Welcome to Urdubiography
Home > Social Workers >Reham Khan
 

 

 

Reham Khan

Reham Khan Photo

Reham Khan was born on 3rd April 1973 in Ajdabiya, Libya. She is 42 years old. Reham Khan worked as a prime time anchor person on three different channels. She is very beautiful and attractive personality. Reham Khan is a British Pakistani journalist. Now Reham Khan is the wife of the chairman of Pakistan Tehreek e Insaaf ( PTI ) and former cricketer of pakistan, the great and very popular person Imran Khan. She was married with Ijaz Rehman in 1993 till 2005. Reham Khan has two daughters named Ridha Khan and Inaya Khan, and only son named Sahir Khan from her first husband. She is very gorgeous and charming woman. Reham Khan is very fond of cooking and try to make new sweet dishes. Her favorite dishes are Soshi and Pizza. Reham Khan is making two films also. In this page you can see the interview about Reham Khan In Urdu.

Reham Khan Interview

Pyari si TV journalist Reham Khan ne isi saal January mein Islamabad mein munaqida aik sada si taqreeb mein Pakistan ke maqbool politician aur sabiq cricketer Imran Khan se shadi ki thi. In ka ghar bachon ke qehqahon se goonjta rehta hai. Dubli patli aur nafees shakhsiyat ki malik Reham Khan lawn ki shalwar qameez mein malboos thin. Wo 42 baras ki umer mein bhi nihayat haseen dikhai deti hain. Inho ne 3 mukhtalif TV channels par prime time anchor person ke taur par program pesh kiye, is dauran inho ne suff e awwal ke taqriban sab he siyasatdano ke interview kiye, mukhtalif aeham waqeyaat ki coverage ki aur halaat hazira se mutalliq sab he mauzoaat par baat ki. Yahan tak ke in ki shohrat ghar ghar pohanch gai, bilkhusoos in ka yeh jumla zabaan zadd khaas o aam ho gaya. “ Apni baat dosron tak pohanchane ke liye aap ka chillana zaroori nahi. ” Pakistan Tehreek e Insaaf ke chairman Imran Khan ki wife ki hesiyat se wo har us maqsad ke liye in ke shana bashana dikhai deti hain ke jis ke liye wo jaddojehad kar rahe hain, misaal ke taur par aik naya Pakistan ke jahan har shakhs ko izzat ke sath jeene ka haq hasil hua. Agarcha Reham Khan ko PTI ya province NWFP mein qaiym is ki hukomat mein koi auhda nhi diya gaya. Tahum is ke bawajood in ki Imran Khan ke sath sath maujodgi is baat ki ghumaz hai ke Reham Khan bhi Pakistan ko badalne ki tehreek mein apne kirdar ke hawale se pur azam hain. Reham Khan ka sab se maussir hathiyar in ki 500 mega watt taqat wali dilnasheen muskurahat hai jo us waqt bhi in ke labon par machal rahi thi, jab inho ne apni zindagi, Imran Khan se shadi, kaam aur apne bachon ke barey mein hamare sath halki phulki guftugo ki shuruwat ki.

Is sawaal par ke kya shadi ke baad Imran Khan ne kabhi aap se kaha ke apna sir dhanpe ???

Reham Khan yun goya hui. Nahi kabhi nahi. Wo aise aadmi nahi ke aap ko kuch karne par majboor karen. Haqiqat yeh hai ke main ne un se kaha tha. Imran, main aap se is liye shadi kar rahi hon ke log nahi jante ke aap kitne ache insaan hain, mera khayal hai ke logon ko andaza he nahi ke wok is tarah ke insaan hain. Wo bohat ziyada sharmile hain. Wo chalak hain na makkar, bilkul waise he hain ke jaise dikhai dete hain. Wo logon ke sath khilwar nahi karte. Main bhi in ke barey mein yehi tassur rakhti thi ke wo jarihana mizaaj rakhte hain aur ghusiley bhi hain, magar yeh haqiqat nahi. Wo muaaf kar dene wale shakhs hain, agar koi shakhs bilkhusoos koi mulazim ghalti kar bethta hai to wo ise yaksar nazar andaaz kar dete hain. Log inhe maghroor samajhte hain, lekin wo bohat aajzi aur inkesari wale insaan hain.

Jab Reham Khan se pocha gaya ke siyasat se qataa nazar Imran ko aur kya pasand hai to in ke kehna tha, ke jab main is ghar mein aai to mera tassur kuch is tarah ka tha ke ooo hooo, Imran ko to daal dalliya bhi thek tarah se nahi milta. Agar main kitchen mein naya item banao to in ka radde amal kuch is tarah ka hota hai, yeh kya hai ??? Imran bohat qabil e tareef hain kyun ke wo kisi bhi tarah ke halaat mein reh sakte hain, wo bila wajah naak bhawen charane wale aadmi nahi hain.

Is sawal ke jawab mein ke shadi se pehle Imran ke barey mein aap ke kya khayalat the ???

Reham Khan ka kehna tha, “ Agar aap ki divorce ko 10 baras ka arsaa beet chukka ho to aap ki zindagi aik nae dhap par aa chuki hoti hai. Main ne Imran ko bata diya tha ke main koi samjhota karna nahi chahti. Main apne bachon ko bohat azaadi deti haon, jo ke shayad bohat se deegar waldain nahi dete. Mere bhi kuch usool hain lekin is tarah ke nahi ke shor na karo ya mauseeqi na suno. Hamara bohat shor sharabe wala ghar hai aur bachon ke sath hamare talluqat bohat sidhe aur aasaan hai. ”

Hum ne istafsar kiya ke aaya Imran aik ache Baap hain ???

To Reham Khan ne kaha ke Imran bohat he ache baap hain. Suleman he ko dekh lijiye, jo Imran aur Jamaima ka barha beta hai, wo is baras 19 saal ka ho jaega, lekin ab bhi wo apne baap ke sath chimat kar sota hai aur mera khayal hai ke waldain ke liye ladkon ke sath laad piyar karna bohat zarori hai, chahe wo kitne he barhe kyun na ho jae. Mere bachon ko to mujhe ziyada laad piyar karne se rokna parhta hai kyun ke mein in ke ird gird he mandlati rehti hon, yahan tak ke inhe kehna parhta hai ke, Mum, 1 minute ke liye he thehar jae. Step Father ki hesiyat se bhi Imran bohat ache hain.

Log sochte honge ke shadi ke hawale se hamare masail kya the ???

Hamare masaiyl sirf hamare bachon se mutalliq the. Misaal ke taur par meri beti Ridha ne A level mukammal kar liya hai, idher Suleman ne bhi, to masla yeh tha ke kabhi kisi ko school trip par jana hai to kabhi kisi ko is ki apni trip par. Hamare waise he tafarrukat hain ke jaise aam waldain ke hote hain. Aap Imran se yeh tawaqqa nahi rakh sakte ke wo sab he choti chezon ke barey mein sochenge, lekin wo bohat naram dil aur hassas insaan hain. Khaas taur par bachon ke muaamle mein. Wo aise aadmi hain ke inho ne kabhi apni sabqa biwi ( Jamaima ) ko bura bhala nahi kaha, bal ke in ke sath bahmi aihteraam ka talluq barqarar rakha hai. Main aksar apne beton se kehti hon ke tum in ki yani Imran ki tarah baat karte ho, in ke jaisa libaas pehante ho to in jaisa insaan banne ki bhi koshish karo. In ke jaise shohar bano, in ke jaise sabiq shohar bano, in ke jaise bhai bano aur in ke jaise bete bano.

Bachon ki nigehdasht ke hawale se Reham Khan ka kehna tha, nae nae shadi shuda afraad ke liye sab se aeham tip yeh hai ke in ke dil mein bachon ki shadeed khuwahish honi chahiye. Hamare han aam taur par shadi shuda afraad is liye Maa Baap banne ki khuwahishmand hote hain ke muaashra in se yehi tawaqqa kar raha hota hai. Main samajhti honk e kuch log ache waldain banne ka rujhaan rakhte hain aur kuch log is se mehroom hote hain. Lehaza sab se achi tip to yehi hai ke husool aulaad ke khuwahishmand hon aur bachon ki parwarish se lutf uthae. Dosri aeham tip yeh hai ke aap ko apne bachon ke sath ziyada se ziyada waqt guzarna chahiye. Log hairan ho kar mujh se pochte hain ke main ne “ Akeli Maa ” ke taur par kaise 3 bache paal liye, lekin haqiqat yeh hai ke in ki parwarish karna mere liye taza hawa ki manind farhat bakhsh tha.

Anchor person ke taur par apne career ke barey mein aik sawal ka jawab dete hue Reham Khan yun goya hue, “ Main ne hamesha prime time talk shows kiye aur Pakistan ke tamam he siyasatdano ke interview kiye. Jab main pehle pehal Pakistan aai to sab he ne kaha ke tum kamiyab nahi ho sakogi. Tumhari Urdu achi nahi hai, tum bohat naram mizaaj ki ho, yahan bohat chillana parhta hai, larhna parhta hai lekin mere khayal mein yeh logon ki zihanat ki tauheen hai. Inhe aik mauqa milna chahiye ke wo khud is baat ka faisla kar saken ke kya behtar hai aur kya nahi. Main ne kisi bhi lihaaz se khud ko tabdeel nahi kiya. ”

Apne sab se yaadgar interview ke barey mein inho ne bataya, mujhe badam zari bohat achi lagi, yeh wo pehli khatoon hai ke jis ne wafaq ke zair e intezam qabaili ilaqey ( Fata ) se pehli bar azaad hesiyat mein election larha. Main ne is ka interview karne ke liye bajore agency ka safar kiya. Is khatoon ko dekha kar mera hausla barha aur is interview ko androne bairoon mulk bohat ziyada dekha gaya.

Jab Reham Khan se pocha gaya ke wo aik politician ki wife ke taur par apne nae kirdar ko kis nazar se dekhti hain ???

Reham Khan ka jawab tha, “ Pehli baat to yeh hai ke Imran khud ko politician nahi samajhte, is liye mera kaam aasaan ho gaya. Wo samajhte hain ke wo aik mission par hain aur main bhi aisa he samajhti hon. Haqiqat yeh hai ke main is hawale se koi dabao mehsoos nahi karti. Log samajhte hain ke agar main kaam karna chahongi to Imran Khan mujhe mana karenge, halan ke haqiqat is ke bar aks hai, mujhe Imran ne kabhi aisa nahi kaha. Yaqinan inho ne mujh se shadi is liye nahi ki hogi ke mujhe tabdeel karen. Inho ne 62 baras mein shadi ka faisla karne se pehle yaqinan achi tarah ghaur o fikar kiya ho ga. ”

Apni shadi ke barey mein izhaar e khayalaat karte hue Reham Khan na kaha, “ Yeh apni pasand se meri pehli shadi hai. Main ne kuch dekhe bhale bagher he shadi ke liye in ki sherwani pasand karti thi. Mujhe rangon aur mardon ke malbosaat ke barey mein ziyada sojh bojh nahi. Imran aise kapre pasand nahi karte, jo in ke liye araamdey nah on. Shadi wale din in ka bass nahi chal raha tha ke kisi tarah photosession jald az jald khatam karae aur khane ke liye beth jae. Yeh aik bohat piyara din tha ke jo hum ne apni family aur bachon ke sath guzara. Us din hamari family ke mehaz 8 afraad maujood the aur us news channel ki team bhi jis ke sath main 2007 se munsalik thi. ”

Is sawal ke jawab mein ke aap ko Pakistan ke aik nihayat maqbool politician ke sath shadi ke bad kaisa lagta hai ???

Reham Khan boli, “ Mera khayal tha k yeh bohat khaufzada karne wala tajurba ho ga aur main ne yeh bat Imran se bhi kit hi. Main ne in se kaha tha ke in ka celebrity status mujhe khaiyf kar raha hai. Is par Imran ne kaha, Kaisa celebrity status ??? Ghar mein hum bilkul aik normal couple ki tarah rehte hain. Main khana pakati hon, hum log khilwat mein rehna pasand karte hain aur bilkul gharelo andaaz ki zindagi guzaarte hain. Jahan tak aik dosre ko waqt dene ka talluq hai to Imran is muaamle mein mujh se kahin behtar hain. Jab wo ghar aate hain to apna phone door rakh dete hain. Shaam 7 baje ke bad wo mujhe bhi koi kaam nahi karne dete. ”

Jab yeh pocha gaya ke aap NWFP mein kya kar raahi hain ???

Reham Khan ne jawab diya, “ Jab mujhe street children ke hawale se safer muqarrar kiya gaya to is par bohat batein banai gai. Main baazabta taur par tehreek e Insaaf ka hissa hon, na he NWFP hukomat ka, lekin main streer children aur child labor ke hawale se bohat mutafakkir rehti hon, is liye main in mauzoaat par kaam karti rahi hon. Bohat se khush haal afraad ne 7 - 8 saal ke bachon ko gharelo mulazim rakha hua hai. NWFP mein sanati mulazmeen ke liye to kam se kam ujrat muqarrar kar di gai lekin gharelo mulazmeen ke liye aisa kuch nahi hua. Humen child labor ka khatma karna ho ga aur main aik tehreek ki soorat mein isi maqsad ke liye kaam kar rahi hon. Yeh azam main ne Imran Khan ke sath shadi se bhi pehle se kiya hua tha. Main NWFP se achi tarah waqif hon, isi liye wahan se kaam ka aaghaz kiya, lekin is ka hargiz yeh matlab nahi ke main Sindh, Baluchistan aur Punjab mein kaam nahi karongi. Agar main sab se pehle khud apne province ke barey mein sochti hon to yeh bilkul fitri baat hai. Pakhtono ko dosron se mukhtalif aur stereo type ka samaja jata hai. Is liye man chahti hon ke duniya ko pakhtuno ka asal roop dikhao. Main is hawale se 2 films bana rahi hon. Jin mein se aik Pashtun poet aur Jungjo Khushhaal Khan Khatak ke barey mein hai, yeh film Pakhtun tareekh aur saqafat ki akkasi karegi, jab ke dosri film romantic comedy noiyat ki ho gi. Jis ki kahani hamare jaisi aik normal aur modern pakhtun family ke “ Love Triangle ” se mutalliq ho gi.

Jewelry ke hawale se baat karte hue Reham Khan ne bataya, “ Mere jewelry collection mein bhi NWFP markazi aehmiyat ka hamil hai. Main chahti hon ke jis area se qeemti pathar aur dhatein nikalti hain, wahan ke log in stones ki cutting, polishing, finishing, sales aur marketing jaise muaamlaat mein bhi maharat hasil karen, taa ke in ka meyaar e zindagi bulnad ho saken. Hamare logon ki hunarmandi ka meyar bhi Thailand aur Dubai ki takkar ka hona chahiye. Jahan se main apne liye jewelry leti hon. ”

Apni dili aarzo ke hawale se Reham Khan ne bataya, “ Street children ko sarkon par nahi rehna chahiye. Inhe rehaish ke liye ghar milna chahiye. In se in ka bachpan chinn jata hai. Main chahti hon ke aise bachen taleem hasil karen taa ke jab wo 16 – 17 baras ke hon to apni purani zindagi ki taraf na laut jae, na he drugs mein panah dhondein. ”

Muaashre mein khuwateen ke maqaam ke hawale se Reham Khan ne apne khayalaat ka izhaar kuch yun kiya, “ ke mera khayal hai ke khuwateen ko shikayatein karna band kar dena chahiye. Har waqt giley shikwey karne walon se mujhe koi hamdardi nahi. Humen bahane nahi dhondne chahiye. Sab se pehle to khuwateen ko apne is khayal se picha churana chahiye, ke wo kisi bhi lihaaz se kamtar hain. Main nahi samajhti ke main aik aura thon, main khud ko aik fard samajhti hon, aurat hona mere liye koi rukawat nahi. Jahan tak Imran ka talluq hai to unho ne mujhe meri apni shakhsiyat ke sath qabool kiya hai. Mujhe apni shakhsiyat ke niswani pehlon ke sath jeene ka pora haq hasil hai. Agar aap ko piyar aur acha mahaul milta hai to aap ko kisi aur chez ki parwah nahi hoti. Main ne Imran ko bataya tha ke jab mere walid jogging ke liye jaya karte the to wo har din meri waldah ke liye phool laate the. Imran bhi har din subha ki walk ke bad mere liye phool late hain. Mujhe jewelry ki koi zarorat nahi, kyun ke Imran ke liye hamare baagh se behtareen Rose muntakhib kar ke laate hain. ”

Jab Reham Khan se pocha gaya ke kya aqraba parwi ke hawale se Imran Khan ke khayalaat aap ko tehreek e Insaaf mein koi auhda qabool karne se rokte hain ???

to Reham Khan ka kehna tha ke, “ Mere paas party ka koi auhda nahi. Maujoda nizaam mein aap rukun qaumi assembly ya aik wazeer ke taur par kya hasil kar sakte hain ??? Agar kal Imran Khan prime minister ban jate hain, lekin in ke paas ikhteyaraat na hon to is ka kya faida ??? Teesri dafa prime minister banne wale Nawaz Sharif bhi kuch na kar sake. Main Imran se kehti hon ke aap ki hesiyat is se barh ke hai, aap ko to aisa hona chahiye ke aane wali naslein bhi yaad karen ke aisa bhi koi leader tha. ”

Imran Khan ki wife ban kar sab se achi baat kaun si lagi aap ko ???

Is baat par Reham Khan ne muskurate hue kaha, “ K sab se achi baat yeh hai ke main Imran ki wife nahi, mera matlab hai ke jab main ghar mein hoti hon to Imran Khan ki biwi nahi hoti hon. Matlab yeh ke main is hawale se khud par koi dabao nahi leti. ”

Fashion ke hawale se izhaar e khayal karte hue Reham Khan ne kuch yun bataya ke, “ Mujhe Gucci ke coat pasand hain. Shoes ka mera shauq ab kae had tak khatam ho chukka hai. Kyun ke meri shadi aik bohat he sadah se insaan se hui hai. Lekin phir bhi mujhe new shoes lena bohat acha lagta hai. Jahan tak fitness ka talluq hai to meri shadi aik aise insaan se hui hai, jo junoon ki had tak apni fitness ka khayal rakhte hain. Main Gym nahi jati. Main hamesha se bohat dubli patli rahi hon, kyun ke mere 3 bache hain aur main aik lamhe ke liye bhi kahin par tikk ke nahi bethti hon. Hamare khandan mein weight barhne ka rujhaan hai he nahi. Imran kafi tez daurte hain, lekin main bhi itni he tez daur sakti hon ke jitni tez Imran daurte hain. Lekin main hamesha apne bachon kea as paas he daur lagati rehti hon. Khuraak ke mauaamle mein Soshi meri pasandeeda dish hai, lekin mujhe pizza bhi bohat pasand hai. Main bohat cooking karti hon aur new se new sweet dishes banane mein lagi rehti hon… ”

Benazir Bhutto Imran Khan Nawaz Sharif
Altaf Hussain Pervez Musharraf Asif Ali Zardari

 

 

 

 

@Copy right 2012-2015 www.urdubiography.com