Welcome to Urdubiography
Home >> Sports >> Saeed Anwar  

 

 

Saeed Anwar

Pakistani cricketer Saeed Anwar Photo

Saeed Anwar is a former Pakistani cricketer. He was the stylish lefty batsman and slow left arm bowler. Saeed Anwar was born on 6th September 1968 in Karachi. He received the degree of engineering in computer science from NED University. He started his cricket career in 1990 – 91. Saeed Anwar was an opening batsman of Pakistan cricket team. Wisden entered the Saeed Anwar in top of the list of best cricketers in 1997. He married with Doctor Lubna Anwar. The death of his daughter named Bismah, brought a revolutionary changed in the life of Saeed Anwar. In August 2003 Saeed Anwar was retired in international cricket. In this page you can see the biography of Saeed Anwar In Urdu.

Saeed Anwar Biography In Urdu

Left hand se khelne wale stylish batsmen ka tazkara ho to baat Pakistan ke mayanaaz opening batsmen Saeed Anwar tak zaroor pohanchegi. Kalaai ki madad se dil aawez strokes khelne wale is batsman se hareef balers khaif raha karte the. Aamir Sohail ke sath in ki jorhi ko Majid Khan aur Sadiq Mohammad ke bad Pakistan ko milne wala behtareen opening pair qarar diya ja sakta hai, lekin aaj ka baresh aur burdbar Saeed Anwar kal ke khalendare aur chulbule cricketer se bilkul mukhtalif hai, is ki zindagi mein yeh tabdeeli kyunkar aai. Is ka tazkara aakhir mein kiya gaya hai.

Saeed Anwar ke career ka aaghaz mayoos kun tha. 1990 – 91 mein west indies ke khilaf test series chal rahi thi ke Pakistan ke regular opener Rameez Raja zakhmi ho gae, in ki jagah Saeed Anwar ko Faisalabad ke dosre test match mein jhonk diya gaya aur aik aesi khatarnaak pitch par, jo na hamwar bounce le rahi thi. Saeed Anwar dono innings mein 0 par out ho gae. Tahum selectors in se mayoos na hue aur inhe dobara mauqa diya gaya, jis se Saeed Anwar ne pora faida uthaya, yahan tak ke jab Saeed Anwar retire hue to in ka shumar duniya ke suff e awwal ke cricketers mein hota tha. Goya in ke career par yeh filmy shair sadiq aata hai.

Rote hue aate hain sab, hansta hua jo jaega,,,
Wo muqaddar ka sikander… Janemann kehlaega…

Saeed Anwar 6 September 1968 ko Karachi mein paida hue. NED university se computer science mein engineering ki degree li aur cricket ki duniya fatah karne nikal khare hue. Wo bunyadi taur par left hath se jarihana andaaz mein khelne wale batsman the, jab ke kabhi kabhar left arm slow baler ka kirdar bhi nibha lete the. Saeed Anwar ne pehle pehal Mailr gym khana mein shmoliyat ikhteyar ki. Phir 1984 – 85 mein KCCA ne inhe select kar liya, bad mein inho ne UBL, ADBP, Lahore, National bank aur Pakistan ki numaiydegi ki.

Saeed Anwar aksar off stump ki taraf andha dhund andaaz mein jhapat’te the, lekin inhe rokne ka koi faida nahi tha kyun ke yehi in ke liye runs banane ka sab se zarkhez ilaqa tha. One day cricket mein jab ibtedai 15 overs ke liye fielding ke hawale se baaz pabandiyan aaiyd ki gai to Saeed Anwar fifty banane ke liye goya race lagaya karte the aur apni team ko aksar flying start diya karte the. Saeed Anwar match winning innings khelne ki pori salahiyat rakhte the. Cricket ke bohat se qadamat pasand experts ne off stump ki janib yalghar karne ki Saeed Anwar ki kamzori par umgliyan uthai hain, lekin sachi baat yeh hai ke jis batsman ne off stump ki bhol bhullaiyon par mabni gher yaqeeni duniya ko musakhir kiya. Wo Saeed Anwar he the. Jab wo off stump ki taraf ball ko dhondne nikalte to aisa maloom hota tha ke jaise bijli koond rahi ho. Saeed Anwar ball ko aise maarte the, jaise hathora maar rahe hon.aksar Saeed Anwar ke bat se milaap ke bad ball bijli ki si tezi se boundary line ki taraf jati thi, jise rokne ke liye kisi bohat je jeedar fielder ki zarorat hoti thi. Off stump keg her yaqeeni corridor ka jitna safar Saeed Anwar ne kamiyabi ke sath tey kiya. Itna kisi hum asar batsman ne na kiya hoga. In ka sab se barhi khobi he off stump ke samandar mein jaal daalna aur wahan se runs ke rang barange moti nikalna thi.

Saeed Anwar ne one day career ka aaghaz 1st January 1989 ko Perth mein west indies ke khilaf kiya, jab kle test career ki shuruwaat November 1990 mein west indies ke khilaaf Faisalabad mein ki thi. Saeed Anwar ne 55 test matches mein 45.52 ki osat se 4052 runs, 11 centuries aur 25 half centuries ki madad se score kiye. In ka sab se barha test score 188 runs not out raha. Saeed Anwar ne 247 one day international matches mein 39.21 ki osat se 8824 runs banae, jis mein centuries ki tadad 20 aur half centuries ki tadad 43 rahi. In ka sab se barha score 194 runs tha. Jo inho ne May 1997 mein Chennai mein khelte hue India ke khilaf banaya tha. Is yadgaar innings mein 22 fours aur 5 sixes bhi shamil the. Yeh Saeed Anwar ka din tha. Jab inho ne Indian balling ka bharkas nikaal diya tha. Yeh one day international cricket ka sab se barha infaradi score bhi tha. Saeed Anwar ka aalmi record taweel arsey ke bad India ke Sachin Tendulkar ne torha. 1997 mein Wisden new Saeed Anwar ko 5 behtareen cricketers ki top of the list mein shamil kiya. Apne 14 sala career mein kae nasheb o farez dekhne ke bad Saeed Anwar ne bil aakhir August 2003 mein international cricket se retirement ka aelaan kar diya.

Aakhir mein Saeed Anwar ki zindagi mein aane wali is tabdeeli par nazar daalte hain, jis ne inhe aik sharer aur khalandare naujawan se baresh mazhabi insaan bana diya. Saeed Anwar mein is tabdeeli ki wajah in ki chotio beti ki maut bani. Aaj b apni beti Bisma Shaeze ke zikar par Saeed Anwar ki aankhon se aansoun ka dariya baha nikalta hai. Is bachi ki tabiyat achanak he bighar gait hi. Saeed Anwar ise le kar pani wife Doctor Lubna ke sath hospital le ja rahe the ke raaste mein he Bisma ne tarap tarap kar baap ki godh mein dumm torh diya. Saeed Anwar batate hain ke shiddat e ghum se wo cheekhne lage aur apni bachi ko pukarte rahe, lekin bhula jane wale kab laut kar aate hain. Is andohnaak waqey ne Saeed Anwar ko cricket he nahi, duniya ke har dilchaspi se door kar diya. Inho ne gosha tanhai mein panah dhondne ki koshish ki, lekin wahan bhi sukoon na mila. Bil aakhir ALLAH PAK se lau lagai aur is tarah totey hue dil ko qarar aaya. Baqaul Saeed Anwar agar “ ALLAH TA’ALA mje apni taraf na bulate to mai shayad dewangi ki had tak ja pohanchta. ALLAH PAK ne he mujhe sahara diya aur sabar ataa farmaya. Ab maine apni zindagi deeni aur falahi kamon mein waqf kar di hai ”. Aaj kal saed anwar aur in ki wife ka ziyada tar waqt gharibon aur hajatmando ki khidmat o a’anat mein guzarta hai. Kaha ja sakta hai ke Mister se Maulana tak… Saeed Anwar ke is safar ke dauran shaiyqeen cricket to aik stylish batsman se mehroom ho gae, lekin bohat se zaroratmandon ko un ka masiha mil gaya.

More Links

 

 

 

 

@Copy right 2012-2015 www.urdubiography.com