Welcome to Urdubiography
Home >> Sports >>Shoaib Malik  

 

 

Shoaib Malik

Shoaib Malik Photo

Shoaib Malik is a former test captain of Pakistan cricket team. He is a right hand batman. Shoaib Malik was born on 1st February 1982 in Sialkot, Pakistan. He is an all-rounder of Pakistan cricket team. Shoaib Malik married with Indian tennis star Sania Mirza on 12th April in Hyderabad Deccan. He played first time international match from Pakistan in 1999. Shoaib Malik played 32 test matches and made 1606 runs with the help of 2 centuries. He got 21 wickets. Shoaib Malik played 216 one day matches and made 5490 runs with the help of 7th centuries. He got 141 wickets in one day matches. Shoaib Malik played 59 matches in T 20 format. He made 959 runs and got 16 wickets. After the retirement of Inzamam ul Haq, Shoaib Malik selected as a captain of Pakistan cricket team in 2007. Shoaib Malik is a captain of domestic team named Sialkot Stallions. The domestic team of Sialkot Stallions won the T20 match seven times. In this page you can see the information about Shoaib Malik.

Shoaib Malik Biography

Test all-rounder Shoaib Malik Pakistan ke wo iklote player hain, jinhe cricket se maqboliyat zaroor mili, lekin bharti tennis star Sania Mirza ke sath shadi ne inhe shohrat ki bulandiyon par pohancha diya. Sania Mirza aur Shoaib Malik ki shadi ka Imran Khan aur Jamaima Gold Smith ki shadi se bhi ziyada shohra hua kyun ke yeh dono sports star hain. Pakistan aur India ke ilawa international media ne bhi Shoaib Malik aur Sania Mirza ki shadi ko sha surkhiyon mein jagah di. Halan ke is se pehle sabiq test opener Mohsin Hassan Khan ne Bollywood star Reena Roy se shadi kit hi, jab ke Zahir Abbas ki 2nd wife Samina Abbas ka talluq bhi bharat se hai, lekin Shoaib Malik ki bharti tennis queen ke sath shadi ne sab se ziyada shohrat hasil ki, aesi shohrat to Sharmila Tegor aur Nawab Patodi ko bhi nahi mili thi.

1st February 1982 ko Sialkot ke mutawasir gharane mein aankh kholne wale Shoaib Malik ke ab tak ke career aur private zindagi mein kae urooj o zawaal aae. Wo apni zindagi ki garhi ko kamiyabi se chalate hue Pakistan team mein to mustaqqil jagah nahi bana sake, lekin wo maqam zaroor hasil kar liya, jis ka khuwab har player dekhta hai.

Right hand se batting karne wale Shoaib Malik ne 1999 mein pehli bar Pakistan ki janib se international match khela. Wo chand saal aik mustaqil rukun ki hesiyat se zaroor team ka hissa rahe. Lekin in ki karkardegi mein tasalsul na tha. Jis ki wajah se bad azaa inhe team mein mustaqil jagah na mil saki. Pakistan ki janib se inho ne 32 test matches mein 2 centuries ki madad se 1606 runs 33.45 ki oosat se banae hain. In ki wickets ki tadad 21 hain. Is ke ilawa inho ne 216 one day matches mein 7 centuries ki madad se 5490 runs score kiye hain aur one day mein 141 wickets bhi hasil kar chuke hain. Shoaib Malik bohat ache fielder bhi hain aur one day matches mein 75 catch bhi le chuke hain. T 20 format mein Shoaib Malik ne 59 matches mein 959 runs banae aur 16 wickets bhi li hain. Tahum Shoaib Malik jitney ba salahiyat cricket hain, shayad yeh aedaad o shumar in ki bharpor akkasi nahi akrte. May 2004 mein international cricket council ne in ka bowling action mashkook qaraar de diya tha, lekin bad mein wo phir clear ho gae. 2004 mein aik domestic T 20 ka match janboj ke haarne par PCB ne Shoaib Malik par aik test match ki pabandi laga di thi. 2007 ke world cup mein Inzamam Ul Haq ki retirement ke bad inhe qaumi cricket team ka captain muqarrar kiya gaya tha. Inho ne 2 saal tak yeh zimmedari nibhai. Shoaib Malik test, one day aur T 20 matches mein Pakistan ki qiyadat bhi kar chuke hain. Shoaib Malik ki captainship mein Pakistan ne 2007 mein world T 20 cricket tournament ka final khela. Inho ne 2008 mein ICC ki janib se jari karda best all-rounders ki ranking mein 2nd position hasil ki. Shoaib Malik 2009 mein Pakistan ki us team ke bhi rukun rahe, jis ne Lords ( London ) mein T 20 world cup jeeta. Yahan yeh baat bhi qabil e zikar hai ke Shoaib Malik ki captainship mein in ki domestic team Sialkot Stallions ne record 7 martaba domestic T 20 tournament jeeta hai.

Aalmi shohrat yafta off spinner Saqlain Mushtaq ki maujodgi ke bawajood Shoaib Malik ko Pakistani team mein apni off spin bowling ki wajah se he jagah mili thi. Shoaib Malik chunke achi bating kar lete the, is liye inho ne jald he aik all rounder ki hesiyat se khud ko manwa lia. Shoaib Malik zaheen cricketer hone ki wajah se jald he aalmi cricket ke ufaq par apna naam banane mein kamiyab ho gae. Shoaib Malik team ke sathiyon aur doston mein apni shararton aur bazla sanji ki wajah se bhi mashoor hain. Shoaib Malik jis mehfil mein hote hain, wahan un ke zou maeyne jumlon se qehqehe goonjte hain. Smart cricketer hone ke natey wo khuwateen maddahon mein bhi be had maqbool hain. Yehi wajah thi ke career ki shuruwaat mein he wo Hyderabad Deccan ki doshiza Aisha Siddiqui ko dil de bethe. Shoaib Malik Aisha ki shadi ho chuki thi. June 2002 mein shoaibmalik ne pehli bar is shadi ko mehaz afwah qarar diya, tahum Aisha ke walid apne mauqqif par qaiym rahe.

December 2009 mein jab Pakistani cricket team Australia ke tour par thi. Melbourne test ke dauran Pakistani dressing room mein pehli bar Shoaib Malik ke aik aur scandal ki sargoshiyan sunai di. Is bar in ke sath india ki tennis star Sania Mirza ka naam liya gaya. Shoaib Malik team intezamia ki ijazat se Australian open mein Sania ka match dekhne gae, jab ke Sania apne walid Imran Mirza aur Waldah aur Behan ke sath Shoaib Malik ka test match dekhne aae. Hobart test ke dauran aik din shoaib ne raqim ul huroof ko khane par madoo kiya. Jahan wo Salman Butt ke sath aae, lekin hairan kun taur par inho ne yeh keh kar khana khane se mazhrat kar li ke mujhe emergency mein aik indian dost se milne jana hai. Mujhe us waqt yeh bilkul andaza na tha key eh bharti dost Sania Mirza thin. Hobart test ke bad Shoaib Malik dobara Melbourne gae aur Mirza family ke sath in ke faisla kun muzakrat hue. Tey paya ke Australia ke tour ke bad jab Pakistani team England ke khilaaf T 20 match khelne Dubai jaegi to us waqt dono khandaan shadi ke muaamlaat tey karenge aur phir hua bhi yehi ke Dubai ke aik five star hotel mein sharait tey hone ke bad Shoaib Malik aur Sania Mirza ki shadi tey paa gai. Tahum ab masla yeh tha ke Aisha Siddiqui ke sath shadi ke muaamley ko kis tarah khatam kiya jae. Beharhaal 7 April 2010 ko Shoaib Malik ne Aisha Siddiqui ko bazabta divorce di aur 12 April ko Hyderabad Deccan mein Sania Mirza se Islamic tariqe ke mutabiq shadi kar li. Shadi ka haq mehar 61 Lac Indian rupees ( taqriban 1 crore Pakistani Rupees ) tey paya, in ke valima ki taqreeb Lahore mein hui.

Shoaib Malik guzaishta chand saalon se sirf 20 overs ki cricket ke mahir player tassawur kiye jate hain. Lekin hairan kun baat yeh hai ke wo aeham aur ba salahiyat khiladi hone ke bawajood is waqt Pakistan ki T 20 team ka hissa bhi nahi hain.

Shoaib Malik ka cricket career urooj o zawaal ka shikar raha hai. Kabhi inhe sathi khiladiyon se bewafai ka shikwa raha aur baaz auqat wo PCB se naraz hote rahe. Kae baar wo private zindagi ke masaiyl mein bhi uljhe hue nazar aae. Indian tennis star Saniz Mirza se guzishta dino aik TV show mein pocha gaya ke aap ne shadi karne mein shayad jaldi kit hi to Sania Mirza ne jawaban kaha ke zindagi mein ghaltiyan insano se he hoti hain. Pata nahi yeh baat Sania Mirza ne sanjeedgi se ki ya azrah e mazaq kaha tha, lekin 2 padosi mulkon ki mukhtalif saqafton se talluq rakhne wale is couple ko shadi ke bad se aik sath rehne ka waqt kam he mil paya hai. Indian media aae din in dono ki alehdgi ki news chalata rehta hai. Lekin shoaib aur Sania inhe gumrah kul qaraar dete hain. Jab ke Karachi mein aaj kal Shoaib Malik ki aik Pakistani actress ke sath mulaqaton ka bhi khob charcha hai. Halan ke Shoaib Malik is actress ke sath talluq ko mehaz dosti qaraar deta hain. Behar haal aik cricketer aur aik tennis star ki azdawaji zindagi mein shohrat ki bulandiyan to dikhai deti hain, lekin ab tak dono ko aik sath rehne ka na to ziyada mauqa mila hai aur na he yeh bhi tey ho paya hai ked ono kis mulk mein rahenge.

Guzishta kuch arsey se cricket ke maidan mein Shoaib Malik ki karkardegi ziyada mutassir kun nahi rahi. Isi wajah se shoaib April 2014 se qaumi team ka hissa nahi rahe aur world cup 2015 ke squad mein shamoliyat ke liye bhi selectors ka aitemad hasil nahi kar sake. In ka career aik bar phir nazul daur se guzar raha hai. Agle chand maah is baat ka faisla karenge ke inhe Pakistani team mein aik martaba phir wapsi ka mauqa milta hai ya Shoaib Malik isi tarah mukhtalif mulkon mein league cricket khelte hue Pakistani cricket ke ufaq se ghayab ho jaenge.

 

More Links

Jahangir Khan Mohammad Yousuf Hashim Khan Roshan Khan

 

 

 

 

@Copy right 2012-2014 www.urdubiography.com