Welcome to Urdubiography
Home > Sports >  

 

 

Street Children Football

World Cup 2014

Street children football World cup 2014 played in Brazil. It was started on 28th March 2014. In this match except Pakistan, the nineteen teams of other Countries were participated in this football match. Azaad Foundation who is supports the street children’s. These street children based on nine players. Eight players belong to Karachi city and only one player belongs to Quetta. Owais Ali is a captain of this football team. The street children football team won with thirteen goals against India. Pakistan team got the 3rd position in this football tournament. All Pakistanis appreciated and felt proud for the Pakistanis street children team. We all are glad on this great victory. In this page you can see the information about Street Children Football World cup 2014.

Street Children Football World Cup

Street Child Football Worldcup players Photo

Wo gudrhi ke laal hain. Aise jawahir jinhe sambhalne ke bajae kachre mein phenk diya gaya tha. Here ki qadar johri he janta hai. Aur phir aisa he hua. Dardmand logon ki aik tanzeem ki un par nazar parhi aur phir un bachon ne maujza kar dikhaya. Wo jinhe kabhi galiyon ki khaak samjha jata tha. Un bachon ki aankhon mein roshan mustaqbil ke sapne sajane aur be maqsad zindagi ke bajae mehnat ke zariye zindagi mein kamiyabiyan hasil karne ki taraf gamzan karne ka sehra aik gher sarkari tanzeem “ Azaad Foundation ” ke sir jata hai. Yeh tanzeem sarhkon par rehne wale bachon yani street children ki bahali aur un ki zindagi ko ba maqsad banane ke liye koshan hain. Isi tanzeem ne in bachon ko Brazil mein hone wale street children football world cup mein bhejne ka intezam kiya tha aur sarhkon ke basi yeh awara bache ab Street Children World Cup 2014 ke hero hain. Pakistani team mein 9 street children shamil the, jin mein se 8 bachon ka talluq Karachi aur 1 bache ka talluq Quetta se hai.

Mazi mein sarhkon par bhatakne wale bachon ke liye aalmi cup ka aaghaz 2010 mein kiya gaya tha aur yeh faisla hua tha ke Fifa World cup se 3 maah qabal isi shehar mein ke jahan world cup ke muqable munaqid hon, bachon ke football aalmi cup ka ineqad ho ga. 2010 mein south Africa mein in bachon ka pehla aalmi cuo munaqid hua, lekin us mein Pakistan shirkat nahi kar saka tha. Tahum is dosre aalmi cup mein Pakistan pehli bar shareek hua hai.

Azaad Faoundation ke mutabiq in muqablon mein shirkat karne ke liye in bachon ko dawat di jati hai. Jin ka bachpan sarhkon par guzra ho. Is footbaal world cup mein shirkat ka miyar yeh muqarrar tha ke is muqable mein wo bachen shirkat kar sakte hain, jo bahaal hone ke bad muaashre mein shamil ho chuke ho. Is liye in ke liye aik camp ka ineqad kiya gaya tha. Jis se yeh bache pore baqaida aik tariqakar se guzarne ke bad muntakhib hue. Bahali satah par Pakistan ke safer ban kar gae aur aik nae tareekh raqam ki.

Yaad rahe ke Pakistan mein sirf Karachi ki sarhkon par 20 lakh se zaiyd bache awara bhatak rahe hain. Jin mein se akser jaraim pasha guruhon ka shikar ho kar ya manshiyat ki lat mein parh kar zindagi barbad kar lete hain. In bachon ki agar behter rehnumai ki jae to yeh aalmi satah par Pakistan ka naam roshan kar sakte hain. Pakistani team mein shamil bachon ke chunao ke hawale se azaad foundation ne bataya… “ Hamari koshish yeh rahi ke is aalmi muqable ke liye qaumi satah ki team bheji ja sakti hain. Is liye hum ne mukhtalif jagahon par apna camp lagaya tha. In mein se aik bacha Quetta se chuna gaya aur baqi Karachi se muntakhib hue. Aik team 7 bachon par mushtamil thi, jab ke 2 bache reserve mein the. In ka talluq Karachi ke mukhtalif ilaqon se hain. Jin mein Ibrahim Haidri, Liyari, Maripur, New Karachi, Korangi aur Mangopir shamil hain. ”

28 March se shuru hone wale bachon ke is aalmi football cup mein Pakistan ke ilawa 19 deegar mumalik ke 230 bachon ne shirkat ki. Aisa pehli bar hua ke Pakistan key eh awara bache aalmi satah par aik bohat barhe maarke mein shirkat karne gae. Khus ko manwane ke liye purjosh in bachon ne bohat mehnat ki aur yeh jeetne ke liye bhi pur azam the. Umeed ki ja rahi thi key eh bache kisi bhi international team ke liye bohat sakht sabit honge aur hua bhi aisa he.

Football ke is aalmi cup ka aaghaz 28 March ko Brazil ke shehar mein hua. Rawangi se qabal team ke aik khiladi Owais Ali ne in alfaaz mein apne khayalat ka izhaar kiya… “ ALLAH PAK behtar janta hai. Hum ne bohat mehnat ki hai. Main bohat khush hon ke main bahar ja raha hon. Main wahan khelonga aur Pakistan ki numaiyndegi karonga. Hum sab ki yehi khuwahish hai ke hum jeet kar aaenge. ”

Owais Ali ka talluq Karachi ke ilaqe UP more se hai. Bachpan mein maa baap ke darr se ghar se bhag kar is bache ne kae baras sarhkon par guzare. Owais ka kehna tha ke is ne kabhi aalmi khel ke barey mein nahi socha. Hum to sarhkon aur galiyon mein rehte aur khelte the. Hum sochte the ke hum kuch nahi kar sakte. Magar hamare coach ne hum mein aitemad paida kiya aur bataya ke hum bohat kuch kar sakte hain.

Aqwam e muttehda ki aik report ke mutabiq Pakistan mein lakhon beghar bache sarhkon par zindagi guzar rahe hain. In mein se na jane kitne he aise basalahiyat bache hain. Jinhe agar rehnumai aur tarbiyat di jae. To yeh mulk ka naam roshan kar sakte hain. Aise he bachon ki misaal yeh football team hai, jo Karachi ki sarhko se uthi, Brazil pohanchi aur khud ko manwaya.

Brazil ke shehar mein khele gae. Ibtedai round ke match mein Pakistani bachon ne difaai champion, bharat ko tigni ka naach nachaya aur pe dar pe goal kar ke mukhalif team ko apne shikanje mein kas liya. Pakistan ne bharat ko aik ke muqable mein 13 goal se shikast de kar sabz halali parcham sir buland kiya.

Is team ne kamrani ka silsila jari rakha aur semi final tak ja pohanchi. Jahan muqabla Burundi ki mazboot team se tha. Yahan in bachon ko shikast hui. Pakistan final mein nahi pohanch saka tha. Tahum Pakistan team ko na sirf wahan maujood teams se be tahasha pazeerai aur izzat mili, bal ke duniya bhar ke football ke paristaron ne bhi is team ko saraha hai.

3rd position ke liye in ka muqabla American team se tha. Kante ka muqabla hua. Penalty kicks par Pakistan fateh thehra aur 3rd position apne naam kar li. Is match mein Pakistani goal keeper ne apni salahiyaton ka shandar muzahira kiya. Nau umer Pakistani goal keeper ne Americans ki koshishen nakaam bana di aur fatah apne naam karne mein aeham kirdar adaa kiya.

Street children foorball World cup 2014 ke liye Karachi se Brazil rawana hone wale aik bache khiladi, Salman ne gher mulki nashriyati idarey se baat cheat karte hue kaha tha, hum is khel se Pakistan ka masbat image duniya ko bataenge, ke Pakistan dehshat gard mulk nahi, bal kea man dost mulk hai. Is ba himmat bache ka yeh bhi kehna tha ke hum Pakistan ko duniya mein pesh karne aur deegar mumalik se dostana talluqat istawar karne ka azam rakhte hain. Salman ka talluq Karachi ke ilaqe Korangi se hai. Brazil jane se qabal wo kae baras Karachi ki sarhkon par football khelta raha hai. Sarhkon par rehne wale in Pakistani bachon ne is aalmi muqable mein apni salahiyaton ka bharpor izhaar kiya. Sath he duniya ko yeh pegham bhi diya ke wo salahiyat mein kisi se kam nahi, zarorat faqat mawaqa ki hai.

Wazeh rahe ke street children football world cup aalmi idara barae atfaal aur Unicef ki janib se Fifa World cup se pehle munaqid karaya jata hai, jis ka maqsad ghareeb bachon ki hausla afzaai karna hai.

Aur is baras yeh muqabla waqai Pakistani qaum ke liye hausla afzaa sabit hui. Pakistani jise badtareen dehshat gardi ka samna hai. Jahan shehriyon ko har waqt qatal o gharat ki khabrein sunne ko milti rehti hain. Aise mein aesi shaandar khush khabri de kar in basalahiyat bachon ne na sirf awaam ke dil jeete, bal ke in ke mayoos chehron par muskurahatein bhi bikheri hain. Zarorat is amar ki hai ke hukomat ab in ba hausla bachon ki har satah par pazeerai aur hausla afzaai kare aur inhe samaaj mein ba izzat maqam dilane ke liye iqdamaat bhi kiye jaey, jo in bachon ka haq bhi hai.

Jahangir Khan Mohammad Yousuf Hashim Khan  

 

 

 

 

@Copy right 2012-2014 www.urdubiography.com