Welcome to Urdubiography
Home >> Showbiz >>Zia Mohyeddin  

 

 

 

 

Zia Mohyeddin

Zia Mohyeddin has the gifted voice. He was born on 20th June 1933 in Faisalabad. His parents belonged to Kasur. After received early education he admitted in Government College, Lahore and he graduated in 1949. Zia Mohyeddin started his career from radio programs and then read news. He received the training of drama in Royal Academy of Dramatic Arts, London in 1953 – 56 and commenced of stage drama. Zia Mohyeddin started his Hollywood film career from the film “ Lawrence of Arabia ” in 1962. Now days he is a foreman of “ National Academy of Performing Arts ” in Karachi. In this page you can see the biography of Zia Mohyeddin.

Zia Mohyeddin Biography

Agar sawal kiya jae ke Pakistan ke kisi fankaar ka naam batae, jise radio, television aur film ke hawale se aalmi shohrat hasil hai to jawab mein hamare paas sirf aik naam hai aur wo hai zia mohyeddin. Yeh kehne se mera maqsood kuch Zia Mohyeddin ka rutba buland karna nahi. Mai to barhe tassuf ke sath yeh batana chah raha hon ke is se hamare funn o saqafat ke shobey ki kam maeiygi aur mehroomi ka izhaar hota hai. Dukh ki baat yeh hai ke mouk ko azaadi hasil kiye nisf saddi se ziyada ka arsaa beet chukka hai, magar hum is tamam arsey mein sirf aik Zia Mohyeddin paida kar sake.

Zia Mohyeddin 20 June 1933 ko Faisalabad mein paida hue. Waldain ka talluq Kasur se tha. In ke walid Khadim Mohyeddin dars o tadres ke shobey se munsalik the. Zia Mohyeddin ne bachpan mein pehla drama apne walid ke zair e hidayat Devta ke naam se kiya. Ibtedai taleem hasil karne ke bad inho ne government collede Lahore mein dakhla liya aur 1949 mein graduate ho gae. Zia Mohyeddin ne fankarana zindagi ka baqaida aaghaz radio programs mein sadakari se kiya. Phir khabrein aur aakhirkar radio mein baqaida mulazmat ikhteyar kar li, lekin yeh silsila ta dair nahi chala. Jald he inhe aik tarbiyati course par Australia jkane ka mauqa mila aur is ke bad wo radio chor gae. Theater ki mohabbat inhe kusha kusha London le gai, jahan inho ne 1953 - 56 mein royal academy of dramatic arts mein drama ki baqaida tarbiyat hasil ki aur stage dramas ka aaghaz kiya. BBC ke 50 se ziayd dramas mein bhi hissa liya. 1956 mein Pakistan wapsi par inho ne bohat se Urdu Drama stage kiye, jin mein Hafeez Javed ka tarjuma karda “ Joules Scissor ” aur Khuwaja Mohyeddin ka khel “ Laal qila se lalokhet ” waghera shamil hain. Zia Mohyeddin ne apne filmy safar ki shuruwaat 1962 mein Hollywood ki mashoor zamana film Laurence of Arabia se kit hi. In ki deegar films mein Work as a four letter Word, Kharttom, ashanti aur Bombay talky waghera shamil hain. 1970 ke ashrey mein Zia Mohyeddin kuch arsaa PIA arts and dance academy se bhi wabasta rahe, aaj kal wo Karachi mein National academy of performing arts ( Napa ) ke sarbarah hain.

Zia Mohyeddin se meri dosti barson par muheet hai. Main inhe un dino se janta hon, jab wo Jawan Raana hua karte the aur main radio Pakistan mein drama producer tha. Jis shakhs ne sari zindagi nazreen aur tamashaiyon ke saamne apne funn ka muzahira karne mein guzari ho, wo bhala sharmeela kis tarah ho sakta hai, lekin haqiqat yeh hai ke Zia Mohyeddin sharmeele hain aur is silsile mein, main apni taraf se kuch kehne ke bajae khud un ke alfaaz dohrana chahonga. Inho ne aik jagah likha hai.

“ Main zaati taur par be had sharmila hon. Main yeh baat is liye keh raha hon ke amoman log samajhte hain ke showbiz mein sharmile aadmi ka koi kaam nahi, halan ke mera khayal hai ke mein to is maidan mein aaya he is liye tha. Khud ain aur duniya ka har artists meri raaey mein 2 chezon ka majmooa hota hai. Sakht sharmilapan aur namood o numaiysh ki khuwahish. Sharmilapan he insaan ko apni zaat ke izhaar ke liye dosri chezon ka sahara lene par majboor karta hai ”.

Pakistan mein log Zia Mohyeddin ko television ke hawale se jante hain. PTV ke ibtedai daur mein inho ne Karachi markaz se Zia Mohyeddin Show ke zair e unwaan jo program pesh kiye, un ki yaad aaj bhi logon ke dilon mein taza hai. Zia Mohyeddin Show apne daur ka behad maqbool aur meyari program tha. Zia Mohyeddin ka kehna hai ke mujhe is program ki maqboliyat ka andaza is roz hua, jab main ne aik choti si bachi ko yeh kehte hue suna, “ Ammi Ammi, wo dekhen Zia Mohyeddin Show ja rahe hain ”.

Zia Mohyeddin ko is show mein shareek apne mehmano ko bhi apne mehmano se guftugo karne ka funn aata tha, lehaza inho ne jin mehmano ko bhi apne program mein bulaya, bawajood is ke key wo sabbarhi aur jani pehchani shakhsiyaat thin. Zia Mohyeddin ne un se aise sawalaat kiye ke in ki zindagi ke wo goshey bhi, nazreen ke saamne aa age, jin se wo pehle aashna nahi the. Zia Mohyeddin barhi mehnat aur tehqeeq ke sath sawalaat tayyar karte the. Kisi interview ya guftugo ka aik aurbarha aeham nukta yeh hota hai ek maizbaan… Mehmaan ko apni baat kehne ka ziyada se ziyada mauqa de. Zia Mohyeddin chunke tarbiyat yafta broadcaster hain aur bairoon mulk radio aur television ka wasee tajurba rakhte hain, lehaza wo in usoolon se bakhubi waqif hain, is liye inho ne hamesha apne mehmano ko markazi aehmiyat di.

“ Zia Mohyeddin Show ” sirf guftugo ka he program na tha, is mein Zia Mohyeddin ne aik aur tarah bhi dali, har show mein wo koi aik mashoor nazam... saazon ki sangat mein pesh karte the. Wo aise poets ka intekhab kart eke nazreen jhoom jhoom uthte the. Inho ne Rashid, Faiz aur Meera Ji waghera ki bohat si shahkar poems tehat ul lafz pesh kiyen.

Saazon ki sangat mein pesh ki jane wali in nazmon ko wo Theka kaha karte the. Is item ko wo sab se aakhir mein pesh karte aur sazindon ki taraf hath se ishara karte hue, ba awaaz e buland kaha karte the “ Theka ” is ka matlab hota tha ke orchestra wale saaz bajana shuru kar den. Aik aur barhi dilchasp chez ghaliban Rasheed Umar Thanwi ne inhe likh kar di thi.

Shakra ki Maa yeh Boli,,,

Mujh ko Beti ke liye Barr chahiye…

“ Zia Mohyeddin Show ” ke ilawa inho ne PTV par Payal, Zia Mohyeddin ke Sath, Chacha Chakkan, Drama Markhem, aur bohat se anfaradi noiyat ke programs mein bhi apni salahiyaton ke johar dikhlae.

Zia Mohyeddin aaj bhi khoob se khoob turki talaash mein hain. Guzishta kar barson ke dauran inho ne mehfil shair o nasar ke zair unwaan jo program pesh kiye hain. Wo bhi is silsile ki karhi hain. Yeh bilkul achotey aur intehai meyari qisam ke programs ka silsila hai. Jab audience aik artist ko apne saamne stage par tann tanha… Urdu aur English adab ke shey paron ko parhte hue sunte hain to in par kaif o masti ka aisa aalam taari ho jata hai. Jis ki lazzat se wo pehle na aashna the. One Man Show ka yeh silsila Zia Mohyeddin in ki khobsurat tajseem o tehzeeb mein khas malika rakhte hain. Wo ashaar ke ilawa lafzon aur jumlon ko bhi is qadar pur kashish bana dete hain ke audience mashoor hue jate hain. In solo performances mein parhne ke liye adabparon ka intekhab bhi wo khud karte hain aur jahan tak mujhe ilm hai, wo aik aik iqtebas ko muddaton par rakhte hain aur phir faisla karte hain ke ise apne program mein shamil karen ya na karen. Yehi wajah hai ke in ka intekhab is qadar jama hota hai ke shaiyqeen ussh ussh kar uthte hain. In ka muntakhib karda kalaam samaton ke zariye audience ke adraak o shaoor ki gehraiyon mein apni tamam tar maeyne aafrini ke sath utarta chala jata hai. Zia Mohyeddin apne tarz takhatub aur andaaz e takallum ke zariye audience ki rooh mein boond boond taazgi aur farhat columns bikherte hain aur mehfil par sakoot taari ho jata hai, tab aisa lagta hai ke jaise un ki baat apne hadaff tak pohanch gai aur yehi takmeel aarzoo ki ghari hai. Zia Mohyeddin ko is tarah perform karte hue dekh kar mujhe khayal aata hai ke shayad Faiz Sahib ne yeh shair in he ke liye kaha hai.

Ek Sakhun aur ke phir Tarz e Takallum tera,,,

Husun Sadah ko Inayat kare Aijaz ka Rang…

 

Benazir Bhutto Zulfiqar Ali Bhutto Nawaz Sharif
Altaf Hussain Pervez Musharraf Asif Ali Zardari

 

 

 

 

@Copy right 2012-2014 www.urdubiography.com