. In ke gano mein Rock and Roll andaaz numaya tha. Jab ke wo kisi mahir raqasa ki tarah belly dance bhi karne lagi thin. Shakira ke walid ke gharane ka aabaai talluq Lebanon, jab ke waldah ke gharane ka Spain aur Italy se tha. In ke 8 sautele behan bhai bhi hain. Shakira poetry par bhi taba aazmaai karti hain. Inho ne apni pehli nazam 4 baras ki umer mein likhi thi. Wo apne walid ko type writer par stories likhte dekh kar bohat mutassir hui thin. 7 saal ki umer mein Christmas ke mauqey par type writer ka tohfa hasil karne ke bad inho ne isi par apni nazmein likhne ka silsila jari rakha. Yehi poems bad mein in ke songs ka hissa ban gai.

Jab Shakira 2 baras ki thin to in ke aik bhai motor cycle accident ke natije mein chal base the. Jis ka in ke waldain ko be had dukh tha. Isi dukh ko Shakira ne 8 baras ki umer mein apne pehle song Your Dark Glasses mein biyan kiya tha. Arabic language se in ki ibtedai waqfiyat us waqt hui. Jab in ke walid inhe le kar aik Arabic restaurant mein gae. Jahan inho ne pehli bar riwayti Arab mauseeqi suni aur belly dance dekha. Usi waqt Shakira ne table par charh kar dance karna shuru kar diya aur yahin se in ke waldain ko andaza ho gaya, ke in ki beti mein stage artist banne ki salahiyatein maujood hain. Pehle pehal Shakira ne school mein apne teachers aur class fellows ke saamne perform karna shuru kiya, tahum jab inho ne Catholic School ke saqafti tayfe ke liye audition diya to in ki teacher ne yeh keh kar inhe mustarid kar diya, ke in ki awaaz bakri jaisi hai. Tahum Shakira ne himmat na hari aur ziyada tawajja belly dance par dene lagin, yahan tak ke inhe school mein Belly Dancer kaha jane laga. 13 baras ki umer ko pohanchne tak Shakira ko mukhtalif stage programs mein bulaya jane laga. Isi dauran in ki mulaqat maqami theater ke producer se hui. Jo in ki performance se mutassir hue aur inhe ki koshishon se Shakira America ke aik music studio tak ja pohanchi, jahan in ka audition hua, agarcha us waqt inhe koi khas kamiyabi na mili, lekin studio mein maujood musicians aur deegar afraad ko Shakira ke talent ka andaza ho gaya tha. Isi liye kuch he dino bad Shakira ke apne shehar mein aik audition rakha gaya, jis mein Sony Studio ke sarbarah ko bhi maddou kiya gaya. Is audition mein Shakira ne 3 songs gaey, jo kisi bhi musician ko mutassir karne ke liye kafi the aur yun pehle music album ke liye in ka muaaheda tey paa gaya.

Shakira ke pehle 2 album Hispania language mein the, lekin inhe wo kamiyabi hasil na ho saki, jis ki tawaqqa ki ja rahi thi. Tahum itna zaroor hua kea b in ka shumar qabil e zikar latin Hispania singers mein hone laga. 1996 mein Shakira ka 3rd album Piz Di Colza release hua. Jise latin singing sunne walon mein pazeerai hasil hui. Isi dauran Shakira ne belly dance aur singing ke aik muqabley mein hissa liya aur is mein 3rd position hasil ki. Is muqabley mein in ka qareeb tareen hareef rock star Ricky Martin tha. 1996 mein Shakira ne pehla aalmi tour kiya, jis ke dauran inho ne 20 shows kiye.

English music ke maidan mein Shakira ne apne 3rd album Laundry Service ke sath 2001 mein qadam rakha, jis ki duniya bhar mein 2 crore se ziyada copies farokht hui aur yun Shakira ka shumar aalmi shohrat yafta pop stars mein hone laga. Is album ka geet When Ever, When Ever 2002 mein sab se ziyada farokht hone wala Single qarar paya tha. 2005 mein Shakira ne apna famous song Hips Don’t Lie gaya, jise 21st century ka sab se ziyada farokht hone wala single samjha jata tha. Shakira ke 7th aur 8th album ko bhi agarcha khasa pasand kiya gaya, lekin recording company ke sath talluqat kharab ho jane ke baiys in ki munasib tasheer na ho saki aur yun in ki farokht buri tarah mutassir hui.

2010 mein Shakira ne football World Cup ka official song “ Waka Waka, This Time For Africa ” gaya. Jis ne maqboliyat ke tamam sabqa record torh dale. Waka Waka football World Cup ki tareekh ka maqbool tareen gana qarar paya, jise kam se kam 55 crore afraad ne dekha aur YouTube par sab se ziyada dekhi jane wali videos ki list mein yeh 8th position ka haqdaar thehra. Shakira 2013 tak America ke reality music show The Voice ki coach aur judge ke faraiz bhi anjaam deti rahin.

Shakira ke kamiyab career ka andaza is baat se bhi lagaya ja sakta hai, ke inhe tahaal 5 MTV, 8 Latin, 7 bill Board music aur 28 latin bill board awards mil chuke hain, jab ke in ki golden globe award ke liye bhi nomination ho chuki hai. Shakira ki isi aalamgir maqboliyat ki wajah se Hollywood ke Walk of Fame mein in ke naam ka Sitara bhi jagmaga raha hai. Shakira ki Columbia ki sab se ziyada maqbool singer hain, jin ke music albums ki 7 crore aur Singles ki 5.5 crore copies farokht ho chuki hain, jab ke America mein release kiye jane wale albums ki farokht ki tadad 9.9 crore tak ja pohanchi hai. 2002 ke bad Shakira ka shumar bhi Whitney Harwinton, Slain Dayan, Marry J, Maria Carry aur Anta Saki ki tarah pop music Divas yani bakamaal singers ki list mein hone laga hai.

Singing ke ilawa Shakira modeling ke maidan mein bhi apni salahiyaton ka loha manwati rahi hain. Inhe kar masnoaat ki tasheer ke liye aalmi satah par brand ambassador muqarrar kiya gaya. Is ke sath sath Shakira bohat si falahi sargarmiyon mein bhi sharik rahi hain. Inho ne kar aise life shows kiye hain, jin ki aamdani rfahi kamon ke liye istemal ki gai, khas taur par Shakira ne American president Barrack Obama aur vice president Bill Clinton ke sath mil kar nadaar bachon ke imdadi projects mein pore josh o jazbe ke sath hissa liya. Apne career ka aaghaz ke 10 baras bad Shakira ne Argentine se talluq rakhne wale Lawyer, Antonio De La Rua ke sath dosti kar li. Tahum inho ne shadi nahi ki aur yeh dosti 2011 mein khatam ho gai. Jis ke bad Shakira ne Hispania foot bowler Gerard Pique ka sath apna liya, in dono ka aik beta bhi hai.

Shakira ka shumar in fankaron mein hota hai, jin ke khandan ke kisi bhi shakhs ka talluq showbiz se nahi tha. Lekin inho ne bachpan he se showbiz ko apni manzil samajh kar isi maidan mein qadam jamane ki koshish ki. Bohat kam singer aise hote hain, jinhe kae zabano par aboor hasil ho, lekin Shakira kam se kam 7 zabano mein bakhobi song gati hain, jin mein Hispania, Portuguese, English, Francis, Italian and Arabic waghera shamil hain. Agarcha bachpan mein Shakira ko sirf belly dancer he samjha jata tha aur kuch afraad ne singing ke maidan mein in ki hausla shikni bhi ki, lekin guzarte waqt ke sath aur apni mehnat o lagan ki badaulat bil aakhir inho ne khud ko maqbool tareen latin singer ke taur par manwa he liya.

Mathira Salman Khan Sonal Chauhan
Educated Bollywood Stars Farooq Sheikh Asif Ali Zardari

 

 

 

 

@Copy right 2012-2014 www.urdubiography.com