Welcome to Urdubiography
Home >> Showbiz >>Steven Spielberg  

 

 

Steven Spielberg

Steven Spielberg Photo

Steven Spielberg was born on 18th December 1946 in the American Estate Ohayo, Sonsonate. He is a director, producer and story writer in the Hollywood film industry. Steven Spielberg is a very successful person in the Hollywood. When he was a teen ager, Steven started his career. Steven Spielberg made his first film with his friends, the movie name was 8MM. He wrote and directed the first Science fiction movie of 140 minute named “ Fire Light ” at the age of Sixteen. Steven Spielberg made almost thirty movies. He says that, I am interested in the making of film, not money. Steven Spielberg received two Oscar Awards in his career. He also participated in the American Estate and Steven helped the candidates of Democratic Party. Steven Spielberg married first with Emi Erving in 1985 and separated her in 1989. After two years he married with Kate in October 1991. Steven Spielberg has 6 children’s. In this page you can see the information about Steven Spielberg.

Steven Spielberg Biography In Urdu

Yun to Hollywood mein bohat se kamiyab directors, producers aur story writer guzre hain, lekin in mein aik naam aisa bhi hai, jo kamiyabi ki zamanat samjha jata hai aur wo naam hai Steven Spielberg ka… jin ki films ka intezar duniya bhar ke shaiqeen ko shiddat se rehta hai. Steven Spielberg 18th December 1946 ko America estate Ohayo ke City Sonsonate mein paida hue. Film industry mein in ka career ka aaghaz zamana e talib e ilmi se he ho gaya tha to ghalat na hoga. Speilberg abhi teen ager he the ke inho ne apne doston ke sath mil kar aik 8MM adventure movie shauqiya taur par banai thi. 1958 mein wo scout boy ban gae aur us dauran 9 minute ki 8MM, The last gun fight bana kar photography merit badge hasil kiya. Is barey mein inho ne aik interview mein bataya tha ke inhe yeh kaam still images ki madad se karna tha lekin in ke walid ka still image camera toot gaya. Inho ne scout master se pocha ke agar wo yeh kaam apne walid ki movie camera se kar len to kaisa rahega ??? inhe ijazat mil gai, ghaliban yehi in ki direction ke career ka nuqta aaghaz the. 13 baras ki umer mein Spielberg ne Wartonowear naami 40 minute ki film bana kar apna pehla award jeeta. 16 baras ki umer mein inho ne apni pehli 140 minute ki science fiction film Fire Light ki kahani likhi aur is ki direction bhi ki. Is film ka budget sirf 500 American dollars tha. Jise maqami cinema mein numaiysh ke liye pesh kiya gaya aur is se 1 dollar ka munafa hasil hua. Isi kamiyabi se mutassir ho kar Steven Spielberg ne film Close Encounter banai, jis ne box office par acha business kiya.

Waldain alehdgi ho jane ke bad Steven ne California ka rukh kia aur wahan Arcade ya High School mein admission le liya. Graduation karne ke sath he inho ne Eagle Scout ka rank bhi hasil kar liya. Apne bachpan ke barey mein in ka kehna hai ke wo awail umer he se pukhta mazhabi aqaiyd rakhte the. Jis ki wajah se inhe deegar bachon ke sath ziyada khul kar milne ki aadat nahi thi. Shayad yehi wajah hai ke in ke bachpan ki aesi koi baat nahi jise wo yaad kar ke yeh keh saken ke wo lamha in ke liye yaadgar tha. Wazeh rahe ke Steven Spielberg mazhaban Yahoodi hain.

California aane ke bad Spielberg ne TV aur theater mein qismat aazmane ki koshish ki lekin kamiyabi na mili. Agar dekha jae to in ki amli zindagi ka sahi maeyno mein aaghaz us waqt hua, jab inho ne Universal studios mein bila muaawza week mein 7 days bataur internee kaam shuru kia. Usi dauran 1968 mein in ki pehli mukhtasir dauraniye ki film Amblin cinema ki zeenat bani. Usi waqt tak in ka kaam mehaz shauqia samjha ja raha tha. 1969 mein in ki amli zindagi ne aik aeham karwat us waqt li. Jab inhe aik TV program ki direction dene ke liye kaha gaya. 1969 se 1975 ke dauran inho ne TV ke liye kae programs ki direction ki. Usi dauran film The Sugarland Express ki direction bhi ki. Jis ki Cinematography ya akkasi bohat pasand ki gai, lekin ba lihaaz majmooi film buri tarah na kaam rahi.

Steven Spielberg ke career ki sahi maeyno mein shuruwaat film Jazz se hui. Is film ne box office par shandar kamiyabi hasil ki aur us film ne 47 crore dollar kamae. Tahum is ke bad Spielberg ne Jazz ka sequel ya King Kong aur Superman jaisi films banane ki offers mustarid kar den. Ab inho ne bachpan ki apni khuwahish pori karne ke liye Urhan Tashtariyon ke barey mein aik film Close Encounter of Third Kind banane ka faisla kar liya. Yeh pehli baqaida commercial film thi, jis ki kahani bhi inho ne khud he likhi thi. Yeh film box office par super hit sabit hui aur inhe pehli bar behtareen director ke academy award ke liye nominate kiya gaya. Is ke ilawa inho ne is film ki badaulat 6 deegar awards bhi hasil kiye. Is ke bad Spielberg ne pehli jang e azeem par banne wali film 1941 ki direction ki. Yeh film bhi blockbuster sabit hui aur yun Spielberg ne kamiyabi ki shahrah par aise safar ka aaghaz kiya. Jo tahaal pori raftaar ke sath jari hai.

Ibtedai daur mein Spielberg ne apne walid ki jangi kahaniyon se mutassir ho kar dosri aalamgeer jang ke hawale se bhi kae films banai. Jin mein academy award films Sewing Private Ryan aur Chandlers List bhi shamil hain. In ki agli manzil adventures movies thin. Jis ke liye inho ne Star Wars series ke khaliq George Locus se rabta kiya aur in ki film ke hero Harrison Ford ko le kar famous zamana adventure film Readers of the lost arc banai. Yeh film itni kamiyab hui ke is ke sequel banane ka silsila aaj bhi jari hai aur is series ki 5 films numaiysh ke liye nominate kiya gaya.

ET bhi Spielberg ke career mein be had aehmiyat ki hamil film hai. Jis ki kamiyabi ke bad inhe science fiction films ka mustanid director samjha jane laga. Tahum inho ne khud ko sirf science fiction films tak he mehdood nahi rakha bal ke har mauzoo par filmy stories likhin, direction ki aur kuch films produce bhi ki. In ki deegar numayan fims mein Jurassic Park, Lincoln, War Horse, Catch me if u can, The Adventures of Tin Tin waghera shamil hain.

Steven Spielberg ki zaati zindagi bhi Hollywood se wabasta deegar celebrities jaisi he hai. Inho ne 1985 mein pehli shadi Emi Erwing se ki. Jis ka ikhtetaam 1989 mein divorce par hua. Is ke bad kuch muaashiqon ki khabrein aati rahin. 2 baras bad 2 october 1991 ko inho ne dosri shadi Kate Kapshaw se ki, jo tahaal barqarar hai. Spielberg ke 6 bache hain. Forbes Magazine ke mutabiq in ka shumar arabpati afraad mein hota hai. In ke asaason ka takhmina 2 arab 20 crore dollar lagaya gaya hai. America ke mehange tareen areas mein in ke 1, 2 nahi pore 4 ghar hain.

Steven Spielberg ne American estate mein bhi hissa liya. Wo maali aur deegar muaamlaat mein democratic party ke candidates ki madad karte rahe hain. Kuch arsaa wo is jamaat ke national advisory board ke member bhi rahe. Tahum 2007 mein in ki films par arab mumalik mein us waqt pabandi laga di gai thi. Jab inho ne Lebanon ki jung ke dauran israel fauj ko 10 lac dollar ki imdaad di thi. Steven spielberg samaji o falahi sargarmiyon mein bhi barh charh kar hissa lete hain. Jinhe bilamoom saraha jata hai. Tahum inhe us waqt aik halqey ki taraf se shadid tanqeed ka saamna karna parha, jab inho ne hum jins parasti ke haq mein shuru kiye jane wale aik project ki maali muaawnat ki.

Steven Spielberg ne ab tak kam o besh 30 films banai hain. Jin mein science fiction, adventure, jangi, samaji o romani mauzoaat par banai jane wali films shamil hain. In mein se beshtar bpx office par kamiyab rahi hain. Tahum in ki kuch films nakaam bhi hui hain. Jaise Tom Cruise ke sath in ki film War of the World. Is ke bawajood hollywood mein spielberg ka naam kamiyabi ki zamanat samjha jata hai. Apne career ke barey mein khud in ka kehna hai ke, film The Color Purple banane ke waqt se haqiqat se qareeb tar mauzoaat mein meri dilchaspi barhti rahi hai. Jaise jaise aap ki umer barhti hai. Aap fitri taur par aesi kahaniyon ki taraf ziyada mutawajja hone lagte hain. Jo misaal ke taur par Shark fishes ya Dinosaurs ke muqabley mein kahi ziyada sanjeeda mauzoaat ka aahata karti hain. Is ka matlab yeh nahi ke main apni kisi bhi film se la talluqi zahir karna chahta hon. Hatta ke in films se bhi nahi ke jin ke barey mein aaj mera khayal hai ke main inhe mazeed behtar andaaz mein bana saktaq tha. Hum baaz auqaat aam dagar se hat kar, apni nakamiyon se bhi waisi he mohabbat kar sakte hain, jaisi ke kamiyabiyon se karte hain. Is liye ke hum kamiyabi ke muqabley mein apni nakaami se kahi ziyada sabaq seekh sakte hain.

Steven Spielberg bataur director 2 Oscar award hasil kar chuke hain. In ki films global box office par ab tak 8.5 arab dollar se zaiyd business kar chuki hain. Tahum khud steven spielberg ka kehna hai. “ Mujhe paisa banane se nahi, films banane se dilchaspi hai. Har takhleeqkar ki nazar paise ke bajae sirf aur sirf kaam par honi chahiye. Aap behtareen kaam kijiye, paisa khud chal kar aap ke paas aaega.”

Farooq Sheikh Salman Khan Dua Malik
Emma Watson Bushra Ansari Ahsan Khan

 

 

 

 

@Copy right 2012-2014 www.urdubiography.com